Siktui angin kan luang za leh ang

“Inthen thei kan ni lo aw ka unau, 

Eng vang kan thawnthu tui ang a rual theih loh hi?

I tello chuan ka nung thei lo, 

Nang pawh i tlei thei bik dawn em ni le?

Hmangaihna kutin min lo kuangkuah la, 

Siktui angin kan luang za leh ang.”

LS Mangboi Lhungdim chuan a ram chhan tuma theihtawp a chhuah laiin Kangvai hmunah Meitei silaimu in a deng fuh ta hlauh mai a; Shillong lamah enkawl turin Aizawl lam rawn pan pui a ni a, Aizawl hmuna lo dawngsawng turin YMA lam pawh an lo inbuatsaih vek a. Amaherawhchu a hliam a nat em avangin kawng lakah Songtal khua an thlenin “ Zofate inpumkhat a siktui anga luang za leh tura” ngaihtuahna sengtu chuan a khawvel hun a lo hmang ral ta a ni. 

Zo hnahthlak unaute zingah inpumkhatna a awm theihna turin a tlangau a, Chhinlung chhuak unau kan ni ti chung si a “ kan thawnthu tui ang a rual thei lo ” hian a ti lungngai a. Tumah hi inthen hranga mal tlat tur kan nih loh zia te sawiin pheikhai ruala tangho dial dial turin ban phar meuhin min sawm lawm lawm a ni.

" Hmangaihna thlifim lo leng vel la, 

Ka unau sam ang kan inthen kumkhua dawn em ni ?

Ka kohna kum khua rei tawhin ban pharin kan rawn pan che;

Min chhang let tawh dawn lo em ni?”

A chang chuan a beidawngin a lungngai a, “min chhang let tawh dawn lo em ni?” tiin beidawng tak si leh beisei nei tak siin Zo hnahthlak tlang hrang hranga awm te chu a auva. Kan chenna tlang a hrang a, min chim tu an hrang a, hemi avang hian kan hawi her leh rilru puthmang pawh a dan phah a. Kan inunauna pawh a ti dal hial tawh a, kan inmihran thui ta hle mai. 

Amaherawhchu chhungrilah erawh Chhinlung chhuak, chun khat hrin leh unau kan nihna erawh a bo lo. Chu rilru chu tunah hian chawh thawhin a awm mek a, tlang hrang hranga cheng ten kan Inpui lam kan hawi tan mek a nih hi.  Chu chu a ni LS Mangboi hian a thlir a ‘ siktui angin kan luang za leh ang’ ti a a  au chhuah tak ni. 

Unau inchem har mai hi hnam damkhawchhuah nan leh zalenna atan a pawi tih a hmu thiam a, chu chu  a rilru kap tu ber a ni. A chhehvel a thlir a, hawina lam apiangah ‘keini, nangni” tih vek a ni a, lung muangin a awm lo.

“ Kan lenna ram hi muanna a awm lo,

Kan khawvel ramah hmun nghet tur kan la nei hrih lo;

Bawih leh sal anga tang mekin zalenna kan la hmu lo,

Doral ang mai maw kan nih le”

Zofate zalenna ni a thlir a, mahse chu chu chhungril tuiekna leh inchemharna avangin thleng theiin a ngai rih lo. Chu chhungril ngetna avang chuan Zofate chu bawih leh sal dinhmuna dingin a hmu a, unau hmelhai a awm ta mai chuan a rilru a ti na a; Zofate zalenna ram lo thleng tur daltu niin a ngai.

Zofate kan dinchhuahna tur leh Raltiang kan kaina turin pen chhuak a ngaihtuahna seng turin a chipuite min auva, “hmanlai phengphehlep nupa ianga, engmah lova khawvela leng kawi mai mai”  lova hnam tana ngaihtuahna seng turin min duh a. Zofate zalenna atana theihtawp chhuah a tang za turin Zo hnahthlak unau zawng zawngte min sawm a ni. 

“ Hma tiang kan nun kawng tur hi,

Thlirin lo dawn kir leh hram rawh” tiin Chhinlung chhuak Zofate chu min au lawm lawm a nih hi. 

Inthen thei kan ni lo aw ka unau.

- Prof. Malsawmliana

(7.9.2023)

Tlang sang leh phai tual te

Tlang sang leh phai tual te,

Ruam leh khawk rawk te; 

Phul hring leh thing lenbuang, 

Siamtu ropuina an tarlang. 

Chhum leh ruah, thlipui leh kawlphe

Khaw dur leh khawpui ri te;

Hringfa tan tihbaihawm chang awm mahse,

Siamtu ropuina tarlangtu an ni.

Nipui lo thaw in hringnun par a vul,

Fur khawhnawm ah hringnun a chul;

Chutin vangpui lo thaw in, sikni eng a mawi,

Siamtu khuarel a her dik e.

Chung leng leh hnuai leng,

Sirva hram thiam zawng te; 

Lung an rual za, 

Sismtu khuarel leilung ah. 

Ni 22.5.2023 ( Thawhtanni) hian Indigo thlawhnain Guwahati atangin Aizawlah ka thlawk chho a. Kan thlawhna chu vansanga a thlawh lai chuan tukverh atangin lei lam ka bih a.

Assam phai tual leh leilet pharh duai mai te, a karah lui a luang kawi ngiai ngiai te ka zuk hmu a. Tlang ram kan thleng a, tlang chhengchhe tak tak kara lui luang te chuan ngaihtuahna thui tak min neih tir a. 

Chutia hnuai thlir a leilung mawina ka hmuh lai chuan sir lehlam ka thlir leh a. 

A changin chhum chungah kan thlawk a, a changin chhum kan su bawk a. Heng thli leh ruah te, chhum leh kawlphe, khawpui ri te hi mihring tan harsatna thlen tu a nih chang awm thin mahse Siamtu ropuizia tarlangtu an nih zia te ngaihtuahnaah a lo lang bawk a. 

Chutianga ngaihtuahna ka kawm lai chuan he hla thu hi a lo lang a, thlawhna chhunga ka awm lai chuan ka ziak mawlh mawlh a, Lengpui thlawhna tumhmuna kan tum dawn chiahin ka ziak zo hman chiah chiah a. Hei hi chawhma lam dar 10:10 vel a ni awm e. 

Damna run mawitu lanu leng rualte

A mi leng ten an belh damna run,

Mawitu lanu leng rual te; 

Phei lai an vawr za lai,

Zaia chawi ka nuam e.

Sakhmel nui hiau parin, 

Seih min hlan e dam pui nan; 

Anka biah nem min hlan, 

Dam nan a tawk lua e. 

Hringmi ze tin lawina,

Damna run ni zel na’ng che;

Lanu leng rual phei lai vawrna, 

Hringmi leng damna run chu. 

Zankhat chu rinlawk loh deuhin ka chau ta deuh thut mai a, damdawiin kan pan a, min lo dahlut ta mai a. Ka inrin aiin ka lo chau chu niin zan thum lai mai Damdawiinah ka mu ta a. Damdawiina ka awm lai hian thil chi hrang hrang ka tawng a, ka awmna ward hi a thar leh damlo awmloh lai tak a nih avangin kan thawl hle a. Min viltu Nurse te pawhin min vil hneh ngiang mai.

