LALZOVA HLA A HMANGAIHNA LAN CHHUAH DAN

 -         Prof. Mals^wmliana

Tun \um ‘ Literary Magazine’ hunah hian ‘Lalzova hla a hmangaihna lan chhuah dan’ tih thupui kan sawi dawn a. Lalzova hlaah hian hmangaihna hi a laimu ber ni a a lan avangin sawi tur tam tak a awm thei ang a, chutihrualin sawi dan tawk thiam a har viau bawk awm e. A hla thuah hian hmangaihna leh lunglenna lam a uar hle a, hemi avang hian lunglen vanga thi ni te pawhin an sawi bawk \hin a, ‘Fam Lalzova’ ti a sawi a hlawh bawk.

A hla thu kan bihchian hma in Lalzova chanchin tlangpui han sawi thuak thuak ila a \ha ang e. Lalzova hi kum 1924 December 2-ah Lunglei Rahsi Vengah a piang a, a pa chu Hnuna niin a nu hi Aimawii a ni. Zirna lamah hian Pawl 5 a zova, kut themthiam tak a ni a, hla phuah bakah lemziah a thiam em em a, a lar pui reng bawk a. Khatihlaia Lunglei SDO Pu Wiscott-a chuan a thiamna chu hlutpuiin \anpui pawh a tum viau a, mahse lehkha zir zawm a duh avangin Pu Wiscott-a chuan Aizawl lamah a tir phei a, Aizawla a awm lai hian a lungleng em em mai a, a dam loh phah hial a ni awm e. Hla pawh engemaw zat phuah hman niin an sawi bawk. Hemi hnu hian a \hianpa Pu C. Thuamluaia chuan Calcutta lamah hruaiin lemziah lam zir chhunzawm a tum a, thla engemaw zat chu EB Bross-a Inah a cheng a. Mahse Calcutta ah pawh hian a lunglen leh tak em avangin khaw dang a hawi thei lova, tichuan a haw leh ta zawk a ni. Hemi hnu hian zirna lam chu a chawlhsan ta a.

A vanglai hun a hmang dawn chauh tihah Typhoid natna avangin kum 1945 December 8-ah a boral ta mai a, Lunglei Venglai thlanmualah phum a ni a, a thih hian kum 21 chauh a upa a ni.

Lalzova hi rimawi ngaina tak a ni a, rimawi chi hrang hrang heng – |ing\ang, Hawiin Guitar, Spanish Guitar, Violin, Ukelele te hi a tum thiam vek niin an sawi. Amahin Ukelele a siam chawp a, nileng deuh thaw in a tum peih niin an sawi. A chanchin ziaktu Pu R. Lalrawna chuan, ‘ Lalzova hi Mizo zingah chuan rimawi chi hrang hrang tum thei kan neih hmasak te zinga mi a ni awm e. Hei hi a chhan ber ni a lang chu Lunglei Bazar venga Pu Kira thingrem zai thei, Gramophone a ngaihthlak nasat vang a ni ang’ tiin a sawi. Hetianga sap hla a ngaihthlak nasat avang hian a hla tam takah pawh hian sap hla thl<k a hmang nasa hle a ni.

Entirnan, Mangtha (Good old Jeff has gone to rest), Aw nunnem, lawmna kung (Sweet Nelli Deane), Mahten awmkhawhar changin Parte (Show me the way to go home); Sualthadangi (Dreamy Texas Moan), Hmanah hmel hriat ngai loh Chhingkhuali (Wood pecker’s song), Chhingkhualah mahte’n suihlunglen (Cowboy Jack), Ka thin na reng a dam thei dawn lo (Café in Vienna); Tawng ila Leitlang lanu sensiar (Goldmine in the sky); My Pee Pee Odi (Far from my princely home); Ngaihluat vangin Vala (Carolina Moon); Romei chhum leh Ainawnpar (And of my home in Texas); Khualzin ar ang ka vai e (Be no-body’s darling); Mahriakte’n ar ang ka vai e Parte (Tropical magic) tih te hi sap hla thl<k a hmanna hla te an ni. .( Lalduhzuala, Love and Melancholy in Lalzova’s Poetry, M.Phil Dissertation, MZU, 2021, p.6.)

Rimawi a tui bakah hla a phuah nasa a, a damrei loh avangin a hla phuah hun chhung erawh a rei lova, kum 3 vel chhung (1943-1945) hian hla hi 48 zet a phuah hman a, heng zingah hian sakhaw lam hla 3 leh hla lenglawng 5 tih loh a hla dang te hi lengzem hla a vek an ni. Naupang te ni siin hla thu hman a thiam em em a, a hla te hi tluangtlam leh sak nuam tak vek an ni a, mi tam tak chuan Mizo zingah chuan lengzem hla phuah thiam berte zinga mi a ni tih \hin.

