MAUBUANG KHAW LAL LUNGPHUN

Maubuanga ka kal hmasak ber tum chuan Awithangpa lungphun leh an lal Khawvelthanga Sailo thlan lung hi te ka tlawh hmasa ber a. Maubuang khua hian Zoram khawvel-ah larna a neih chu Awithangpa tualchaina hmun a nih vang te, Zoram milar Pu R. Vanlawma khua a nih avang te bakah an lal ropui tak Khawvelthanga Sailo vang te hi a ni ngei ang.

Hmanlai Mizo lalte khan bawi(chemsen bawi leh inpui chhung bawi) an nei thin a, heng bawite hi a tlangpuiin inhumhim duh avanga Lal hnena intulut te an ni ber. Lal ropui deuh phei chuan bawi an ngah thei hle a, Lal vanlungah an awm fer fur thin a ni. Chung bawi te chu lal thuhnuaiah awmin lal rawng an bawl sak thin a. Lal in an chungah zah a ngai a, a chhuah a nih ngawt loh chuan kumkhuain Lal bawi an ni reng mai a, an tan zalenna ni a awm lo. Lal sual deuh an hrawn chuan an vanduai deuhva, indona vela an sal man te phei chu a changin an tihhlum thin. Lal fel deuh an hrawn fuh hlauh erawh chuan a an ziaawm viau thung.

Chutianga kumkhua a lal bawi ni tur kha kum 1910 a lo inherchhuah meuh chuan an tan zalenna kawl a rawn eng ta a. Kum 1908-a Mizoram rawn lut Zosap Missionary Dr Peter Fraser chuan Mizo lalten bawi an neih chu a hrethiam lo hle a. A rawn kalna ram, British Parliament chuan kum 1807 khan ‘Slave Trade’ chu an lo khap daih tawh a, America ah pawh January 1, 1863 khan an President Abraham Lincoln-a’n bawih a lo chhuah daih tawh bawk a. Hetianga khawvel hmun dangah pawh bawih neih an lo khap tawh laia Mizo lalten Bawih an lo la nei chu hrethiam lovin Bawih chhuah a nih theihnan a theih ang angin hma a la ta a. A ma sumin Bawih 40 vel a tlan chhuak a ni an ti. A hmalakna ah hian Mizo lalte zingah Maubuang lal, Khawvelthanga Sailo hian a thlawp tha em em a. Kum 1906-a Kristian a nih khan bawih neih hi Pathian thu nen inmil lo in a hria a, a bawih neih te pawh kum 1910 khan a chhuah ta vek a ni. Tichuan kum engemaw zat Mizo lalte laka zalenna hmu lo, bawih te chuan zalenna an lo nei ta a ni. Khawvelthanga Sailo hi Mizo Lalte zinga bawih chhuah hmasa ber a ni a, ‘Mizo Abraham Lincoln-a’ a ni ngawt e.

‘Bawih chhuahtu lal’ nih hi Mizo history-ah a ropui a, Khawvelthanga Sailo hi Mizo te chanchinah a hming a dai tawh lovang. He pa vang hian a khua Maubuang hian Mizote zingah hriat a hlawh chhoh zel dawn a, Maubuangah rau rau pawh a sulhnu awmna, a thlan hmun hi mite tlawh theih awmchhun a nih tawh avangin a hlu chho zel dawn a ni. A hriatrengna lungphun hi pathum phun a ni a, chuta thu inziak te chu han tarlang ila :

“Khawvelthanga Sailo, kum 88
Kum 1885-ah a piang a, 1898-1954 kum 56 chhung Maubuangah leh Thiak-ah ro a rel. 1906-ah Kristian a ni a, 1907-ah Baptisma a chang. 1910-ah Lal Isua hmingin a bawite a chhuah. 1911-ah Deacon-ah ruat a ni. A khuaten an ngaina em em a, he a thlan lung phunna-ah hian Presbyterian Kohhran chuan Comt. Dinin a fate nasa takin an tanpui a ni. A bawite chhuah tura hriattirtu Lalpa tana a hun hnuhnung lam a hman lain nat lawkna pawh nei lovin 2.jan.1971 khan he khawvel hi a chhuahsan ta a ni.
Phuntu : a fate ( Kapzawna, Lalsanga, Lalmangi, Lalhmingthanga) leh a tute. 28.11.2000”



“Bawi ban hriatrengna Lung
Khawvelthanga Sailo, Lal k.88
Hian 1910-ah Zoram zalen nana bawi chhuahtu hmasa ber a ni.
Phuntu : ZUP, Maubuang, 20.10.1981”



“1901 -1940
Khawvelthanga Sailo leh Rotuahthangi Sailo
Inneih kum 40 a tlinna ‘Golden Jubilee’
Hriatrengna. April 5, 1940.
Rotuahthangi k.85
Thihni 5.Dec.68
An nupa in Diamond Jubilee pelin an dam.”