Ni hnihnaah room danga awm te an rawn sawn lut a, na deuh leh na lo deuh te nen kan ri ta nuai nuai mai a. Thenkhat na buai avanga ven reng ngai te, thenkhat chau deuh buaipui ngai reng te, thenkhat nuih ti za deuh te an awm laiin ek chhuak chhen te pawh an awm bawk a. Chung zawng zawng karah chuan min viltu Nurse te chuan buai map lo leh phili miah lovin a nih ang tur diak diak hian damlo hrang hrangte chu hneh takin min vil reng a. Kei a damtha deuh ber ka lo ni bawk a, buaipui ngaiin ka awm lo bawk nen an che vel chu ka thlir nileng deuh thak mai.

Nurse fel tak tak, engtik lai pawha hmel hlim pu reng mai leh engmah tih hreh nei miah lo bula awm chu a hahdamthlakin kan dam phah sawng sawngin ka hria. Zan lamah nise zankhuain min vil a, kan nawmloh hlauvin min ngaihtuah reng a, an hna leh tihtur reng ni mahse inpekna a tel tlat mai kha a ropui ka ti a. 

Damdawiina ka awm laia ngaihtuahna leng vel chu ka chhuah hnuah heti hian ka han dah ve rawih ta rawih a ni. ( 30.05.2023)

THU LEH HLA HUANGA LEMCHAN DINHMUN LEH PAWIMAWHNA

-         Prof. Malsawmliana

Department of History

Govt. T. Romana College

 

 

 Tun \umah hian ‘Thu leh hla huanga lemchan dinhmun leh pawimawhna’ tih thu kan sawi dawn a, kum 2020-ah khan ‘Mizo lemchan tobul leh hma a sawn dan’ tih kan lo sawi tawh a. A thupui hi lemchan (drama) lam ve ve a ni na in kum kalta lama kan sawi kha chu Mizo lemchan \obul leh a hmasawn dan lam hrutna a ni a, Mizo literature lam kan hrut ngawr ngawr a. Tun \umah erawh hi chuan Mizo bik a ni chuang lova, thu leh hla khawvela lemchan (Drama) dinhmun leh a pawimawhna te, hlutna te leh a \angkaina emaw te kan hrut ve thung dawn a ni. A huang pawh a zau khawp mai.

A hmasa in Lemchan (drama/play) chungchang hi sawifiah hmasa ila a \ha awm e. Drama tih hi Greek \awng ‘dran’ a\anga lakchhuah a ni a, a awmzia chu ‘ a tih a tih’ emaw ‘chan chhuah’ tihna emaw a ni a. Dr H. Laldinmawia’n a lehlin danah chuan ‘Drama chu thawnthu, a taka chan chhuah hi a ni a, Mizo \awnga ‘lemchan’ tia kan dah hian a  phawk chhuak chiang hle a ni’ a ti. (H. Laldinmawia, Literature Lamtluanga, p.146)

Lemchan hi a \obulah chuan  Greek ho chin chhuah ni a ngaih a ni a, kum zabi 5-na lai vela an lo chin \an niin an sawi. Greek ho hi finnaah an sang a, khawvela hnam fing hmasa an ni a, an thu leh hla te hi tun thlenga zir tlak leh finna pai an la ni zel a ni. Greel lemchan ziak thiam, Aeschylus –a lemchan thawnthu ziak (historical play) ‘The Persian’ tih chu tunlai thlenga lemchan (drama) kan hmuh theih upa ber a ngaih a ni a, kum BC 472-a a ziak a ni. Tun thleng hian he lemchan hi sap\awngin mi tam takin an letling tawh nghe nghe a ni.

Lemchan hi chi hrang pathum-ah hlawm lian deuh deuhin an \hen a, chungte chu – Tragedy, Commedy leh Tragi-Comedy te a ni. (H. Laldinmawia, Literature Lamtluanga, p.171)

Tragedi chu thawnthu, a tawp lama lugngaihna a khar hi a ni mai a, hei aia hrilhfiahna thuk zawk pawh a awm awm e. Commedy tih erawh chu hlimna a thawnthu khar hi a ni mai bawk a, mi en tra lemchan a nih chuan a en tute hlim deuh leh hahdam deuhin an awm thei \hin a ni. Tragi-Commedy erawh chu a awlsam zawngin ‘lungngaihna leh hlimna inpawlh lemchan’ tiin an sawi leh mai a. Heng hlawm lian pathum hnuaiah \heuh hian chi hrang hrang in an \hen darh leh a, sawi sen pawh a ni awm lo ve. Chutihrualin heng hlawm lian pathum kan sawi tak te hi lemchan chungchangah chuan  khaikhawmtu tak tak an ni.

Litearture huangchhungah chuan lemchan hian hmun a awh zau em em a. Literature hi hlawm thum lian pui puiin an \hen a. Chungte chu – Hla/hlahril (poetry), Lemchan (Drama) leh Thu /thuziak (Prose) te an ni a. (H. Laldinmawia, Literature Lamtluanga, p.19) Lemchan hi hlawm dang pahnih – Thuziak (Prose) leh hla (Poetry) te ai chuan tunhma a\angin mipuiin an hlut niin a lang a, a chhan chu mipui hmuha chan chhuah \hin a nih vang a ni. A changtu ten an thiam phei chuan thlirtute mit a titlaiin a thawnthu in nasa takin nghawng a nei thei a ni. Hemi anih avang hian lemchan hi kan thil duh zawng chanchhuahnan leh thehdarh nan a \angkai em em a ni. Chutihrualin lemchan hi thuziak tluang hmanga ziah theih a nih rualin hla thu(poetry) hmanga ziah theih a ni bawk a. Chuvang chuan lemchan hi a chang chuan Prose huangah emaw Poetry huangah te pawh an lo dah \hin.

Literature huanga Thuziak (Prose) chh<ngah hian thawnthu (Novel) te pawh a awm a, thawnthu hi chu a nih angin a awm tawp a, miin an chhiar tura phuah a, chhawp sak a ni deuh mai a. Lemchan (Drama) ah chuan thawnthu kha mipui hma a chan chhuah theih tura duan a ni a, pho lan a ni zawk \hin.

Lemchan hian thil chi hrang hrang a fawmkhawm hnem hle a, hei hi literature \huang dangte aia a danglamna a ni. Lemchan chu chhiar theih a ni a, chan theih a ni bawk a. Chubakah mipui hmuha an chan pheih chuan mit a hmuh theih a ni a, ngaihthlak theih a ni leh zel bawk a. Hetiang a nih avang hian mite rilruah a thawk na bik a ni.

 

Mizorama lemchan thawnthu \obul leh hmasawn chhoh dan tawi te in han tarlang ila a \ha awm e.

Lemchan hi Mizote zingah chuan thil thar leh kan la chin ngai loh a ni a. Mizorama Zosap Missionary an rawn luh a, zirna sikul an kal pui hnuah Mizo zingah ziak leh chhiar thiam an lo pung chho zel a. Mizo thu leh hla pawhin nasa takin hma a sawn phah a. Hla phuah miin Mizo lengkhawm thlukin Pathian hla an phuah a, Zosapte pawhin an phuah a, an letling bawk a. Chanchinbu a chhuak bawk a, hei hian nasa takin Mizo thu leh hla hmasawnna leh \hanlennaah a thawhhlawk hle a ni.