Lalzova hla phuah hmasak ber chungchangah hian sawi dan hrang a awm a. Kum 1942-tawp lama ‘Lalnunnemi’ tih hla a phuah hi a hla phuah hmasak ber ni a sawi a ni. Mahse a farnu Siamliani sawi danin Lalzova hian lengzem hla te hi a ngaina hma hle a, chuvangin a hla phuah hmasak ber pawh kum 14 a nihin a phuah a ni a ti. A sawi dan chuan ‘A\ha partinlawri’ tih hi kum 1938-a a phuah a ni a, a hla phuah hmasa ber a ni tiin a sawi.( Lalduhzuala, Love and Melancholy in Lalzova’s Poetry, M.Phil Dissertation, MZU, 2021)

Kan thupuiah lut dawn ta ila. Lalzova hla-a hmangaihna lan chhuah dan tih a ni a, a tir lama kan sawi angin Lalzova hla te hi hmangaihna hla deuh vek a nih avangin an zavai mai hian hla lungrun leh di ngaih lunglenna lam hawi deuh vek a ni a. A hla a\ang ringawt pawh hian a phuahtu Lalzova rilru put hmang leh a khawvel tur awm hi a hriat theih r<ak a ni.

A hla phuah a\anga a lan danin Lalzova hi hmangaihna la na mi tak a ni. Naupangte in hmangaihna lamah a rilru a pe hma hle a, a hla phuah hmasak ber ni a an sawi ‘ Lalnunnemi’ tih hla ah hian ‘ Aw khuanu leng, min dawn pui rawh; tinkim ka d^wn, thinlai a lo khat e; luahlai a rem si lo nunnem, kumtluang ka \ah sei tur nang vangin ‘ tiin a chham a. Kum 18 mi lek ni si in  hetiang tak hian hmangaihna hi a la lungrun hma hle tih a lang. A ngaihzawngte hi lungsi takin a hmangaih nghal em em thei mai niin a lang a, hemi a nih avang hian a ngaihzawng ten midang an neih san pawhin a tuar thei reng bawk a, a tan vanpui a chim ta emaw ni tih tur khawpin a tuar a, chu chu hla hmangin a puang chhuak \hin a ni. Hetiangin :

“ Aw, a pawi em mai ‘Di’ lo hian, Tual len ka zuam lo ve Parte;’

“ Kang mei ang ka thinlai a dam thei dawn lo’

Thlungl< a na khua pawh ka hawi ngam lo’  ( Dam takin le)

 

            Hemi \uma a ngaihzawngin midang a neih san hian a rilru a na em em mai a, khawlaia len chhuah pawh a peih lova. A \hian ten vah harh pui an tum pawhin a rilruah engmah a lut thei lova. A k^-ah engmah a tui lova, chaw a ei thei hek lo. A \hiante bulah a hlim thei lova, nula dang bulah pawh nuam a ti chuang lo. A nun ram chu a ngui hn>p mai a, a t^n chuan khawvel hi a ch<l riap mai a, a thin chu a ng>t lung kher ang mai hian a nat hian a na ngawr ngawr in a hria, tiin a chanchin ziaktu Pu RK Lalhluna chuan a sawi.

            Lalzova hian mi zawng zawng hi rilru \ha tak pu vek niin a hmu a, a laka rilru \ha lo an pu ni a hriat erawh chuan a rilru a na em em t\hin. Hmeichhia te pawh hmangaihna mitin a thlir thiam zel a, a dah ropui em em bawk a, a chang phei chuan a damchhan ni hialin a sawi nghe nghe a ni. A khawhar hnem tu leh a nun ti hlim tu ber niin a hria a, hemi thlirna mit a\ang hian hmeichhia te chu a thlir a, a ngai em em reng mai a ni.

‘Awmkhua a har suihlunglenin ka thlir vela lenkawl,

Chhaka’n ainawn a vul tu nge ka suihleng min hnem ang?

Awi, tawn ka nuam chhingkhuala Dizawni

Ka suihlung min hnemtu, I ngai hian ni ka leng zan mu ka chhing thei lo a ni’ (Dizawni)

 

            Lalzova hi he khawvelah hian riang leh khawhar tak niin a inhmu \hin bawk a. A ngaihzawng ten midang an neih san chuan riang ta viau leh chan chhe ta viau in a inngai a, hetiang dinhmuna a rilru puthmang hi a hla tam takah kan hmu.