Tuna a lungphun awmna lai saw a hmun a tha in a theng thaw nuam a, a inhmeh hle nghe nghe a ni. Mahse tunhnaiah chanchinbu hrang hranga kan lo hmuh angin a thlan hmunah hian tui dahna tur siam a ni a, a lungphun bawr vel pawh laichhiat a ni awm e. Tui lakna/ dah khawlna tur chuan hmun dang rem tha an ngah dawn tehlul nen tiin ka lo ngaihtuah ve mai mai a. Tunah chuan Maubuang khaw ti hmingthang tu, an lal thlan lung chu Tui dahna sirah a lo ding ve mai mai tawh dawn tihna ni awm tak a ni.

Hnam hmangaihna hla phuahtu Kaphleia

Kan thupui han chhiar mai hi chuan ‘Kaphleia hian engzat fakau nge hnam hmangaihna lam hla hi a lo phuah ’ tih pawh inzawh awl tak tur a ni. Amaherawhchu, a hla phuah zat te leh a hla phuahte hi a that leh that loh lam te, literature zirna lam atanga thlira a ril leh ril loh lam pawh thluk vak ka tum lo. Kaphleia hian eng rilru pu in heng hnam hmangaihna lam hawi hla te hi a lo phuah chhuah tih lam sawi ka tum zawk a ni.

Kan hriat angin Kaphleia hi kum 20 a pel chho awrh tihin Zoram pawnah lehkha zirin a chhuak a, chutih lai chuan a zirna hmun Shillong khawpuiah chuan Mizo an la tam lo hle. Mi lungleng thei tak a nih avangin Shillong khawpuia han tei ruk ruk chu a khua a har thin hle a ni awm e. Hemi hnu hian kum 1933 velah India ram hmun thenkhat tlawhin Zosap Pi Zaii hovin Zaipawl in an lo zin kual hrep bawk. Shillong-a High School a zir zawh hnuah Zoram lamah lo haw in ME School-ah a nghet lovin zirtir hna a thawk a. Kum 1935-a Matric a zawh hnuah Calcutta khawpuiah IA zirin Scottish Church College-ah a zu awm leh bawk. Amaherawhchu kum kum hnih hnu, 1937-ah TB natna in a tlak buak tak avangin Zoram lamah a rawn haw hlen ta a ni.

Thian pakhatin ‘kan Zoram chhungah, mahni in leh lova ngeiah chhungkua a han awm hi ngat ngat hi chuan, politik luh chilh ve loh phei chuan hnam veina rilru hi put a har khawp mai. Mahse Zoram pawn atang chuan Zoram hi kan vei lo thei lova, hnam rilru put chu a awl deuh’ tiin a sawi thin. A ni taka, hnamdang zingah chuan mahni ram leh hnam chhan chu na tak a ni. Hnamdanga kara kum engemaw zat han chen meuh chuan kan ngaihtuah ngai loh thil tha tak tak, Zoram thatna tur thil tha tak tak kan sawikhawm reng zawng a nih hi ! Kaphleia pawh hian hnam veina rilru a put tanna hi kum 5/6 vel chhung Zoram pawna a awm lai hi a ni awm mang e ! a tih theih. Hetia Zoram pawn hmun hrang hrang a tlawh kual lai leh lehkha zira Shillong leh Calcutta khawpuia a awm lai hian a ram ‘Zoram’ chu a ngaih a bang thei lo. Chu rilru atang chauh lo chuan he hla hi phuah chhuah theih a ni lo-

“ Hringmi lungmawlin mahni sumtual ngaiin,
Kei ka chan Zoram ka ngai bang lo ve,

“Ka ngai zual thin kan Zoram nuam,
Anpai khua lian a hneh chuan;

“A thenin Africa, a thenin vur ram,
A thenin tuifinriat thliarkar kan ngai e;
A thenin phaizawl, a thenin tlang ram,
Kei ka chan Zoram ka ngai bang thei lo ve.”
(Kaphleia, Zoram nuam, 1937)

Pu Thangkhuma’n ‘ka haw dawn kan tih chuan Zoram kan sawina a ni thin’ a lo tih ang deuhvin khawi hmunah pawh awm se a ram Zoram chu a ngai a, a au vawng vawng thin. Hnamdang zinga a khawsak nasat avangin an chezia leh khawsak phung a hmu nasa a, an ram leh hnam an phatsan ngai lo tih te, hnamdang zingah pawh awm se an hnam chin dan an phatsan duh lo tih te pawh a zirchhuak bawk. Ram zawl zau pui pui te hmu in, ram hausa tak tak te pawh hmu thin mahse,

‘Chung Pathianin lei chung, ram tin, hmun tin hi,
Hnam tin naufa zalen nan siam mahse
Hringmi lungmawlin mahni sumtual ngaiin
Kei ka chan Zoram ka ngai bang lo ve.’
tiin a ram chu khawvel zawng zawnga a ram ngaih ber a la ni tho.