Mizorama lemchan kan hriat hmasak ber chu kum 1912 Krismas zanah Aizawla Thakthing tlanga Zawlbuk-ah  Pu Zosaphluia hovin nu leh pa leh \halai ten lem an chang a. Hetah hian lemchan chi hrang hrang - Sap mikhual leh tawnglettu, Krisma hre leh hre lo, Kristian leh Kristian lo inbiakna, Sap putar leh Mosolman putar lem inbiakna, Khasi dialogue, Mizo leh vai inthuam dan sawiselsakna ve ve, Bawrhsap lem leh thuchhe neitu 2 leh Rahsi lemchang an chang a. Hei hi Lemchan chhuah hmasa ber a ni nghe nghe a ni. Hemi \um hian mipui pawh an \hahnem hle a, an sawi danin mi 600 vel an kalkhawm a ni awm e. ( B. Lalthangliana, Mizo Literature, 2005(2nd ed) p.157)

Heng lemchan te hi tu ziak nge kan hre lo na in lemchan \ha tak tak hmuh tur a awm hi a chhinchhiah tlak hle a ni. A kum leh zelah pawh Krismas zanah chuan lemchan hmanga intihhlimna hi Aizawlah chauh ni lovin thingtlangah pawh an ching chho ta zel a. Hmun thenkhatah phei chuan Biak Inah te hial an chang bawk.

Lemchan chungchang zirbingtu hmasa, Prof. Laltluangliana Khiangte chuan, kum 1912-1924 inkar hi lemchan zungkaih hun a ni e” tiin a sawi. (B. Lalthangliana, Mizo Literature, 2005(2nd ed) p.361) Harhna tum thumna (1919) in Biak In leh Kohhran huangchhunga lemchan chan \hin chu a nawr tawm ta a, hemi avang hian lemchan lam pawh a \han a \hut phah hle a ni.

Kum 1925 ah Ch. Pasena buatsaih “Heroda chawimawina” tih chu Aizawl Boys ME School ah an chhuah leh a, heta \ang hian lemchan chu a rawn par chho leh \an ta a ni. Chhinchhiah tlak tak chu, heng lemchan thawnthu ziaktute hian an ziak satliah ngawt lova, chan theih turin an siam a, mipui thlir turin hmun remchangah an chang \hin a ni. Engemaw tih pui hun leh YLA/YMA thiltihnaah te mipui kalkhawm tihhlimnan lemchan hi an chhuah fo \hin.

Mizo literature huanga lemchan \hanchhoh zel dan leh hmasawn zel dan erawh tun \umah hian kan sawi hman dawn lova. Kum 1925 chho a\ang hi chuan tibuaitu awm lovin lemchan hi a \hang chho ta zel a, ziaktu pawh an pung zel a, vawiin thlengin Mizo thu leh hlaah hum pawimawh tak a la luah ta zel a ni.

Chutihrualin lemchan thawnthu hi mipui hmuh tura chan a nih loh chuan a nih tur ang a ni pha lova, chhiar ringawt hi chuan a hlutna hi a pho lang chiam lo niin a lang.

Lemchan pawimawhna \henkhat han sawi leh dawn ta ila.

1.      Sap pachal, hla phuah thiam (Poet) leh thu ziak thiam lar tak, John Dryden chuan lemchan hi ‘mihring nunphung dik, tak tarlanna a nih avangin mite tihhlimna leh mite thil dik zirtir nan a pawimawh a ni’ tiin a sawi a. A hma lama kan sawi tawh angin Lemchan chu thawnthu, mi ten an lo thlir theih tura chan chhuah a ni a. A thawnthu kha eng hawi zawng pawhin a ziah theih a, tunlaiah phei chuan mite zirtirna tur thu \ha tak tak te an ziak a, chungte chu lemchangtu zei leh thiam tak tak ten an rawn chang a. Mipuite rilru a hneh hma a, inzirtirnan a \angkai em em a ni.

2.      Sap pachal, khawvela thuziak thiam lar hmingthang, William Shakespeare chuan ‘lemchan hi mihring ze dik tak tarlanna darthlalang a ni’ a ti. Thawnthu ziah hmangin mihring nun zia kha ziah a a ni a, hmanlaia an awm dan leh nunphung te, tunlai khawvel nunphung te an tarlang a. A tak ang thei berin an chang \hin a, Entirnan, naupangte pawh a inkhualtelem chang hian an nu leh pa lemah te an chang a, an nu te ^n dan leh an thil sawi \hin te, pa ber ruih dan te, chhungkua awm dan hrim hrim kha an zir \hin a. Chu lemchan a\ang chuan an chhungkaw nunphung kha chiang takin a lang a, an chhungkaw darthlalang \ha tak a ni. Chutiangin lemchan hi hring nun phochhuahna a nih avangin a pawimawh em em a, thu leh hla huanga hlawm lian dang ai chuan mihring nun a tarlang chiang ber niin sawi thin a ni-

3.      Lemchan hi a phuahtu hun lai mil zela phuah a nih avangin engemaw chen chu a phuah hunlai chanchin zirnan a \angkai \hin. Entirnan, Shakespeare-a lemchan tam tak hi a hunlaia khawtlang nun behchhana a ziak te an nih avangin hetih hun laia an khawtlang nun leh mipui mimir nun te thil tam tak a hriat theih a. History zir nan pawh a \angkai em em a ni.

4.      Lemchan thawnthu ziah hi thiam bik an awm a, thu leh hla thiam nazawngin an ziak thiam vek lova. Thu tluang (essay) ziah ngawt ai chuan a har deuh bawk a, a ngaihnawm leh hmuhnawm tur phei chuan ngaihtuahna hman nasat a ngai hle a ni. Kan sawi tawh angin a hun laia khawtlang nun leh mimir nun phung nena inmil te, an \awng tualleng hman dan te thlenga inmil tura ziah a ngaih avangin a ziaktu hian a ziah hma in heng zawng zawng hi a zir hmasak vek a ngai \hin a. Chuvangin lemchan thawnthu ziah hi a hautak a, thiam bik nih a ngai. Lemchan thawnthu ziaktu ten an themthiamna (artistic skill) an pholanna remchang a ni.

5.      Lemchan thawnthu te hian hma a sawn chho zel a, tunlaiah chuan mipui hma (theatre) a chan tura ziah aiin Film-a chan theih tura ziah a nih tak vek avang hian lemchan thawnthu ruangam leh a pianhmang pawh a danglam chho ta zel a. Tunlai khawvela mi lar leh hmingthang ber berte hi lemchang thiam (actor) te an ni vek mai. Nitin mai hian film \ha tak tak a chhuak reng a, an lar phahin an hausak phah em em a ni. Hengte hi lemchan vek a ni a, amaherawh chu Drama kan tih tak nen chuan a inhrang leh hret awm e.

 A tlangkawmna atana ka sawi duh chu, lemchan hi Thu leh hla (literature) huanga pawimawh berte zinga mi a nih piah lamah mihring nun tarlanna darthlalang a ni tel bawk a. History zirna atan thil pawimawh tak a ni bawk a. A tam zawk hi thawnthu phuahchawp mai nimahse ‘hun’ behchhana ziak a ni tlangpui a, a \hen phei chu hman lai thil thleng denchhena ziak (historical play) a ni bawk a. Hei hian chanchin hlui (history) zirnaah nasa takin a pui \hin a ni.

