Tlang sang leh phai tual te

Tlang sang leh phai tual te,

Ruam leh khawk rawk te; 

Phul hring leh thing lenbuang, 

Siamtu ropuina an tarlang. 

Chhum leh ruah, thlipui leh kawlphe

Khaw dur leh khawpui ri te;

Hringfa tan tihbaihawm chang awm mahse,

Siamtu ropuina tarlangtu an ni.

Nipui lo thaw in hringnun par a vul,

Fur khawhnawm ah hringnun a chul;

Chutin vangpui lo thaw in, sikni eng a mawi,

Siamtu khuarel a her dik e.

Chung leng leh hnuai leng,

Sirva hram thiam zawng te; 

Lung an rual za, 

Sismtu khuarel leilung ah. 

Ni 22.5.2023 ( Thawhtanni) hian Indigo thlawhnain Guwahati atangin Aizawlah ka thlawk chho a. Kan thlawhna chu vansanga a thlawh lai chuan tukverh atangin lei lam ka bih a.

Assam phai tual leh leilet pharh duai mai te, a karah lui a luang kawi ngiai ngiai te ka zuk hmu a. Tlang ram kan thleng a, tlang chhengchhe tak tak kara lui luang te chuan ngaihtuahna thui tak min neih tir a. 

Chutia hnuai thlir a leilung mawina ka hmuh lai chuan sir lehlam ka thlir leh a. 

A changin chhum chungah kan thlawk a, a changin chhum kan su bawk a. Heng thli leh ruah te, chhum leh kawlphe, khawpui ri te hi mihring tan harsatna thlen tu a nih chang awm thin mahse Siamtu ropuizia tarlangtu an nih zia te ngaihtuahnaah a lo lang bawk a. 

Chutianga ngaihtuahna ka kawm lai chuan he hla thu hi a lo lang a, thlawhna chhunga ka awm lai chuan ka ziak mawlh mawlh a, Lengpui thlawhna tumhmuna kan tum dawn chiahin ka ziak zo hman chiah chiah a. Hei hi chawhma lam dar 10:10 vel a ni awm e. 

Damna run mawitu lanu leng rualte

A mi leng ten an belh damna run,

Mawitu lanu leng rual te; 

Phei lai an vawr za lai,

Zaia chawi ka nuam e.

Sakhmel nui hiau parin, 

Seih min hlan e dam pui nan; 

Anka biah nem min hlan, 

Dam nan a tawk lua e. 

Hringmi ze tin lawina,

Damna run ni zel na’ng che;

Lanu leng rual phei lai vawrna, 

Hringmi leng damna run chu. 

Zankhat chu rinlawk loh deuhin ka chau ta deuh thut mai a, damdawiin kan pan a, min lo dahlut ta mai a. Ka inrin aiin ka lo chau chu niin zan thum lai mai Damdawiinah ka mu ta a. Damdawiina ka awm lai hian thil chi hrang hrang ka tawng a, ka awmna ward hi a thar leh damlo awmloh lai tak a nih avangin kan thawl hle a. Min viltu Nurse te pawhin min vil hneh ngiang mai.

Ni hnihnaah room danga awm te an rawn sawn lut a, na deuh leh na lo deuh te nen kan ri ta nuai nuai mai a. Thenkhat na buai avanga ven reng ngai te, thenkhat chau deuh buaipui ngai reng te, thenkhat nuih ti za deuh te an awm laiin ek chhuak chhen te pawh an awm bawk a. Chung zawng zawng karah chuan min viltu Nurse te chuan buai map lo leh phili miah lovin a nih ang tur diak diak hian damlo hrang hrangte chu hneh takin min vil reng a. Kei a damtha deuh ber ka lo ni bawk a, buaipui ngaiin ka awm lo bawk nen an che vel chu ka thlir nileng deuh thak mai.

Nurse fel tak tak, engtik lai pawha hmel hlim pu reng mai leh engmah tih hreh nei miah lo bula awm chu a hahdamthlakin kan dam phah sawng sawngin ka hria. Zan lamah nise zankhuain min vil a, kan nawmloh hlauvin min ngaihtuah reng a, an hna leh tihtur reng ni mahse inpekna a tel tlat mai kha a ropui ka ti a. 

Damdawiina ka awm laia ngaihtuahna leng vel chu ka chhuah hnuah heti hian ka han dah ve rawih ta rawih a ni. ( 30.05.2023)