A lehkha zir lai hian zirlaibu bakah lehkhabu chi hrang hrang a chhiar nasa hle tiha Diary atangin a hriat theih a, chung zingah chuan My Struggle by Adolf Hitler, A Biography of Napolean Bonaparte, The Groundworks of British history by GT Warner & CHK Marten te hi a chhiar nasa hle. Heng lehkhabu a chhiar atang hian Hitler-a te, Napolean-a te rilru in a hneh a, England lal ropui lo indin chhuah dan te hian a hneh takzet a ni. Hemi piah lamah hian thian a kawm zau hle tih a lang bawk a, a Diary-a a lan dan chuan Naga hruaitu AZ Phizo te nen pawh an inkawm thin ni awm tak a ni. Hetiang a nih avang hian a rilruah hnam veina rilru (nationalism) hi hetih hun lai hian a lo inkui tiak viau tawh a tih theih.

Kum 1903-ah Zosapthara’n Zofate fuihna leh hnam rilru put tir thei tur hla a lo phuah chhuak a,

Mizo kan ni lawm ilangin,
Kan hnam thatna zawng zelin,
Thil tha in kan ram timawiin,
Mizo lawm teh u’ tiin.

Hnam veina kawnga kan Zosap chi tuh hi a tiak tha hle niin a lang, a hnu deuhvah Mizo tlangvalte rilru atangin hetiang lam hawi hla hi a lo chhuak ve ta a. Thanga chuan 1908-1911 chhung khan hnam hla pahnih, “ Mizoram, Mizoram, ka thlahlel che” tih ah hia chuan Kaphleia hi a rawn lang chho ta niin a lang. Kum 1937-a Calcutta-a a awm laia phuah ‘Zoram nuam’ tih ah chuan

‘Aw Zoram, ka thinlungin ka hmangaih che,
Ka theihna leh finna I tan ka pe
I retheihna, chhukchho har miten sel mahse
Kei ka chan Zoram ka ngai bang lo che.’

tiin a theihna leh finna zawng zawng chu a ram tan a hlan thu a puang. Heti khawpa inpekna nasa hi ropui khawp mai. Chu rilru chuan a ni -

Zoram ! Ka ram !
Lu chhum ban chhum huam a,
Kan pipute sah zau;
Mi huaisen leh tlawmngaite pianna
Ral rel thiam leh hla phuah thiamte pianna;
Lui tin, tlang tin mi hrang sulhnu
Dai ngai lova zaia chawi hnu
Dawnin ka ngaihlu zual, ka ram !

tih hla rawn phuh chhuah tir thei tu chu ni !

A pianna ram chu ram rethei leh chhengchhia, hmuhsitawm mai mah nise a tan chuan a hlu ber fo thin.

‘Riakmaw angin kawl pawh vel ila,
Sappui tual nuamah pawh leng ila;
Ka muanna thing thiang I ni,
Ka rinpui leh ka chhuan I ni.

‘Ka muanna thing thiang, ka rinpui leh ka chuan I ni’ ti hialin a ram chu inngahnan a hmang a, a chapo pui hle a ni. A hla te avang hian Zofaten hnam veina thinlung kan lo pu chho tial tial ti ila kan sawi sual kher lovang. ‘Zoram ! Ka ram ! Lu chhum ban chhum huam a, Kan pipute sah zau’ a han ti te hian Pasaltha mual liam tawh ropuizia leh ram tan an inpekna hlu tak te min hriatchhuah tir a. Kum 1792-a Captain Rouget De Lisle- a phuah, French ho hnam hla ‘La Merseillaise’-

“ To arms, to arms, ye brave !
Th’ avenging sword unseath !
March on, march on, all hearts resolved,
To victory or death!”

in French mipuite rilru nasa taka a kaihthawh a, Sipai hotu pakhatin “ he hla hian ka sipaite chu sipai dang sang khatin an belh tluk zetin a ti chak a ni” a tih ang tluk zet khan Kaphleia’n ‘lu chhum, ban chhum huama kan pipute sah zau’ a han ti hian Zofate rilru a dek thuk a ni.

Kaphleia hun lai hian Zoramah heti em em mahni ram ngaihlu a, ‘hnam hmangaihna rilru’ (feeling of nationalism) chawk tho thei tur khawp thil thleng a awm lo niin a lang. Politics lamah pawh thawm kan la nei lova, Bawrhsap ho pawhin Lal te kaltlangin muang takin ro an la rel a. Mipui mimir pawh hemi kawngah hian kan la harh vak lo niin a lang. Hetiang dinhmun a nih laia Kaphleia’n hnam rilru a pu tlut mai leh a thuziak zawng zawnga a thu ken laimu a ni zel thei mai hi a ropui a, tluk loh rim a nam hle a ni.

Zoram a hmangaih a, tuma hnuaia a tluk luh a phal lo. Mahni a dingchhuak thei tur in a ram chu a beisei a, mahse a innghahna chu Pathian a ni.

‘Aw, chung Pathian,
Hnam tin khawngaihtu thin;
I fate bawk kan ni,
Mi hnuaia kan kun bik phal suh la.
Hnehchhiah leh bumna min dopui la,
Kan innghahna thutak ni se;
Kan tih leh kan sawi apiangte,
Pathian leh kan ram tan nise.