Lemchan hi zirtu \henkhat phei chuan Literature ze \huang zingah a chungnung ber niin an sawi nghe nghe a. Hetiang khawpa pawimawh leh literature ti hlutu a nih avang hian Mizo thu leh hla a \han zel theihnan leh a changtlun zel theihnan lemchan (drama) ziah lamah hian ziak miten \an i la thar zel ang u.

Ka lawm e.

 

( Ni 9.3.2023-ah AIR ah Record a ni) 

Zoram Harh Rawh (AIDS natna a hluar zel e)

 

Prof. Malsawmliana

 Kum kaltaah khan YMA leh Mizoram State AIDS Control Society (MSACS) chuan kan rama natna tihdam theihloh ni a ngaih HIV/AIDS lo hluar zel a kiam theihna turin beihpui thlak an \an a. Chu beihpui hmingah chuan “Zoram Harh Rawh” tih hi hman a ni. Chu beihpui chu tunah hian kal pui chhoh mek a ni a, natna tihdam theih loh AIDS in min run zel avang hian tha thlah lova beih reng a ngai reng a ni.

Sawrkar Report ah te leh Chanchinbu hrang hranga kan hmuh \hin angin tunhnaiah Mizoramah hian HIV/AIDS hi a hluarin a pung chak hle mai a. India ram state hrang hrangte nena khaikhin phei chuan kan state hi a sang ber zinga mi kan ni hial mai. Hetiang a nih avang hian Mizo mipuite hian bengsika kan ngaihtuah a, heti em em kan nih lohna tur hian hma kan lak a \ul. Kristian state tan phei chuan a zahthlak tel bawk.

“Zoram Harh Rawh” beihpui thlak mekah hian tlawmngai pawl leh Sawrkara a hmalatu te chauh ni lovin mimal, pawl, zirna in leh kohhran te pawhin kan tih theihna kawngah hma kan lak \heuh a pawimawh.

HIV/ AIDS dona kawngah hian awmze nei zawk leh hlawk zawka kal pui dan kan zawn thiam a \ul a, sum leh pai hmang vak si a hmalakna sawt vak si lo hi a awm theih a. Entirnan, tunhma in AIDS dona hmanrua atan Football leh infiamna dang Tournament te kan buatsaih hluai a, mahse a hlawk tum angin a hlawk \hin lo. Thalaiin AIDS lam aiin infiamna lam kha an rilruah an dah lian zawk \hin a. A sawngsawhlawt lem lo.

Engpawhnise, a pawimawh ber chu a kaina kawng hrang hrangte ti tlem tura inzirtir uar leh zual a \ul.

1. Kohhran huang chhungah Kristian chhungkua inzirtirna uar zawka kal pui a ngai a, Sakhuana kan lak thutak lehzual a \ul bawk. Kohhran hn hmala thei ber tur a ni bawk a, Sunday School a nei \ha a, theihtawp a chhuah a ngai. Kohhran \halaite zingah uar taka kal pui a \ul reng bawk.

2. Zirna In (Primary school a\anga University thleng) ah ruihhlo chungchang te, mipat hmeichhiatna chungchangte uar zawka kan sawi fo a ngai.

3. Tlawmngai pawl hrang hrang ten theihtawp kan chhuah a ngai a, a hma la thei tur ber kan nih avangin kan kutah thui tak a innghat. Khawtlang nun siam\hat kal pui mektu kan nih avangin kan mawhphurhna a lian hle.

4. Political Party te pawh hian hetiang lam inzirtirna hi kan nawhphurhnaah kan dah ve a \ha khawp mai. Thusawina hun leh hmun nei \ha ber, mipui pun khawm zing ber an nih avangin Political campaign an neihnaah hian \awngkam 2/1 in han sawi ve thin se, awmzia a awm ngei ang.

5. Pathian thu hriltu leh milar, zaithiam te hi a \angkai hlei hlei an ni a, anni hian theihtawp an chhuah a ngai bawk.

6. Mipui rilru sukthlek siam\hat (moral reform) hi a kan hmalakna tur pawimawh a ni bawk. Kan ngaihhlut zawng te hi kan siamrem hret hret a \ul mang e.

Mizorama HIV/AIDS kai zingah \halai kum 15-34 an \hahnem hle a, tunlaiah hian ruihhlo a\anga kai aiin Mipat hmeichhiatna a\anga inkai an \hahnem tawh zawk bawk a. Hemi in a lantir chu kan \halaite zingah mipat hmeichhiatna hman khawlohna a hluar hle tihna a ni a. Kohhranah report lut zel phei se chuan thunun tur an \hahnem ngawt ang le.

Ruihhlo pawh a hluar chho zel a, tunah hian tih tak zeta do chu YMA leh veng khaw tina tlawmngai pawl te hi an ni mai a, chu pawh voluntary vek a ni a. Sawrkar lamin indaih lo takin hma a la zel bawk a. Ruihhlo hi man sen loh a awm a, khawlaiah meng mang lova kal chhe chhe hmuh tur an tam a, ruang chhar a pung viau bawk. Tunhnaiah ruihhlo a hluar leh tak avang hian ruihhlo a\anga HIV/AIDS kai hi an pung thar leh an ti bawk.

Manganthlak khawpa HIV/AIDS in min run tak avang hian tumah bang thei kan awm lova, kan phek \an a ngai ta a nih hi. Kan \anrual chuan awmzia a nei ngei ang.

Zoram Harh Rawh.

CHHAKTIANG KAWL RAWNAH

 - Malsawmliana

“Aw Zoram ka ngai em a che,

                                    Nang lo chuan lawm a kim thei lo;

                                    Dar ang tawn leh ni her chhuak thuai se,

                                    Thinlai dam ten len ve maw ka nuam e.”

 

            Khawthlang lama ni tla tur chu thlirin a hawi vel ruai a, rilru suangtuahna kawmin,

                                    Chhaktiang kawl rawnah hian leng mah ila,

                                    I sakhming sawi reng kan bang thei si lo;

                                    Ka pian ka seilenna ram tiin,

                                    Dawn lungrukah nghilhni i awm thei lo.

 

a ti vawng vawng a. A awmna a\anga Zoram lam ni a a ngaih lam chu thlirin khaw dang reng a hawi thei lo. A ngaihtuahna vak vel chuan Than tlang leh Len tlang vel te a hrut kual a, hmanlaia Lasi lalnu Chawngtinleri tual chaina, Buannel ram te pawh a hrut pha a. Buannel ram a\anga khawtlang lama Zoram lo lang te pawh a hmuh hmaih bik lo.

            A awmna a\anga ram hla tak pawh ni lo, a ram ngaih em em tlangram ‘chhawrpial run’ chu hmuh leh hlan a ngahkhlel tak zet a. Kum engemaw zat kalta ah khan he ramah hian a lo tualchai ve tawh a. A ni, a piang nghe nghe a nih kha ! Naupang harh vang tak mai a ni a, chhun lamah chuan Inah hian a awm hman meuh \hin lova. Naupang harh tih takah \hiante nena infiam vel kha nuam a ti a, zan lamah nise pawnto nuam ti ber pawl a ni bawk a.