            “Ka chan tawkah ka lungawi lo, ka damchhan ka luah zo si lo;

            A riang kei mi iang an awm lo’ng e, ka nghak sual \ha dang mi u.

            Aw, rairah ka riang em mai, Dawn lem hi ka nei si lo;

            Lung ka mawl em mai, tawng lova khiangawi, zamual min liamsan’

 ( Ka chan tawkah ka lungawi lo)

 

A hla dang heng – Dam takin le, A dam thei dawn lo, min hnawl valnunnema, Har mah se, Min liam san lul suh, Lenghermawii, Min \hen lul suh, Mang\ha mang\ha leh a dangte pawh hi a hmangaihna chhan let loh leh a hmangaih ten lung an her san avanga phuah a ni deuh ber.

Chutihrualin Lalzova hi pa rilru \ha tak mai leh mi duhsakna ngah tak mai a ni tih a hla phuah a\ang hian a lang bawk a. A hmangaih ten midang an neih san pawhin thinrima thlah mai lovin ngai em emin a thlah thei mai zel a, a dawh thei a, a inngaitlawm thei bawk a. RK Lalhluna chuan ‘ Lalzova hi chuan chutiang nun zia chu a pu tlat a, a \ul hunah chuan a tlawm ngam a, a inphah hnuai thei a, thuhnuairawlh takin a ngen zui \awk \awk zawk \hin. A bialnu ten an hawisan hnu pawhin an rilru an rawn pek kir lehna tur leh an khawngaih thla la thei ang ber tur chian a khawsa thiam a..” a ti.

‘Zantiang tawnmang lungmawlah pawh, Ka nghilh lawng che annem mi u,

Nang ngaih a zual khua -\ha romei a lo zamin,

Min then lul suh, I zun ngai min awm rawh’  (Min \hen lul suh)

 

 Hetiang a nih lai hian, thil reng reng hi ulh taka lak loh hram dan a thiam em em bawk a, a dam zawnga lak dan pawh a thiam a, hlimna kawl eng leh mai tur chu a thlir thiam hle bawk.

“ Vul nawn leh la riang ka tawnah, a nem ang suihlunglen Odi

Cho rual loh Di, I lunglawm nan,

Ka kiang ang, Odi-aw’ ( Odi, Odi, Odi)

 

Lalzova hi mi lungleng thei tak, \hian kawm nasa leh mahni khawtlang nun ti mi a ni a. Khawiah pawh awm se an khua Lunglei chu a ngai em em \hin a, haw vat vat hi a duh a ni ber mai. Aizawlah te, Shillongah te leh Calcutta-a a awm lai te pawhin khaw dang a hawi thei lo, a rilru chu an vengah a cheng reng thung. A changin an veng nula ho hming la khawmin hla a phuah a, ch<ng ho chu a kawmngeih em em te an ni bawk a. Heng hla te avang hian an veng nula ho chuan an ngainat phah lehzual a ni. Calcutta a\anga a rawn haw pawh a lunglen thu bak sawi tur a hre meuh lo a ni ang, an ti hial. Calcutta khawlaiah vaiho zi nuai nuai karah pawh thil dang a ngaihtuah thei chuang lo, a rilru a lian ber chu heti hian a chham a –

“ Mitthla-in  ka hmu che Ngaihzuali, lenna tlang te chu dang rih mahse

Hmana kan nun hlui zawng zamual laim hnu, mitthla-in ka hmu che ngaihzuali”

Nagmah ngaiin tawn loh ni hnuaiah, chhawl ang ka uai ruai e Ngaihzual,

Sakhmel tawn loh par ang I vul tur chu’ (Mitthla-in ka hmu che Ngaihzuali)

 

A hla phuah pakhat, ‘Lenna khua hmun lo’ tih hlaah pawh hian heti hian a chham a, - ‘Kumtluang lungkham ka luah loh ai chuan, Fam ila kan chhimtlang khawdai ngeiah’ a ti hial a. Hei hian \henkhat chuan, ‘Lalzova chu a inphuah hlum \hak alawm, lunglengin a thi tih loh rual a ni lo ve’ an ti hial a ni.