Tunlaia political party pakhat, MNF ho thu laimu leh an innghahna, ‘Pathian leh kan ram tan’ tih pawh hi kum 1939 daih tawh kha Kaphleia hian a lo tuipui daih tawh a, Kan tih leh kan sawi apiangte, Pathian leh kan ram tan nise tiin. Pathian rinchhan chauh lo chuan hnam a dingchhuak dawn lo tih hi a hmu chiang a, chumi atan chuan Pathian chu a au lawm lawm a ni.

Aw, chung Pathian
Mahnia ding turin
Thudik leh fel zawmin
Chakna, finna min zuk pe la
Kan pipute tlawmngaihna hlu kha
Thangthar zelah rawn chhem alh teh
Kan rilru leh kan chaknate
Pathian leh kan ram tan ni se.

A tawp berah chuan, B. Lalthangliana chuan ‘Kaphleia hi nationalist dik tak leh Mizo zinga a hmasa ber pawl a ni ngei ang’ a ti hial a. (Kaphleia Hnuhma,1990, p.xxiv). A dik khawp mai. A hla phuah ah chauh lo pawh, a thuziak zawng zawng deuh thawh ah hian a ram tana thil tha tur leh mi te zirtirna lam thu a lang nasa em em a, chu chuan a thanemngaihzia a tichiang awm e.

Kan sakruang Mizoram tan

Kan vanglai hun leh ni zawngte,
Kan ram tan a hlan zelin, Fam dairial pawh chang ila,
Kan sakruang Mizoram tan,

C. Zoramliana’n a ti mathlawn lovin tupawh mai hian mahni ram leh hnam phatsantu nih ai chuan chawimawitu nih kan duh theuh ang a, kan thih hnu thleng pawhin hnam tan rohlu la nih zui zel kan duh theuh ngei ang. Amaherawhchu, a tak takah chuan ram tana nun hlan hi thil namai a ni lova, awlsam tak pawh a ni hek lo. Ram tana raldo tur leh hnam chhan tura han thawh chhuah dawn meuh chuan mahni hna chan hial pawh hlau lova tlan bo mai hi a lo awl dawn a nih hi !
He thu anpui, kan hriat tlanglawn tak, Kohima War Cemetry-a saptawng thu mawi tak hmanga an ziah hi ka hre chhuak fo thin.
‘When you go home, tell them of us and say
For your tomorrow, we gave our today’
Kum sawm zen zawn kalta khan tumkhat chu mi pakhatin YMA chanchinbu-ah he thu mawi tak hi Zotawnga nalh deuh a dah atan a it thu a ziak a. Mi thenkhatin nalh tak taka an lo lehlin tawhte pawh an rawn tarlang bawk a. Kan thian pakhat pawhin a han dah ve ngial a chu chu YMA chanchinbu-ah ka thawn sak a, an chhuah nge chhuah lo pawh kan hre ta lem hlei lova, hetiangin-
‘ Dam ten vangkhua i lawi hun chuan,
Hlan nang che, rualduh leng;
Hring nun par vul zel nan,
Chham ang kan zal ta e’
tiin. Kan thianpa hian a hmel en aiin a phuah chhuak nalh khawpin ka hria. Tun hnuah hian nalh deuhin an phuah chhuak leh ta zel a, ‘hlim ten hringnun i hman ve nan, fam khawpui kan lawi ta e’ tiin Remkimi pawh hian a sa ral ral thin. Rampuia’n ‘kan sak ruang Mizoram tan’ a tih te nen hian bawm khata khung chi an ni. Uluk tak leh rilru seng taka han ngaihthlak vang vang chuan ‘hetiang hla phuah chhuak tur hian rau engemaw chu chan a ngai anih hi, ram veina tel lo chuan thil harsa tak tur a ni’tiin ka ngaihtuah fo thin.
Assam phai zawl vela han kal chang hian ‘helai hi Mizoram ramri chin a ni’ tiin Dholai lehlawn bul kan thlir a, mahse a tak takah chuan (tunah chuan) a ni tawh teuh si lo. Tu tu te emawin ramri lung zu phun thin mahse a sawt tawh der si lo.Helai bawr thlen nikhua hi chuan Kaphleia hla min ti hrechhuak thin -
‘Zoram ka ram,
Luchhum ban chhum huama kan pipute sah zau.”
Luchhum leh ban chhum huam a, nunna hial pawh hloh ngam a, kan piputen an lo sah zau kha tunah chuan a zim ta hle mai. Kan piputen ‘Zofate u, hringnun par hlim taka in tlan a, tuma tih buai lova in awm zelna theihna turin, kan theihna zawng zawng kan hlan tawh a, ram kan lo sah zau sak che u a. Kan nunna hial pawh he kan Mizoram tan hian kan lo hlan tawh a sin.’ tiin min thlah a. Mahse an nunna hlu tak an hlan chhan kan ram ramri te chu tih zimin a lo awm ta. Pasaltha mual liam ta te an va zahawm em! Keini hian eng chen nge kan ram tan ke kan pe ve dawn le ? ‘Kan sakruang Mizoram tan’tih chu sawi loh, he hla hi kan sa peih tawk chauh niin a lang. He hla phuahtu hian kan ram dinhmun chu a han thlir vang vang a, ruihhlovin thalai duhawm tak tak a eiral mekte chu a han thlir thin. Chutianga ralthuam pawh nei lo leh hneh awlsam em em ruihhlo laka kan thalai rual chak tak takte an han awn ruai ruai a hmuh chuan pasaltha ram tana nun hlantu te chu a ngai vawng vawng thin.
‘Ram tana tuartu, thlafam chang tawhte,
Nghilh ni awm thei si lo;
Lungduh par vul lai an chuai mai tur hi,
Ka ngai ngam lo, aw thinlai rukah.’