            Khatih hun lai kha chuan Zoram hi a nuam a, ei leh barah pawh harsatna a awm lo. Mitin mai chu an hlim sar reng mai a, thingtlang nun phei chu a awhawm hle zawk a ni. Khawpui lamah chuan hmasawnna te a lanchhoh \an tawh avangin hmanlai zonun kha an kalsan chho hret hret tawh a. Thingtlang lamah pawh Zosap te hmel hmuh tur a awm leh phauh \hin a, kristian leh kristian lo an in pel chho \an tawh bawk.

            Chutia muang taka an awm lai chuan khawvel indopui thawm a lo ri \an a. Hmanah Indopui pakhatna lai vel khan Mizo tlangval sang rual te chu France ramah an lo kal tawh a. Indopui pahnihna thawm a han rik chhoh takah hian Mizo tlangval engemaw zat chu sipaiah an lut leh ta reng a, Indopui zawh hnu thleng pawhin sipaiah mi engemaw zat an lut chho reng ta mai a. Mizo te khaw hawi a zau \an ta. Mi engemaw zat chu khawchhak lamah Burma sipaiah an lut a, Sipaia a \ang ni lem lo pawh Zoram a\angin mi engemaw zat Burma ramah an pem chho bawk a. Indopui a lo reh hnu pawhin \henkhat Zoram lamah let leh bawk mahse a tam zawk chu an cham hlen ta a ni. Sipaiho pawh engemaw zat chu an awm hlen a. Indopui a reh hnu kum 20 vela Zoram a buai lai vel pawh kha mi engemaw zat chu an pem chho bawk a ni.

            Ani pawh chu Indopui thawm a han rik chiah khan engtia awm tur nge ? tiin a in ngaihtuah a, A tawp a tawpah Burma sipaiah a lut chho ve ta tawp mai a. Sipai nunchan zir chu nuam a tiin sipai uniform nena Silai han pai velte chu nuam a ti chho ta viau mai a. Amaherawhchu, kum engemaw zat hnuah pawh a kalsan tak, a hmangaih Zoram chu a theihnghilh ngai lo. Engtik ni-ah emaw chuan ka la haw leh ngei ang a ti \hin. A sipai \hiante zingah pawh Zoram nawm zia leh khawsak phung \hatzia te a hrilh ve luam \hin a.  A hnampui sipaia lut ve te leh helai vela pem chho ta te nen pawh an inkawmho chang chuan Zoram lam hlir hi an sawi \hin a. Sipai hna rinawm taka thawk thei tura turtu leh nawrtu chu he rilru chiah hi a ni. Kum engemaw zat hnuah chuan nupui fanaute pawh a nei chho ve ta hial a, in leh lo pawh a din ta hial mai. A hma a a tum angin a awm thei ta lova, rilru nghet vak lo chungin ram pawnah awmhmun a beng bel ta a ni. Tum angin awm thei tawh lo mahse a theih ang tawkin ngaihtuahna a seng ve \hin a. Helai vela Zohnathlak awmhote chu kawm kualin Zozia vawng nung zel turin a fuih ve \hin a.

 

                                    Kan ram, kan hnam lo san ve na turin,

                                    Ka nun, ka neih, ka chakna zawng hlanin;

                                    I tan hlim ten ka lo dodai zel thin

tih chu a sipai \an lai a\ang tawhin a takin a nun pui chho ta zel a ni.

            Ramdanga awm an nih avangin a ram mi te leh hnam dangte nen inchenpawlh loh theih a ni lova, chu chuan harsatna tam tak a thlen fo \hin reng a. An ram retheih avangin ei leh bar zawn te pawh a lo harsa chhova, khawsak a awlai lo hle mai. Naupangho pawh nula tlangval an rawn ni chho \an a, chung \hangtharho te chuan a ram mi te nunphung leh khawsakzia pawh nasa takin an chhawm chhova. An ei leh in a danglam lova, hei vang hian an hmelah pawh tam tak chu a ram mi emaw tih tur khawp te pawh an awm hial mai. Chu chuan harsatna a thlen ve bawk \hin. Amaherawhchu, zo zia chu a theih ang angin an inhrilh a, an la chhawm nung viau tho bawk a. A khat tawk hian Zoram lam a\angin mikhual an nei ve reng a, an ni lam pawh  an zin thla ve reng tho bawk a. An awmna hi thingtlang khua ni mahse in 500 bawr an ni a, sumdawnna te pawh an bei nasa hle. Khawpui dang nena inkalpawhna kawng pui a \ha a, hei vang hian zin veivah pawh a awlsam phah em em a ni.

            Helai rama a awm a\anga kum 40 vel a liam ta tihah, \umkhat chu Zoram lama chhungte tlawh turin rilru a siam a. A theih ang tawkin a inbuatsaih a, helai vela thilsiam chi hrang hrang te pawh Zorama lama tihral turin a keng bawk a. Kum 40 chuang a hmuh tawh loh avangin a phur hle a, a awmloh chhungin engtianga nasa in nge Zoram in hma a sawn ang ? tiin a ngaihtuah a. A suangtuah nasa thei hle a,  a chhungte hmuh hlan a nghahhlelh ai mahin Zoram leilung rah hlan a nghakhlel zawk hial awm e. A veivah lohna a rei tawh bawk a, kawngpui pawh a lo \ha tawh hle a, motor hlirin a kal a. Kum 40 kalta vela ke hlira an kalna lai te a han hmuh chuan a hnuk te pawh a ulh lek lek zawk a, mahse a insum hram hram a. Tun \uma a zin hi chu  rei deuh hlek cham pawh a tum rilru a, Zoram politics thlir pah deuh te pawh a duh tel bawk a. Remchang a awm phei chuan chhungkua a pem thlak leh te pawh a rilruk hial a ni. Chuvangin ngaihtuahna a seng nasa a, hlauhthawn erawh a nei. Khawchhak lam a\angin mi engemaw zat Zoram lamah hnathawh tur zawngin an chhuk nasa a, an zingah hian Zo hnahthlak engemaw zat awm mahse a tam zawk chu hnamdang, Kawl te an ni hlawm a. Hengho hian Zoramah harsatna an thlen tih te pawh a hre vek a, ram mipuiin hnawk an tih thu te pawh a lo hre bel viau tawh bawk. A ni reng a, heng hnamdang lo awm ve te hian nun an ti ral\i a, nasa takin sualna an thlen a, ram hmelhmang an ti danglam bawi(h) bawi(h) mai a. Khawchhak lam a\angin ruihhlo an la lut nasa a, chu chuan \halai nun a suat nasa em em a, ram rorelna leh khawtlangah harsatna lian tak a rawn thlen ta a ni.

            Heng zawng zawng hi a zinkawng tluanin a ngaihtuah a, a thin a rim \euh mai a. Anni ho, khawchhak lam a\anga chhuk thla, avang hian khawchhaka Zo hnahthlak chengho pawhin harsatna an tawh phah fo mai si a. Tunlai thangthar tam zawk hi chuan khawchhak lam a\anga rawn zin thla zawng zawng hi chu hnamdang hmuhin an lo hmu tawh bawk si nen. Hei tak hi a ni a hlauhthawn chu.