A tawp berah chuan heti hian han khaikhawm dawn ila. Lalzova hla te hi hmangaihna lam hla, lengzem hla - Nula leh tlangval inlemna hla an ni deuh vek mai a. Hetiang hian han \hen ila –

i)          Nula a hmangaihna puanchhuahna

ii)       Nula in a her san avanga hrehawm a tihna leh a ngaihna hla

iii)     A \hian te nen hlim taka an inkawm \hin hun lai a ngaihtuahna hla

iv)     Ral khat a\anga a ngaihzawngte a ngaihna hla

             Heng zawng zawngah hian a laimu ber chu hmangaihna a ni a, Lalzova kha hmangaihna hla na mi tak a nih avangin a nunkhua kha hmangaihna kawng chhuk chho zawhin a kual a kual ve a ni. A changin a hlim a, a changin a lungngai a, hrehawm a ti a, a changin a lung a leng a, a khua a har thei em em bawk a, hmangaihna ngah tak mi a ni kan ti thei awm e.

            Zofaten Lalzova anga lengzem hla phuah thiam leh sak nuam taka a thluk siam thiam, rimawi chi hrang hrang tum thei kan nei hi kan vannei hle a. Mizo hnam a awm chhung chu Lalzova hla te hi a chuai lo ang a, kan la sa zel dawn a ni.

LALMAMA FIAMTHU HLATE THLIRNA

 -         Prof. Mals^wmliana

Tun \umah hian ‘Lalmama fiamthu hla te thlirna’ tih thu kan sawi dawn a. Lalmama hi Mizo thu leh hla khawvelah chuan a hming hre lo kan awm kher lovang, a bikin mi hmasa te zingah chuan kawng hrang hrangin hriat a hlawh a. ‘Zirtirtu Lalmama’ ti a hriat a nih laiin ‘Serkawn Lalmama’ tiin an hre deuh fur bawk a. ‘Headmaster ropui Lalmama’ tih te, ‘mi bik Lalmama’ tih te, ‘Solfa thiam Lalmama’ tih te hi mi hriat dan a ni bawk. Kum 2018 khan a puala lehkhabu pakhat a chhuak a, a bu hmingah ‘Serkawn Lalmama’ tih a ni a, kum 2021 ah a thu leh hla te zirchianna bu a chhuak leh a, a bu hmingah ‘Zirtirtu Lalmama’ tih a ni leh bawk. Heng lehkhabu buatsaihtute hian miin an hriat dan angin a bu hming hi an phuah a nih hmel e. Heng atang ringawt pawh hian tuna a hla phuah kan thlir tur Lalmama hi mi ropui tak leh mi bik tak a nih zia a lang nghal awm e. A chanchin tlema zawng han sawi hmasa ila.

Lalmama hi a hrechiangtu te chuan ‘Mizo paah chuan pa vantlang pawl tak, “feet 5.6’-a sang a ni a, h^ng lam deuh, mitmeng fiah tak’ a ni tiin an sawi \hin. Pa invawngfel, pa ti thlip thlep leh inuluk mi a ni a, a naupan lai a\anga Zosap Missionary te ke bula seilian a nih avangin heng a mizia tam tak hi chu anni hnen a\anga a zir chhuah a nih hmel e. Sap ramah kum khat dawn a awm bawk a, heta \ang hian thil tam tak a zir chhuak bawk ang.

 Lalmama hi kum 1907 April 7-ah Pukzing khuaah a piang a, a hming tak chu ‘Lalhmingthanga’ a ni a, a koh duat nana an hman Lalmama tih chu a pu hlen ta hlauh a ni. A pa hi Sena, Ralte Kawlni hnam  niin a nu chu Dochhingi a ni. A nausen laiin a pa in a boralsan avangin chh<ngte dang belin Lunglei Zotlangah an pem a, hemi hnuah hian Zosap Missionary pahnih Pu Buanga leh Sapupa ten an bula lehkha zir  tur leh an thachhangdawl tura an thlan mi tlemte zingah tel ve in Zosap te enkawlna hnuaiah a seilian ta a ni.

 Kum11 a nihin kum 1912 khan Serkawn Boarding School atangin Lower Primary chu \ha takin a pass a, mi 18 zingah 3-na a ni pha hial a ni. Kum 1914-ah Upper Primary exam lehin hemi \um hian Pathumna a ni leh nghe nghe a ni. Kum 1915 ah Middle English a zo leh a, Serkawn a\anga Midle English Exam hmasa ber zingah telin Chhim bial a\anga ME School pass hmasa ber 7 zingah a tel nghe nghe a ni. Hemi bak hi chu zirna a chhunzawm ta lo.

