Lung zawn

Hei hi kum 8 kalta vela South Sabual khuaa ka pi (Hualkungi) leh pu(Chhuanvawra) hriatrengna lung kan phun tur thlanmual pana kan zawn lai a ni e. Lung chungah hian thing tuai engemaw zat kan tawn kawkalh a, a zawnna turin. A lan ang hian mi engemaw zatin a zawn theih ta a ni. Hetiang hi hmanlaia lung an zawn dan kha a ni e. Hmanlai chuan hetianga lung an zawn hian a hma lam leh hnung lamna tang te hi an innawr vak thin a, a hlimawm thei viau a ni awm e.

Reiek Tlang

Hei hi Reiek Tlang, a lehlam atanga lak a ni e. Thlalakna hmun hi Lungphun khaw dai atanga lak a ni. A hmuhnawmin a nalh khawp mai.

Ridawpi Lung

He Lungphun hi Aizawl atanga km 60 vel chauh hla, South Sabual(Mamit District) khaw kawtchhuah a awm a ni. A len zawng hi 2 ft a chhah, 5 1/2 ft a sang a ni a, teh kualin 5 1/2 ft a ni bawk. Lungphunah hian milem chi hrang hrang - Se lu, mihring lem,,dar etc. a inziak nasa hle. He Lung hi Mizo Sailo Lal ropui, Lallula(c.1730 - 1807) fanu Ridawpi hriatrengna lungphun a ni a, kum 1791 bawr vela phun ni a hriat a ni. Hetih lai hian Lallula hi Sabual khuaah hian In tam tak neiin a awm. A thlangah hian luite a luang a, an sawi dan chuan, lung hi he luite atanga an lak chhuah a ni a. Lung an phun dawn hian Ui an phum tel bawk a. Chumi avang chuan a thlanga luite hi a hmingah Ui Phum Lui an ti ta a ni an ti. Lungphunna ah hian Lallula hian Sial 5 leh Vawk 5 a talh a, a khaw mipuite bakah khaw thenawm lalte pawh a sawm bawk.

(Source : Malsawmliana, South Sabual Chanchin, Mizoram Publication Board, Aizawl, 2002.)

Lung an phun dawna Ui an phum tel kher hi eng nge a chhan ni ang le ?

Ka fate :

Heng te hi Lalpan malsawmna min pek te an ni e.

Lalruatpuia (4) leh Lalhruaitluanga (thla 7).

Eng vangin nge Biak Inah kan mutthluk thin?