            Tluang takin Zoram a thleng thla a, chhungkhat te pawhin an lo hre mumal tawh lo lehnghal a. Naupang lam phei chuan an hre lo leh zual a. An awmloh chhungin an chhungkua pawhin chhiat an lo tawk nual a, hmuh hlan a nghahhlelh ber mai a pi leh pute chuan thlanmual lamah run an lo nghak tawh bawk si. A lunghlui te pawh a leng hle mai. Naupangho bulah chuan a tei ta vel mai mai a, a tum ang pawhin a awm thei ta lova. Cham rei a tumna zawng zawng pawh chu sut leh mai te pawh a duh hial a, mahse a hmangaih Zoram chu chuti maia haw san chu a tum hauh lo. Khawlaiah a’n leng chhuak a, engkim mai hi a lo danglam vek tawh a. An khua a\ang chuan Zawlkhawpuiah kar khat vel cham turin a chhuk thla leh a, chhungte pawh a neih lem loh avangin veng hmawr deuhva Hotel remchangah a thleng a. Sipaia a luh hma khan \umkhat chu Zawlkhawpui hi a lo hmu tawh a, chu bak chu a hmu leh ta reng reng lova. Mipui nunphung pawh a danglam hle a, khawsak a changkang hle tih pawh a hmu bawk a.

            Zawlkhawpuia a cham chhung hian rinloh takin harsatna a tawk ta tlat mai. A thlenna Hotel awmna vengah chuan khawchhak lam mi avangin harsatna a thleng ta. Hei vang hian veng mipuite chuan an venga khawchhak lam mi awm zawng zawngte chu chhuak turin an ti a. A thlenna hotel te pawh an rawn lut ta zel a. Amah pawh chu a rinloh tak maiin an rawn kawk ve ta chat mai le !! Khawchhak mi (hnamdang) niin an ngai a, a awmna khua a sawi chuan Burma rama awm a lo ni bawk si nen. Mahse Mizo a ni tlat si ! A han insawi ngial pawhin an awih lo tawlh tawlh emaw tih turin an vaw lo chauh mai a. Tih theih dang a neih tak loh avangin hnukulh \euh chungin a insiam a, an khaw lam pan turin motor remchang a zawng ta ringawt a. A rilru a na ngei mai. A rilrua suangtuahna zawng zawng te chu vawmbo ang duakin a reh nghal vek a, a hmangaih Zoram chuan hnutiang a chhawn ta a ni.

                                    Mahse vangkhua let a fan leh ni chuan,

                                    I chhunga lungduh naufa leng zawngten;

                                    Khawchhak mi ti a min selin,

                                    Sirah dam ten puan ang min lo hnawl e.

 

tiin a hmangaih Zoram chu a thlah ta a ni. Hemi zan zet hi chu mahni In lam pana haw mahse nise Motor chhungah a \ap a ni ber mai. Nidanga mahni In lam pana a haw a hlim theih \hin nen, tun \um zet zawng a dan a dang ta. Khawvela a thil tawn hrehawm ber pawh a ni awm e. A pianna leh seilenna ram, hei lo chu ram kan nei lo a lo tih ve \hinah chuan ama ngei pawh a hnawng ta si a, hriat thiam har a ti khawp mai. A awmna bawr vela Zo hnam tan ti a a lo beih ve na zawng zawngte a han ngaihtuah let phei chuan a inseh ruh hi a ni ber mai a. Thangthar lo awm zel ten tunhma hre chang lo leka an ngaihtuahna an hmang zau ta lo chu pawi a ti a, a ngei ru hluah hluah bawk a. Chung a thil lo tih ve tawhte chu mumang mai an chang zo ta ni berin a hria..

                                    Aw a na, tuar thiam zawng a har,

                                    Hrilh ka hai lunglam ka lo vai;

                                    I tan ka tuarna leh hlimni zawng,

                                    Zantiang tawnmang mawl mai an chang zo ta.

a ti ta vawng vawng mai a ni..

            Hetiang renga kan awm a nih chuan eng tikah nge Zohnahthlak insuihkhawm leh hun hi a lo thlen ang ? tiin a ngaihtuah ta zel a. Capt. LZ Sailo in Zoram chhehvel Tripura, Manipur, Burma a Zo hnam awm te a tlawh kual vel laia a rilru putchhuak hla te kha ropui a ti a, Mizo an nih pawh lo inhre tawh mang lo te kai harhin rinawmna chibai a buk lawm lawm a-

                                    Unaute u in dam tlang a lawm maw ?

                                    Rinawmna chibai in dawng thei em ?

                                    Chhinlung chhungkhat Zoram chhehvel ami te,

                                    Insuihkhawm leh zai i rel ang u.

tiin a sawm lawm lawm mai a nih kha.

            Mahse tunah rih chuan kan rilru puthmang te, khawsak phung te leh chin \hin te siamrem a lo ngai tawh a, hei hian hun engemawchen chu a awh ngei dawn a. Chumi hnuah chuan Mizoram leh a chhehvel a Zo hnathlak awm zawng zawngte hi tumah hnamdang mi, ramdang mi intih a awm tawh lovang a, lungrual takin kan leng za tawh ang. Hun kha leh chen kha kan lo inhmu tawh lova, in lo dam maw ? rinawmna chibai inbuk ang u le? tih chu kan thupui a lo ni tawh ang.

                                    Unaute in dam tlang alawm maw ?

                                    Rinawmna chibai in buk ang le !

                                    Chhinlung chhungkhat Zofa kan nih hrerengin,

                                    Insuihkhawm leh zai i rel ang u.

tiin a suangtuahna chu kalpui zel a, a hmangaih Zoramah hnawng mahse engtik hunah emaw chuan Chhinlung chhuak Zofa a nihna chu an la hrechhuak ngei ang tiin insuihkhawm leh hun nghak turin chhaktiang kawlrawn lamah chuan a liam chho leh ta nge nge a.(2007,Shillong)

JAMES DOKHUMA THAWNTHU BU (NOVEL) TE THLIRNA

 - Prof. Malsawmliana

Tun tumah hian Mizo zinga ziaktu lar, Thawnthu (Novels) ngaihnawm tak tak ziaktu, Padma Shree hial dawngtu James Dokhuma thawnthu ziakte thlirna hun kan hmang dawn a ni.

          James Dokhuma hi June 15, 1932 khan Sialsuk-ah a piang a, a pa chu Hrangchina (Chhakchhuak) leh a nu Kapkungi (Ralte Siakeng) a ni. Unau 13 an ni a, kum 1960-ah Chhuanthangpuii, Kulikawna nen an innei a, fa paruk an nei. Zirna lamah chuan Pawl 5 thleng chauh a zir a, hemi hnu hian kum 15 a nihin Sipaiah a \ang a. Sipai a \an chhung hian Hindi leh Gurkhali \awng a thiam hman hle a, Education Instructor ah te a \ang hman hial a ni. Sipai a\anga a ban hnuah kum 1954-ah St.Pauls High School ah Hindi & Vernacular zirtirtu ah a \ang zui nghal a, chumi hnuah Aijal Community Development Block-ah Sanitary Inspector hna a thawk leh a, chutah kum 1960 ah Hualtu Middle School ah zirtirtu hna a thawk leh bawk. Zoram buaiah khan MNF zawmin a rammu a, sipaiin manin kum engemaw zat Lungin ah a t^ng leh bawk. Jail a\anga a chhuah hnuah Political party te zawmin a inhmang chho veleh a, a hriselna a lo tlakhniam chhoh hnuah politics chu a chawlhsan ta a ni. Khawtlang rawngbawlna hrang hrang –YMA, VC ah te a inhmang a, Kohhran lamah pawh Salvation Army khaipa te zinga mi a ni. Tichuan March 10, 2007 ah khawvel a lo chhuahsan ta a ni.