‘Mahni ram chhunga awm aiin ram pawn atangin hnam vei a awl zawk’ an tih hi kawng thenkhatah chuan dikhlel deuhin lang mahse kawng dangah chuan a dik ve tho mai. Ram pawn atang chuan kan ralthlir a, siamthat a ngaihna lai te hmuh fiah a awl thin. Shillong khawpuia lehkha kan zir ve lai chuan mahni ram ngaih ti na mi tak kan lo ni bawk nen ‘kan rama kan haw hun chuan’ tiin kan inhnem fo thin. Zan rei tak tak thleng kan sawi khawm a, a chang chuan khaw var thleng hial pawhin. Khatiang hunlai kha mahni tawka zir sang leh ngahdan nei tha intih hun lai a ni a. Kan ram tana rilru leh ngaihtuahna kan sen nasat lai ber pawh a ni hial mai thei. A ni renga zirlai nih lai, a bikin zirna sang University-a zir lai phei hi chuan hnam chi hrang hrang nen kan inpawlh sawp a, an zia leh an nunphung, an hnam leh an ram an ngaih dan te hriat a awl a. Chung avang chuan zirlai nih lai hi hnam veina kawnga kan tuihal lai leh kan khah liam lai ber a ni an ti thin. Chumi hnam rilru a put nasat vang a ni Rampuia pawh hian,
‘Kan vanglai hun leh ni zawngte,
Kan ram tan a hlan zelin,
Fam dairial pawh chang ila,
Kan sakruang Mizoram tan.’
a lo tih theih ni.
Inpekna tak tak nen chuan hlauhawm hi a lo awm lo hle niin a lang. Tum khat chu kan nau pakhat nen Indopui pahnihna laia Mizo sipai, Burma ram thleng thlenga ral han kap, a then te chu leh lam pawl sipaiin an man hial te pawh kan kawm kual a. Khawvel Indopui pahnihna lai vela Kohima, Burma vela Japan ral nen an inbeih dan chanchin te an sawi a, an vanglaia an thil tawn a ni bawk a, sawi nuam an ti a, a ngaihnawm bawk a. A then te chuan an huaisen leh thawh that avangin lawmman Medal eng engemaw an dawng nual nghe nghe a ni. Chung Sipai huaisen tak tak te chuan ‘indona hmunah, ral nena han inpawm chilh tak tak chuan hlauh kan nei lo, kan rilru ah India a rawn lang a, chu chuan nasa takin min ti huaisen a, ral kuta thih pawh kha hlau lo’ an ti. ‘Ram leh hnam chhan nan chuan ‘hlau’ tih tawngkam hi kan ngaihtuah hman lo’ an ti. Chung sipai huaisen tak tak, nunna chan huam te avang chuan Japan ral chu dan beh an ni a, an ram lamah nawr let chhohva awmin kan ram an rawn lut ve ta lo a nih kha. Chung sipai zahawm tak tak te chu an ni-
‘When you go home, tell them of us and say
(Dam ten vangkhua i lawi hun chuan, hlan nang che, rualduh leng;
For your tomorrow, we gave our today’
(Hring nun par vul zel nan, chham ang kan zal ta e’)
ti a thangtharte thu mawi tak leh awmze ril tak min hnutchhiah tute chu. An va hlu em ! Anni bakah nunna chan huama ram tan beitu, Pathian khawngaihna dawnga dam chhuak te hi heng nunna chan ta te tluk zet hian an hlu a, kan ram sawrkar pawhin ‘war veteran’ ti ngata a koh an ni a. Tun hnua an sipai inthuam famkim a an han inthuam a, an medal dawn hlu tak te an han inbel tlar tuar(h) thin han hmuh hi chuan kei, ram tana thil tha tih kawi khat pawh sawi tur la nei ve lo tan hi chuan khi-ah an ni ringawt mai. Heng ‘pa zahawm, darfeng rual’ te hi a taka
‘Fam dairial pawh chang ila,
Kan sakruang Mizoram tan.’
ti ngam te chu an ni e.
Mizo te zinga thu leh hla thiam tak, Kaphleia chuan ‘tupawh keimah anga mahni leh mi dang tana thiltha tih tum lova, ral thlir mai mai mi chu a ram tan fapa tlaktlai lo, hrin man awm lo a ni ang’ a tih angin mahni ram tana thiltha ti a, a tul chuan nunna hial chan ngam mi ‘tlaktlai’ kan ram hian a mamawh a ni.