PDF Print
Written by Malsawmliana Saturday, 13 February 2010 21:32

Mizo Kristian te hi kan inkhawm nasa hle a, khawvelah Pathian bia a inkhawm nasa ber hnam kan ni mai awm mang e. Kar khatah vawi 7 kan inkhawm a, zan lam bakah nitin zingah tawngtai inkhawm kan nei ziah bawk a. Biak Ina kan inkhawm hian kan muthlu nasa hle thin a, a bikin Pathianni chawhnu inkhawm phei hi chu muthlu kan thahnem zual deuh bik niin a lang. Thenkhat chu Biak Ina kan lut veleh kan tawngtai hi muthlu chhunzawm nghal te pawh zu awm a!Engvangin nge kan mutthluk nasat em em ?A chhan ni thei awm te i han dap kual teh ang.
Hrisel loh vang : Tam tak (a bikin upa lam) te hi tunlaiah chuan zunthlum, BP sang nei deuh vek an nih tawh avangin an chau hma a, an awmawl deuh chuan mutthluk an sam hle. Biak Ina an thut pawh hian an muthlu awlsam hle.
Inthlahdah vang : A tam zawk hi chu kan inthlahdah vang a ni. Nu leh pa chauh ni lo, thalai hrisel tha zawkte pawh kan muthlu nasa hle a, kan inthlahdah vang leh kan insum theih loh vang mai a ni. Thusawi kan ngaihthlak peih loh vang te a ni duh hle. Hemi avanga muthluk hi a pawi hle.
Chin dawk lak : Thenkhat hi chu an chin dawklak vang leh tih thana an neih (habit) vang a ni bawk. Muthluk ching hi veng tinah an awm deuh veka Inkhawm apianga muthlu ngei ngei hi an awm bawk, kan vengah pawh hian inkhawm apianga muthlu chi hi kan nei nual mai.
Boruak uap vang/khaw lum vang : Biak lian deuhah chuan inkhawm te pawh an thahnem a, hetianga inkhawm kan thathnem deuh chang a, tukverh leh ventilator te kan khar phui vek hian boruak a up a, boruak hip tur a tam loh avangin mutthluk a awlsam hle a, chauh phah a awl hle bawk. Kan vengah hian tukverh leh ventilator khar phui vek kan ching a, boruak uap lutuk avanga a ruk a buai hi an awm fo a ni. Biak In enkawltute pawhin khaw vawt lutuk leh thli thaw lutuk a nih lem loh chuan ventilator tal hawnna chang hriat a tha hle. Hriselna a inchen loh avangin boruak hip tur tam loh avanga chauh phah a awm theih.
Mut kham loh/ men rei vang : Tunlaiah chuan zan lamah mitin hi kan mengrei tlangpui tawh a. Nu leh pa te pawh an mengrei ta hle a, zingah erawh an tho hma leh thung. Thalaite pawh zan lam a hnathawk chi te an awm nawk tawh bawk a. Kan menrei chhan chu engpawh a ni ang, a then chu zanah mengrei mahse zinga tho hma leh tho te pawh an awm. Thalai mu rei ho pawh hian mut an kham chuang lo. Hetiang avanga muthlu te pawh hi an awm bawk.
Tum vang hrim hrim : Fiamthu deuhin muthlu tur tala inkhawm pawh a tha an tih fo hi a dik hle. A bikin Pathianni chawhnu hi chuan thalai zingah mutthluk tuma inkhawm hi an awm fo a, lo hnar ta suk suk pawh an awm bawk.
Thusawitu vang : Engemaw hun bik deuh anih loh hi chuan kan inkhawm dan hi thuhril inkhawm a ni deuh mai a. Pathian thu hi kan insawi chhawk a, thiam deuh leh thiamlo deuh te pawhin an sawi chang a awm bawk a. Thusawi thiam vak lo te chu ngaihthlak a lo peih awm lova, ninawm lamah a kal thin. Inkhawm duh ve tho si, thusawi thiam lo tak thusawi ngaithla peih lo chuan mutthlukah a thlak ta thin a ni. Thusawi thiam takin a sawi chuan muthlu an tlem thin.
Pathian Thu ngaia neih : Pathian thu hi kan sawi nasa a, ngaiah kan nei deuh ta niin a lang. Thenkhat chu mahni ngaihdanin kan kal a, Pulpit atanga Pathian Thu ngaihthlak reng ai chuan mahni a nunpui mai kha an ngaihdan te a lo ni tawh a. Chuvangin thusawi an ngaithla tha peih lova an mutthluk san ta thin a ni. Individualism hian min chim nasa tawh a, nakinah chuan inkhawm lova mahni a Pathian pawl mai duh tawk mai pawh an la awm ngei ang.
Heng bakah hian chhan dangte pawh ala awm thei ang. Biak Ina mutthluk hi inkhap theih pawh a ni lem lova, mimal tin te kha kan pawimawh vek a. A insum theih a, tum chuan a mutthluk loh theih bawk. Tin, hun hmangtu, a bikin thuhriltute pawh hi kan inpuahchah that a tul hle. Tunah hi chuan a tam zawkte hi chu kan inpuahchah tha lo tih a hriatreng a, phat mai aiah tiin mawhphurhna hlen duh vang a tlingtla ta mai mai hi an awm tih an thusawi atangin a hriat. Thusawite hi inzir theih a ni a, i inzir ang u. Tichuan Biak Ina muthlu kan lo tlem phah ngei ang.