 

            Mizo pa ah chuan pumrua lamah vantlang chung lam leh hleitling a ni a. Tawngkam a  thiam a, thu leh hla thiam, hla phuah thiam, thuziak mai ni lo a sawi pawh thiam, rualkawm thiam leh fiamthu duh tak mai a ni a. A hriatrengna a \ha a, mi thusawite hi a sawi chhawng thiam a, an sawi ang angin a sawi chhuak leh vek thei a, a bula awm a nuam hle bawk.

           

            Lehkhabu hi 42 a ziak a, hengte hi thawnthu (novel) leh Mizo hnam chanchin, mimal chanchin, Kohhran chungchang, Mizo \awng chungchang leh thu ngaihnawm tak takte an ni a. Hla (poetry) hi 40 chuang, Essay leh Article hi 400 chuang a ziak bawk a ni.

 

            A thuziak avang hian chawimawina \hahnem tak a dawng tawh a, chung zingah chuan – Lelte Best Writer Award (1986, 1988, 1991), Academy Award (MAL, 1983), Padma Shri (1985), Best Writer Award (AMSA, 1991), Bhasha Samman (Sahitya Akademi, 1997) te a tel a, hei lo pawh hi engemaw zat a dawng tawh. Kum 1997 khan University of California, USA chuan Honorary Doctorate Degree a lo hlan tawh bawk.

 

             James Dokhuma hian thawnthu ziah a thiam em em a, a kutchhuak zingah hian a tam ber chu thawnthu (Novel) an ni a, chungte chu han sawi diat diat ta ila :

     1. Rinawmin (1970)

     2. Khawhar In (1970)

     3.  Thla Hleinga zan (1970)

     4. Tumpang chal nge Saithangpuii (1981)

     5. Hmangaihna Thuchah (1982)

     6. Irrawady Lui kamah (1982)

     7. Good bye, Lushai Brigade (1983)

     8. Kimoto Syanora (1984)

     9. Gabbatha (1989)

     10. Silaimu Ngaihawm (1995)

     11. Thla Hleinga zan Part –II (1999)

     12. Kham kara senhri (2005)

 

            James Dokhuma hian thuziak hi a awlsam viau niin a lang a, chutih laiin a thuziak ho hi a tlangpuiin thui tak a ni ngai lem lo bawk. Hemi chungchangah hian Pu R. Lalrawna (Gilzom Press neitu) chuan ‘Adult Education Department-a ka awm lai khan Meichher chanchinbu kha kan chhuah \hin a, thuchhuah tur neihloh chang hian rawn ziak teh a, kan tia. Awlsam te hian a tukah khawl chhut thlap hian a rawn dah theih mai zel a,’ tiin a sawi. Tawngkam a thiam a,  Mizo \awng a thiam bawk a, thusawi pawh a thiam bawk. Pu R. Lalrawna chuan ‘ Pu Doa chu, a thusawi turte hi a inbuatsaih lawk vak ngai lova, a ngaithlatu turte mil tawk zelin a sawi thiam a. Fiamthu pawh a thiam a, mi thusawi sawi chhawn leh te hi a thiam em em a, an sawi dan aimahin a sawi chhawng thiam,’ tiin a sawi.

 

A thawnthu ziah hrang hrangte hi hetiang hian han thlir thuak thuak ta ila :

 

1. Amah hi khawvel indopui 2-na lai vel, kum 1947-1952 chhung khan Sipaiah a \ang a, sipai a \an laia a hun hman \hin dan leh sipai nun hian nasa takin a nunah bu a khuar a. A thawnthu ziak \henkhat hi sipai chanchin leh indonaa innghat an ni hlawm. Entirnan, Thla Hleinga zan, Irrawady Lui kamah, Good Bye Lushai Brigade leh Kimoto Syanora te chu indpui 2-na behchhan thawnthu an ni a. Hemi bakah hian  Hmangaihna Thuchah tih chu kum 1971-a India leh Pakistan indo behchhan thawnthu a ni thung.

            Sipai a\anga a ban hnu hian MNF rammu zawmin ramhnuaiah Independence sualin a lut ve nghal a. Kum engemaw zat chu ram tan a sur a sa hnuaiah a hun a hmang a ni. A thawnthu ziak zingah Rinawmin, Silaimu Ngaihawm leh Kham kara senhri tih te hi Mizoram buai kan tih mai, MNF in Independence an sual avanga India sawrkar nen an indo, behchhan thawnthu a ni thung.

            Heng bakah hian Khawhar In leh Tumpang chal nge Saithangpuii tih hi nula leh tlangval inngaihzawnna lam thawnthu tho a ni a. Tumpang chal nge Saithangpuii thawnthu hi hmanlai kan pi leh pute hunlai behchhan thawnthu, Mizo khawtlang nun behchhana a phuah a ni a, hetih lai hian Khawhar In thawnthu hi tunhnai deuh, Aizawl khawpui pawh a indin chhoh hnu behchhana ziak a ni thung.

             Tin, Gabbatha erawh hi chu Bible behchhan thawnthu a ni thung a. Isua Krista ruang hlawmthu, Arimathai khaw mi Josefa fanu, Kristian nula rinawm tak leh Rom sipai hotu, Kristian tlangval fel tak inngaihzawnna lam thawnthu a ni. Kristian Love story lar, Ben Hur, Quovadis te tluka Kristian Love story \ha leh ngaihnawm a ni.

 

2. James Dokhuma thawnthu te hi a ngaihnawm a, chhiar a nuam em em hlawm a ni. A thawnthu ziak zinga 9 (pakua) te hi nula leh tlangval inngaizawng chanchin, mahse a tawpa lungchhiathlak taka tawp chi (tragedy) an ni a. An thawnthu kalhmang pawh a inang viau hlawm a ni. Entirnan, Silaimu Ngaihnawm thawnthu ah hian Sanglura chu sipaiin an kahlum a, a ngaihzawng Ramliani lungleng lutuk chu a tawpah thi ta hial a. Chutiangin Rinawmin thawnthu ah pawh Lalrozuala sipaiin an tihhlum avanga a ngaihzawng Ramhluni khawhar lutuka a awm tak dan thawnthu a ni bawk. An kalhmang a inang hle mai.

            Hetih lai hian a thawnthu pahnih te hi chu a hlimawm zawnga tawp (comedy) an ni thung. Thla Hleinga Zan thawnthu kha a chhuak hmasa ah chuan lungchhiatthlak zawnga tawp a ni a, amaherawh chu kum 1999-a part-II a ziah leh ah khan a changtute –Kap\huama leh Rozami te chu an vanglaia innei thei ta lo kha engtin tin emaw a tawpah an innei ta a. Hlimawm takin he thawnthu hi a tawp leh thei ta a ni.