 Middle English a zawh hnuah hian Zosap Missionary, Sap Upa- i’n Zirtirtuah a ruai nghal a, Mission Pisa ah Clerk hna a thawh tir bawk a, Mission Dispensary ah te pawh an chhawr bawk a, kawng hrang hrangin Zosap Missionary te thachhangdawltu a ni chho ta a. Chutiang chuan kum 3 vel zet chu a \ul \ul thawkin a hmanhlel hle \hin a ni. Kum 1918 a\ang chuan Serkawn Middle English Sikul-ah Zirtirtu hna a thawk \an a, kum 1938 ah Headmaster niin kum 1959 ah a Pension ta a ni.

 Lalmama hian thiam thil (talent) a ngah hle a, zirtir hna a thawh bakah hian hla phuah te, thuziak te, Solfa thlengin a thiam em em mai a. Amahah hian zirtur tam tak a awm a ni. Chuti lam chu kan thlur hman lo turah ngai ila.

Tun \umah hi chuan fiamthu hla a a phuah te kan thlir chauh dawn a ni. Lalmama hian hla 18 lai a phuah a, heng bakah hian Sap hla a\anga lehlin hi 13 a nei bawk a. A hla phuah zingah hian kan hriat lar tak, KHB No, 592-na, ‘Lo cheng ve la kan r<n chhungah’ tih hi a tel a, sap hla a lehlin zingah pawh kan hriat lar tak tak, ‘Min vengtu chu Lalpa a ni (KHB No. 28) ’, ‘Khawchhak Lal pathum’, ‘Zan thiang reh lai takin (KHB No.91), ‘A saw raltiang tlangah (KHB No.203)’ leh a dang te an tel.

A hla phuah 18 zingah hian fiamthu hla (thawnthu hla ni bawk) pathum- Chhura Sangha vuak hla, Valdawngthlawna leh Thaibawih hla a a tel a, heng bakah hian hla lenglawng engemaw zat a phuah bawk.

Lalmama hian kum 1932 ah hla a phuah \an a, a hla hmasa ber chu kum 1932-a a phuah ‘Thaibawi Hla’ hi a ni. He hla hi chang 8 a sei a ni a, Pa pakhatin hnathawh kawnga a nupui a hauhna leh a nupuiin in lama a thawh ai zawng zawng thawk tura a tihna hla a ni a. A nupui chu In lama hahdam taka awm a, hnathawk mang lo hiala puh avangin a nupui thinrim chuan a pasal chu In lam hnathawk a, a nin lo lam hna a thawh san ta a. A pasal hnenah, ‘ keiin lo ka v^t ang a, lo lam hna kan thawk ang a. Inah lo awm la, zingah buh i deng ang a, Bawnghnute i lo sawr ang a, vawk chaw pe in leh ^r i lo lawi bawk ang a, tui i lo chawi bawk ang. Puan te pawh i lo tah bawk dawn nia’ tiin a chah a. A pasal chuan a han ti dawn a, Bawnghnute a sawr tumna lamah Bawngin a lo kheng thlu der mai a. Engmah pawh a ti thei ta lova. Tlaia an nu hnathawk a lo haw chuan a bulah ‘dawl zawrin a zawr ta a ni.’ In lama hmeichhe hna tam zia a hmuhin,

 ‘ A thai h^wng e, a hr^ng zual e,

“R>lthang ka d^wn zo lo ve,

Ka dem lo che, ka dem lo che,

Tui ang kei ka nem duai e,”.

A ti chul mai a ni. He hla hi ‘inphuah elna hla’ (satire) a ni bawk a, inchhungkhura mipa leh hmeichhe hnathawh inan loh zia leh indem mai chi a nih loh zia a lang chiang hle a ni. Inchh<ng hnathawh hi hahdam leh awlsam zawk angin lang mahse thawh zawh theih a nih loh dan leh a hahthlak dan te a tarlang hle a ni.

 He hlaah hian Lalmama themthiam zia leh hla thu hrang hrang a hman thiam zia te a langchiang a, fiamthu a duh zia a lang chiang bawk.

 

A chang khatnaah…            Thlunglu vau anga vul tawh khan,

A thai a hau an tih chu!

“Chh^m ang i zal \uan r>l lovin

I thawh let thum ka thawk e,” tiin a nupui a hau a, a nupui lah chu a lo duai der lo mai.

           

A thai a hr^ng diau bil lovin, Tukram ka vat ang e, khai

Zing sum su la, bawng lo s^wr la, Kawltu kei ka chawi nang e.