LALLIANVUNGA HMUN

Tunlai hian Hmuifang tlang a lar ta hle mai. Aizawl atangin a hla lutuk bawk si lova, hunawl leh chawlh hman nan a rem a, intihthaw ven tumin kan pan hum hum mai a nih hi. A bikin khawpui lama chengte hian han len khaw thawnna hmun hi kan nei hlawl lova, nitinin khawpui chep tak karah kan ri nuai nuai a, kan vir mup mup a ni ber mai. Hun engemaw chen atang khan Reiek tlang vel hi chei thar a nih tak avangin kan pan sup sup a. Tunah Hmuifang tlang kan ti leh ta. Kan thalaite tan pawh Reiek leh Hmuifang hi darkar tlem te a thlen theihna anih avangin len khaw thawnna an nei ta hi a lawmawm hle mai. Hmasawnna pawimawh tak a ni awm e.


Kum 1994 kum tawp khan Adventure Camp neiin Thiak khua atangin Midum kham chhovah hian ke- in mahni puan thuah pu in kan chhova, Sumsuih kal pelin Lallianvunga hmun-ah hian Puan In kaihin kar khat kan cham a. Chalkhawh kham-ah te rapelling neiin Khurchhe Puk (an tih mai) ah te kan lut a, Bak te pawh kan man teuh mai. Kan kal hun hi December thla tir, thlasik lai a nih avangin zan lamah erawh a vawt khawp mai, zingah han tho ila hmun thenkhatah chuan vur tla te pawh hmuh tur a awm bawk. Lallianvunga hmun zawl bul vel hi thingin a khat a, a sam fai hna te kan thawk a, zingah sava chi hrang hrang hram te hriat tur a la tam a, a nuam hle a ni.
Kum 16 vel hnu tunhnaiah tum 2 lai ka kal ve leh tawh a, a lo nuam tawh hle mai. Hman ai khan a lo phul nuam tawh a, a hring nalh tawh zawk bawk a. Mahse thingkung erawh a tlem tawh zawk. Mi kan zi nuai nuai a, China ram an sawi ang deuhvin single in thla pawh a lak hleih theih tawh loh a ni ber mai. Shillong-a Golflink te nen pawh a inang khawp mai.
Ka sawi tum tak erawh chu, helai phul nuam tak hmun hi ‘Lallianvunga Hmun’ tih thin kha a ni a, tun hnuah hian Hmuifang tlang kan ti ta deuh vek mai a. Hmuifang tlang chu a ni tho na in a hming tak zawk ‘Lallianvunga Hmun’ tih hi ri ring zawk se a tha awm mang e ka ti deuh. Signboard-ah pawh ‘Hmuifang Park’ tiin tar a ni a, a hming hmasa hi a reh hlen ang tih a va hlauhawm em !
‘Lallianvunga Hmun’ chawitu Lallianvunga hi Mizo lal ropui Lallula fapa niin a unau te chu Lalpuiliana, Lalmanga (Mangpawrha an tih bawk), Vuttaia leh an farnu neih chhun Ridawpi te an ni.

Tin, Hmuifang tlang chhip tak zawk hian tlawh a hlawh em aw? Hmuifang tlang hi Mizorama tlang zingah a san zawnga chhiar a pariatna tih thin kha ni a, a san zawng pawh 6,307 ft (1,922.3m) tih a ni. Tan tlang ai hniam hret in Chalfilh tlang aiin a sang leh hret a ni. A tlang chhip atang hian Mizoram chhim leh hmar, chhak leh thlang tlang dung te hi a lang iar uar mai a, thlang lamah Jampui tlang dung, chhak lamah a hmu thiam deuh tan chuan Burma lam tlang te pawh a tlang hial mai. Chhim lamah pawh a lang phei uar bawk a. Tin, khaw hrang hrang a lang nasa bawk. Chuvangin Hmuifang tlang chhip hi tunai hian Tourism Department lam te hian chei leh zual ta se, khaw hawina a tha a, zirlai tan phei chuan Geography zirna tha tak a ni ang. Minute 20 vel ke a kal a, a tlang chhip han thlen mai theih a ni a, a kalkawng a nuam a, a chhip han thlen phei chuan a nuam hle a ni.