 

3. James Dokhuma thawnthu hrang hranga thil langsar tak mai chu, a hma lama kan sawi tawh angin, heng thawnthu te hi nula leh tlangval inngaihzawnna lam thawnthu deuh vek a ni chungin inngaizawngte hi an innei lo deuh vek thung a. Tumpang chal nge Saithangpuii thawnthu ah hian Fehtea leh Saithangpuii te hi tluan tling taka inngaizawnga innei zui ta awmchhun an ni awm e. Heng thawnthu a inngaizawngte an inneih lohna chhan hi chu hmangaihna kawng chhuk chho avanga sukuk ta leh rinawmloh avang ni lovin, indona avang a ni tlangpui. Indona avanga nun an chan avang te, hnamdang nupui pasala neih an duh chiah loh vang te pawh a ni awm e.

 

4. A thawnthu hrang hrang kan en hian James Dokhuma hi hnam rilru la na tak mi a ni a. A bikin Mizoram buai behchhana a thawnthu ziakah te hian a Mizona rilru chu chiang takin a hriat theih. A thawnthu pakhat ‘Hmangaihna Thuchah’ ah chuan Lalthanpuia chuan a ngaihzawng, Marathi Kristian nula, fel zet mai Sarah Bibi chu a hmangaih em em a. Mahse nupuia neih dawn meuh chuan a rilru a lian ber mai ‘Mizona rilru’ chu a rawn lang ta a. Hnamdang nupuia neih ngawt ai chuan tiin a hnampui nula ngei chu a thlang ta zawk a ni. He thawnthu a\ang ringawt pawh hian James Dokhuma hnam rilru put hmang chu chiang takin a lang.

 

5. James Dokhuma Mizona rilru kan sawi mek lai leh a hnam rilru put dan kan sawi mek lai hian  a thawnthu \henkhat – Irrawady Lui kamah, Good bye Lushai Brigade, Kimoto Syanora leh Hmangaihna Thuchah  thawnthu te hi Mizo tlangval leh hnamdang nula, hnamdang tlangval leh Mizo nula inngaihzawnna lam hawi an ni lawi a. Amaherawhchu, a tawpah chuan an inngaihzawnna hi lungchhiattlak zawngin a tawp vek a, an innei ta lo vek a ni. Irrawady Luikamah thawnthu hi Mizo tlangval Thanzinga’n K^wl nula a chhanchhuah hnua an inkara hmangaihna lo piang ta chungchang a ni a, amaherawhchu an inhmangaihna an tlan dun dawn chauh a, Japan sipaiin Thanzinga chu an man ta a, an tan tir ta a ni. Hetih lai hian a bialnu Kawl nula pawh Japan sipaiin an lo kaphlum ve daih bawk a, an inhmangaihna chu a thamral ta a ni.

            Good bye Lushai Brigade thawnthu erawh hi chu Sap sipai pakhatin Mizo nula a ngaihzawn chungchang a ni thung a. Mahse an inngaihzawnna hi a tluantling ta lo a ni. Hemi chungchangah hian James Dokhuma chuan hetiang hian a ziak, “Mizo nulate hi sap ti-a kan chhoh en \hin te tan pawh iai awm an nih lohzia leh neih tlak an nih tho bakah “Sap indah san zia, kan Zosapte meuh pawh khan Pathian thu chu min duhsak mahse, hnam nihna lama min hmusit si zia a tarlang a.’ Kan Missionary te kha Pathian thu lamah fakawm em em mahse, nupui pasala innei meuh tur chuan mi an hnualsuat si dan te pawh ka thai lang tel bawk a ni” tiin he thawnthu a ziah chhan a sawi.

            Heng thawnthu ah te hian hnamdang nula tlangval nen an inngaihzawn chanchin te a lang na in heng hnamdang nena inngaihzawnna thu te hi James Dokhuma hnam rilru put dan rawn tarlangtu vek an ni thung.

 

6. A thawnthu ziakte zingah Rinawmin, Thlahlei nga zan, leh Khawhar In te hi Nowgong Special Jail leh Gauhati District Jail-a atan laia a ziakte an ni a. A thawnthu zingah Thla hleinga Zan hi a lar leh mi hriat hlawh berte zinga mi a ni a, a kutchhuak zinga lar ber mai ni lovin Mizo novel zingah chuan a hmingthang berte zinga mi a ni awm e. A tirah thawnthu lungchhiat takin a tawp a, mahse chhiartute ngenna vang liau liau in kum engemaw zat hnuah kum 1999 khan Bu 2-na a ziak leh a, a tir lama nula tlangval inngaizawng, innei thei ta lo te kha, a tawpah an innei ta a. Hlimawm takin a tawp leh ta a ni.

           

7. James Dokhuma hi Mizo ziak mite zingah chuan Mizo \awng thiam leh \awngkam hmang thiam pawl tak a ni awm e. Khawhar In  thawnthu a nula hmel \ha, Biakliani chungchang a sawina hi han tarlang ila, 

            “ Ka mita a lan dan ang takin ka sawi chhuak thiam lo zawk a. Nula dangte nena khaikhin ralah chuan sephung chhunkhawm zinga khuavang lamdar ang, a ti han ni nalh zia lah chu thlasik lai la lung ang maia sen no hiam leh a mitmeng ngaihnobeina romei zam chek te chu, sawi chhuak thiam ila han chham mawlh mawlh tak ka nap a. Lal\in eng mai mah nise a hm>l chu  ka’n en \hin a t<ma la hman ngai loh ‘siki’thar ang vela chei chuan ngailo kimtlang hi ni ber hian ka hria a. …..A mi biak zawnga a hmui zohniar ang maia sen hiam leh a ba bii-cha invuah dik tak, thlasik zo vu rang maia var, \hen chunga min han nuih saih mai chu, pachang thinrim pawh nui nghal vur vur a mawi a ni…..”

            Nula hmel\ha a sep dan hi a thiam em em a ni.

8. A thawnthu ziak te hi zir tham an ni a, School, College leh University ah te pawh an zir hial nghe nghe a ni. Irrawady Lui kamah tih hi Pawl -9 ah zirlai atan hman a ni a, Tumpang chal nge Saithangpuii leh Thla Hleinga zan hi College-ah BA zirlai atan hman a ni bawk a, Mizoram University-ah MA (Mizo) zirlaiah Khawhar In hi telh a ni bawk.

A tawp berah chuan   James Dokhuma hi kawng hrang hrangah thiamna a ngah hle a, Mizoten kan hriatrengna tur kawng chi hrang hrang a hnutchhiah bawk. Thawnthu phuah thiam(Novelist), chanchin chhui mi (Historian), mimal chanchin ziaktu (Biographer), Hla phuah thiam (poet), thutluang ziak thiam (essayist), thusawi thiam (orator) etc. tiin kan hre nawk ngei ang. A lehkhabu ziak te a ngaihnawm a, Thawnthu (Novel) nilo, a Essay ziakte pawh hi School, College leh University zirlaiah te pawh a tel nual nghe nghe a ni.

 

            Thuziak a ngah mai ni lovin belhchian a dawl a, holam deuhin a thuziak hi a chhuah ngailo. A thuziak reng rengah hian Mizo \awng dik thlapin a hmang \hin a, ziak zawm tur leh zawmloh tur te, \awng upa hman hun te a hre em em a ni. James Dokhuma ang hi Zoram khawvel hian a nei leh tawh lovang.