 

Lalmama hian \awngkam a thiam a, \awngkam tluang deuh siin mar zat maiin a remkhawm thiam a, hei hian a them thiam zia a tarlang.    

           

 Vawk chaw pe la, ar lo lawi la, Tahpuan pawh lo khawng ang che.

Ka liam ta’ng e zalam \uanna, Saw r^l sawmf^ng dum durah,”

 

A tawpah phei chuan ….     A thai h^wng e, a hr^ng zual e, R>lthang ka d^wn zo lo ve,

                                                Ka dem lo che, ka dem lo che, Tui ang kei ka nem duai e.”

 

 ‘Chhura Sangha Vua’ hla hi kum 1935-a a phuah a ni ve thung a, a hla phuah zingah chuan a hmasa pawl tak a ni bawk awm e. Chhura chanchin nuihzatthlak tak, hla thu hmanga a chhamchhuak hi a talent neih \hat zia a langchiang a. Hla rua chi hrang hrang a hman thiam zia a lang a, nuihzatthlak takin a remchhuak thiam bawk a. Han chhiar mai pawh hian Chhura mizia pawh chiang takin a hriat theih bawk.

    He hlaah hian Chhura chu khawtlang sangha vuaknaah kal tumin a thawk chhuak ve a, mahse kal ta lo chuan tlaiah a haw ta a. Sangha vuaknaa kal tum ve si naupang lawm tur tak ngial pawh hawn loh chuan a nupui thinur tur a ngai ngam lo a. Khawchhungah pawh lut ngam lovin daikawmah a kal a, chutah chuan tuihawk ah Utawk lian pui a man ta hlauh a. Ina a thlen chuan inti thei takin an hmuh hlau bawk siin a thukru a, Utawk hmanga tl^ng hrai a tum hial a ni. A hlauh ang ngeiin U\awk chu a rawn zuang chhuak a, a pi khupah a l^wn a, U\awk vuak tum chuan a pi khup a khawng vung ta ul mai a, tih a ni. 

             He hla ah hian Lalmama hla thu chher thiam zia a lang a. Utawk lian pui a man a, a intihtheih zia a tarlan dan te hi han ngaithla nawn leh ila:

 

Khuafur h^wktui thangvawkpui ruang bualna,

Laichhuat r<n in hnuaiah;

Lench^wm beng \awkdangi chawnb^n vuan e,

“Chei! Amah ‘tun khaia!

Mi <-te hmuh loh, mi pate hmuh loh,

Lengngha hneha tuai pir per ka tawng kei zawng,

Hmuh ka nuam e, ka thai Nemduaii,

Hraileng ka tuaite zawng!”

 Lalmama fiamthu hla pakhat leh chu ‘‘Valdawngthlawna’ tih a ni a,  he hla hi thawnthu nuihzatthlak tak a ni bawk a; kum 1935/36 bawr vela a phuah a ni. He hla chungchanga an sawi dan \hin chu - Chhura pawvawng zuar chuan sial a tlin laiin he ‘Valdawngthlawna’ sum tuak ve hi chuan sial a\angin bul a \an a, a tawpah ar a lei thei hram a; chu a ar lah chu mu-in a laksak daih lehnghal a, a dawng chiang hle a ni.

 A hla ah chuan, tlangval pakhat hian sumdawn tumin Sial a kai chhuak a, amaherawhchu Sial chu a kal duh ta reng reng lova, a tawpah Vai Bawng nen a thleng ta daih a, a hnuah a inchhir chuan zin chhuah pawh tum ta lo chuan a then vel ta mai mai a, a hnuah phei chuan a Bawng chu Kel nen a thleng pui leh a, Kel pawh chu Vawk nen a thleng leh ta zel a, chutah Vawk chu Ar nen a thleng leh a, a tawpah phei chuan a Ar pawh chu Mu in a laksak ta daih a. A tirah Sial nei kha engmah nei lovin kutbengin a awm ta a. He thawnthu mawlmang tak leh nuihzatthlak tak hla thu hmanga a han remchhuak hi a tihlimawmin a nuihzatthlak hle a ni.

 

            Mu in a Ar a lak sak ta daih chu heti hian a chham chhuak a,

 

A him rua lo’ng chungtiangah mu leng duai duai

A l^k tak e-thinlai phang thlawn lo

Liam ta zel kha-‘KHU KHU!’

Awi aw! Men sen so thlir vawng vawng,

Chhuihthangval a hawihai e.