A chhip ah hian lungphun 3 vel a awm a, Sumsuih Pastor Bial in Gospel Centenary hriatrengna Kross lian pui an tar chu a ding bawk a. Tlemin han chei deuh ila hmun nuam tak tur a ni. Phul hmun a ni a, a hranpa a thutna dah a ngai lem lo, phulah hian thu vel mai mai ila a nuam zawk. Thutna siam sawi takah chuan Lallianvunga Hmun-a phul nuam takah hian a chhip sang laiah tunhnaiah Govt. Mizo HSS NSS Unit in thuthleng pahnih an lo siam leh hmanhmawh tawh a. Hei erawh hi chu a siamtute an zahawm vau na in siam lo ta zawk ila, phul-ah hian thut hahdam a nuam zawk a sin maw le ! Hetianga thutna siam hian a hlutna ( a ‘natural’-na kan ti zawk dawn em ni) a ti bo niin ka hria. Phul hring dup hlutna a ti kiam hle in ka hria. Entirnan, Thasiama Se No neihna chhip lawn chhohna RCC step an siamin a hlutna a ti kiam ang deuh hian. An siam duh anih pawhin helai hmunah kher lo, a thlang kawngpui kamah te emaw hmun dangah emaw siam ta zawk se a va tha zawk dawn em !

Khawchhak lam fan

Khuangchera Puk

‘Khuangchera Puk’ hi Mizorama Puk hmingthang ber a nih loh vek pawhin a lar ber pawl chu a ni awm e. Ailawng khaw chhung, kawngthlangah tuikhur hnunga awm a ni. He Puk hi Puk pangngai ang ni lovin a lut tawh te chuan an hria ang a, chhung hi lung khawkrawk a ni a, luh pawh a harsa hle a ni. A changin hmun zimte-ah zangthal zawnga luh te a ngai a, a chang leh a zua huau bawk a. Tlema sa tha deuh tan chuan luh pawh a harsa hle a ni. A thui zawng hi meter 119 a ni a, chho zawngin kaw chhova, a chhak kawngpui chhakah a chhuak ta a ni. Mi chak pangngai chuan reilo te chungin an lut chhuak zung zung a, minute 20 vel chauh hun hmang te pawh an awm. Keini luh ve hun kha chuan sikul naupang nen kan nih avangin darkar 1 vel hun kan hmangin ka hria.

Isaac Zoliana, Reiek khaw pa chuan hetiang hian Khuangchera Puk- a ti a hming vuah a nih dan a ziak. “Reiek khaw daiah hian Puk a awm a, tuihna tha tak a lo luang chhuak bawk a. Reiek khaw pa ho inhnial tawp thei lo, an thu satel lu chu –he puk hi a mual lehlam tawpa kawrah hian a kaw tlang, tih leh a kaw tlang lo, tih a ni a.

Khuangchera chuan an khaw pa ho inhnialna tawp thei lo chu fiah a duh ta a. Meichher, chher sarih a siam a, pukah chuan a meichher chhi chuan a lut ta a. Chher ruk a keng bawk a, a lut zel a, a laihawl vel a thlen chuan a kua chu a zim ta hle mai a. Bawkvaka kal a ngai ta a. A meichher te chu a kalsan vek a, bawkvakin thim zingah a kal zel a. A beidawng lek lek tawh a. Lungpui lawn kai ngai deuh hi a va thleng a. Chu mi a lawn kai hnu lawk chuan eng de re re hi a hmu ta a. Rei lo teah pawnah a chhuak thei ta a. Reiek paho inhnialna thu satel lu chu a tawp ta. He Puk hi leiverh sei tak a ang zawk a. Meter 119 chu a luh tlang tak avangin a hming chawiin ‘Khuangchera Puk’ tih hming hi a put phah ta a ni.” (Isaac Zoliana, Reiek Tlang I chuan ang aw, Aizawl, 2009, pp.88-89.).

He Puk hi tunah chuan Sawrkar thuhnuaiah awmin Art & Culture Department in ‘Mizoram Ancient Monuments and Archaeological Sites and Remains Act, 2001’hmangin a humhalh tawh a ni.

A luhna Gate tak hi chu kum 2006 Directorate of Sports & Youth Services Department in an siam a ni thung.

Mizo Lal Ropui Lallula Lungphun

Tunhnaiah Hreichuk khua-ah lehlangin ka zuk kal a, ka thil hmuh tum ber chu Lallula thlan lung phun a ni. Hreichuk khua hi Mamit District huamchhunga awm, Reiek thlang lam, Kanghmun tlang dung a awm a ni e. Reiek atangin km 20 vel zet chu a la ni, amaherawhchu kawng a tha a, karlohvah a thlen theih.

Mizo Lal ropui berte zing ami Lallula, Sailova tuchhuan leh Rohna a fapa hi kan hriat angin kum 1730 velah piang ang chhut a ni a. Zopui-a a awm laiin Mizo history a hmingthang tak, ‘Thlanrawt Rawt’ hi a thleng a, hei hi kum 1760 vel a ni awm e. Chumi hnuah thlang tla in N. Vanlaiphai, Lungchhuan, Piler, Bawngchawm, Serchhip, Diarkhai, Samlukhai leh South Sabual ah te a awm kual a. Sabuala a awm lai hian In 300 vel a nei an ti a, kum 5(1790-1795 AD) vel a awm a ni awm e. Heta tang hian Darlung ah a chhova, chutah Hreichuk-ah a phei a, kum 1807 AD vekah Hreichuk-ah hian a thi ta a ni. Lallula hian fapa 4- Lalpuiliana, Lallianvunga, Lalmanga (Mangpawrha), Vuttaia leh fanu Ridawpi a nei. A fanu Ridawpi hi South Sabuala an awm laiin a thi a, a lung phun pawh Sabual khaw daiah hmuh theih in a la awm.