 

            Heng fiamthu hla te hi Mizo ten kan neih tam loh pawl tak, tunhnu thleng pawha kan la neih mang loh an ni a. An sawi fo \hin Serkawn Concert avanga heng hla te hi lo piang an ni a, hla nuihzatthlak satliah mai ni lovin mihring nunphunga thil thleng ngei, hla thu hmanga nuihzatthlak taka puanchhuahna an ni.

             Heng hla pathumte hi Literature \awngkama sawi chuan thawnthu hla (ballad) an ni a, a tawpah lungngaihna lama tawp vek an ni a, hengte hi Ballad ziarang pawimawh tak an ni. “Valdawngthlawna” hi a tirah a ropui viau na in a tawpah a sumdawnnaah a hlawhchham der a, “Thai-Bawih Hla” -ah pawh pa ber chu inti pa takin ro a han rel vel viau na in a tawpah chuan nu ber lakah a tlawm ta duai mai bawk a. Chutiang zelin “Chhura Sangha Vua” hlaah phei chuan Chhura ngei pawh hlawhtlin viau a tum laiin hlawhchhamin hreh tak chungin a haw a, sangha aiah U\awk a hawn a, chu pawh chu ei ngai loh a ni bawk a. Hetianga lungngaihna lama a ti tawp hi heng hla tingaihnawmtu leh ti nuizatthlaktu a ni thung bawk a ni.

 A tawp berah chuan, Lalmama hian hla a phuah tirh lama heng fiamthu hla 3 a phuah bak hi chu hetiang lam hi a phuah tawh lo niin a lang a.  Chutihlaiin a hma lama kan sawi tawh angin hetiang hla hi tun thleng pawha kan la neih tam loh lam a ni a, kum 1932 chhova phuah daih tawh nimahse tun thleng hian Mizo te hian kan la tuipui a, kan la zir zel dawn a ni.

             Lalmama fiamthu hla a\ang te hian mihring nunphung a lang chiang a, a hlimawm lai te chiang takin a lang a, a phuahtu mizia leh fiamthu thiamna a lang chiang bawk. Mizo ten Lalmama te anga thiam thil ngah, a thiamna Mizote tana chhenfakawm si kan lo nei hi kan vannei hle a ni.

CFL HMINGTHANGA HLA TE THLIRNA

 - Prof. Malsawmliana

CFL Hmingthanga hla te hi a tlangpuiin kan thlir thuak thuak dawn a, chik tak erawh chuan kan thlir hman dawn lo. A hla zia rang tlangpui leh sawi tur \ul langsar zual ni a ngaih te kan sawi chauh dawn a ni.

A chanchin tawi

A hmasa in CFL Hmingthanga chanchin tawi haa tarlang hmasa ila. Zoram khawvel hriata zaithiam leh hla phuah thiam CFL Hmingthanga hi November 15, 1965 khan Samthang khuaah a piang a, a pa chu Khamliana niin a nu hi Tawksungi a ni bawk. Unau pianpui 5 a nei a, amah hi an unau zinga tlum ber a ni.

A hmingah hian a pa hnam Chhangte leh a nu hnam Fanai la kawpin ‘Chhangte Fanai Lai Hmingthanga (CFL Hmingthanga) tiin a ziak \hin. Amah hi hmel\ha leh hawihhawm a ni a, infiamna lamah a tui a, Voleyball leh Football a khel nasa hle \hin. Kum 1980 khan an khuaa Beat Group pakhat, Zoawi Virthlileng Musical Club a zawm a, an Band ah hian Lead Guitar a perh \hin a, an lar pui viau a, Tuipuiral Beat Contest velah pawh lawmman pakhatna an la fo \hin a ni. Kum 1983 ah Mal zaiin a kal \an a, an khaw chhehvela YMA Branch hrang hrangte zaia intihsiaknaah pawh lawmman a la fo \hin bawk. 

A zaithiam mai ni lovin hla phuah a thiam tel bawk avang hian a hla phuah te hi a sa ber a, hla hi 130 bawr vel a phuah a ni. Zai lamah th<k zawka kal a duh avangin Aizawlah a chhuk a, kum 1989-ah a hla phuah 12 te khungkhawmin Audio Album hmasa ber ‘Ngaihlai Masang’ tih chu a tichhuak a, a Album hi hralh a kal hle nghe nghe a ni. Hemi hnuah hian Album a siam chhho ta zel a, a thih thleng khan Album 12 lai a siam hman a, chungte chu –

1.         Ngaihlai Masang

2.         Roosna hmel\ha

3.         Chhanlet loh hmangaihna

4.         Kur diam diam

5.         Tunge hmel\ha ber

6.         Lam dun ang/I tan ka lo kir

7.         Min hriat chhuah tir

8.         Hlim la nui rawh

9.         Ka bang lo nang ngaih

10.       Theihnghilh ngai loh

11.       Lemchan khawvel

12.       Hla inchhang Special

 

All India Radio (AIR), Aizawlah hian kum 1991 a\angin hla a thun \an a, B High Grade Artiste niin hla 45 a thun (record) hman a ni. AIR bakah hian Doordarshan Kendra (DDK) ah leh Local Cable TV ah hla engemaw zat a thun bawk.