Hreichuk khaw bul lawkah hian Lungphun khua a awm a, hetah pawh hian Lallula lungphun a awm thin a, tunah erawh chuan hmuh tur a awm tawh lo niin a khaw mi ten an sawi. An sawi dan chuan Lungphun khua a mi hi a dam laia a phun (damlai lung-commemorative stone) a ni a, hemi hming chawi hian a khua pawh hi Lungphun khua tih a nit a awm e. Tichuan a bul lawk Hreichukah hian a thi ta a ni. A thih hnu hian a fate leh a thlahten a luruh chu la in Sialhawk-ah a fate hriatrengna lung phun pahin an phum tel ta a ni.

Tuna Hreichuka a lungphun awmna lai hi Lallula In hmun thin, a thih laia a awmna hmun a ni a, tun hnuaah hian mimal in an nei ta a. Tunhnaiah Art & Culture Deparment leh Hreichuk Branch YMA ten helai hmun hun a neitu te hnen atangin a lei a, a hriatrengna lung an phun ta a ni. Lungphun sir lamah hian Lallula lungrem (a kawt lungrem) tlem chu hmuh theihin a la awm.

Hriechuk khaw bul, Lungphun khaw daiah hian Lallula lungphun pakhat a awm bawk a, helai hmun hi Lallula, Lungphun khuaa a awm laia a dam lai lungphunna a ni a. A lung tak(original) chu a amw tawh lo na in Art & Culture Department in an phun tha leh a ni.

MRSA Picnic, 2010 chu le !

Ni 1.5.2010(Inrinni) khan Mizo Research Scholar Association(MRSA), Shillong chuan hun rei tak atanga a lo inbuatsaih tawh angin member intihhlimna hun Barapani lui kamah a buatsaih a. A hma fe atangin inbuatsaihna chi khat atan member ti ten duh duh pakhat pawn lam mi sawm theih tih chu la fuh fe fe an awm a, chu chuan inbuatsaih a ti nuam hle. Han sawi ta mai mai ila, MRSA hminga nula sawmna card ah chuan he hla hi ziah lan a ni.

‘ Long khaw sirah dam ten a luang del del, barapani,
Nang nena chhai ka nuam e, lengngha;
Am ten i chhai dun ang hmiang.’

A hma zanah urlawknan Amuana roomah hla hlui sa in dar 1 kan thleng a, kan phur viau na in kan hla sak en erawh chuan kal ve tur midang ( a bikin la naupang lam deuh ho) a hnawt kir ang tih erawh a hlauhawm khawp mai.

Zing kan han tho a, ruah a sur ta tlat mai ! Tlema rinna lama chak lo deuh zawk Pu KC-a phei chuan Hostel-a tih mai a chi loh maw tiin ngaihdan a nei hman a, mahse kan hruaitute chuan khaw tha tak an la beisei cheu a, an rinna chak zawk vang nge ni. Dar 7 velah chuan Chhinlung floor-ah Amuana te, Pu Sawma te ho an vei thuak thuak tawh a, AB-a pawh tuk dang ang lo takin a tho hma khawp mai.

Dar 9:30 ah Chhinlung Hostel kawt atangin kan chhuak a, kan vaiin 22 kan ni a, mipa 13 leh hmeichhe 9 kan ni. Kan intihhlimna hmun hi UCC hnung, Barapani te penah a ni a, thing hlim vel a awm lo na chungin a nuam phian mai. A hmun hi uluk taka kan ziaktu lianin a thlan a ni.

Thunawi te te :
1. Picnic tih mai ni lovin Sangha man a tel avangin MRSA hmingin len (tih lemah thosilen) lei a ni a, hemi ni hian chahwma lamah Pu Nunga leh Mapuia te kaihhruaina in nula 5 nen Barapani lui te penah tho sangha man turin an thawk chhuak a. Nula hruai an ni bawk a, rei tawk tak an thang hnuah Kaikuang nen an rawn man teuh a, tlaiah chum nghal a ni.

2. Thawhhnihna ah Pu Vena leh Khaipua hovin an kal veleh a, nula 4 an tel thung. Anni pawl hi chuan man em em tum pawhin an kal lova, mahse a hma ami te aiin an man tha zawk.

3. Hemi ni hian Pu Johny-a a kawng a tha meuh lova, duh angin a che hlei thei lova, a pawi hle.

4. Ziaktu lian, Mapuia’n sangha man a zei hle, thildang a zei nge zei loh tih erawh kan hre chiah lo.
5. Pu KC-a’n a man lian ber an ti.

6. Tlangval hovin nula ho an tihlim thiam hle bawk.

7. Ab-a tui hleuh zuai zuai lai nula hovin mit tla dawnin an thlir.


Thlalak thenkhatte :