September 9,2012 zan khan Chuap TB natna avangin Khawbung PHC ah a boral a, a tukah Samthang Thlanmualah ropui taka thlahin vui liam a ni.

A hma lama kan sawi angin hla hi 130 vel a phuah a, heng zingah hian lar tak tak a awm rualin ‘Intawng leh ngei ang aw’ tih te, ‘LD Hmeltha’ tih te, ‘Ngaihlai Masang’, ‘Vul dun ang’, ‘Chhuahtlang hmun hlui’, ‘Hmangaih CFL’, ‘Ka Di tawn hun tur’ etc. tih te chu a lar zual an ni.

A hla ziarang leh hla thu hman dan:

CFL hla te zingah hian a tam ber chu nula tlangval inlemna hla, Lengzem hla a ni a, a bakah chuan famngaih hla, khuarel hla, hnam hmangaihna hla te an awm bawk.

A hla phuah te hi a sa nghal zel a, a tlangpuiin a Albuma hla awm te hi ama phuah an ni deuh vek a, midang hla a sak tlema zawng a awm bawk. Hetianga mahni hla sak tur phuah mai thei hi Mizo zaithiam zingah tun thleng hian an tam lo viau a, CFL Hmingthanga hlutna tak pawh a ni awm e.

A hla phuah te hi \awngkam tluang pangngaia phuah leh remkhawm te a awm laiin \henkhat hi chu  hla thu mawi tak tak remkhawm te an ni bawk. Tawngkam a thiam a, hla rua (poetical words) pawh a hmang thiam hle a ni. Hla thu chher thar pawh a nei nual awm e. Hla phuah pawh a awlsam hle niin a lang bawk. Nula hmel\ha deuh a hmuh changin hla in a phuah zui zat thei a, hmangaihna chungchanga a rilru natna leh lawmna te chu hla in a puang chhuak \hin. 

‘Than\thar Fam Lalzova’ tih theih hial khawpin a lung a lengin hmangaihnaah lut thuk hle niin a lang a. A hla ah te hian “Ka lung a leng vawng vawng, ka ngai em che, “ tih te hi a tam em em mai a, tlangval lungleng thei tak a ni awm e.

A hla phuah han thlir hian hmangaihna a lak nat zia te leh a rilru \hat zia te pawh a lang thei a. A hmangaih a luah zui tak loh te pawh \ha taka a thlahna hla te pawh a phuah bawk.

CFL-a hi Mizo pa tak, hnam rilru pu tak niin a lang a, hnam rilru lanchhuahna hla a phuah tam lo na in a phuah chhun ‘Vul dun ang’ tih hi zir tham niin a lang. ‘Zonun parah vul dun rial rial ang’ tih hian awmze ril tak a nei a, hnam dang nupui pasala neih ai chuan mahni Mizo pui ngei nupui pasala nei tura a fuihna thu a ni.

Hetih mek lai hian hnamdang nula Roosna a phuahna hla a awm tlat bawk a, ‘Roosna hmel\ha’ tiin hnamdang nula hmel\ha a tawn thu leh a hmangaihnaa a uai zo tak thu kan hmu a, ‘thlang kawrvai lanu, sakhmel duhaisam, aw a cham \ang lai’n maw’ tiin. Mahse a hnam rilru put chu rawn lang chhuak leh in eng anga hmel\ha pawh nise nupui pasala innei a chhungkaw din chu a rem loh thu ti hian a chham chhuak zui a–

‘Zawlkhawpuiah mim ang lo piang mah la,

Zofa sakhmel reng I chawi ve si lo;

Indi mah ila nang nen run hmun len,

Aw, a rem thei dawn si lo,’tiin.

Hei hian hnam rilru a put thuk zia leh hnamdang nena inpawlh dal loh a duh zia a tarlang a, heng hla pahnih te hi a hnam rilru rawn far chhuahna hla an ni.

A hma lama kan sawi tawh angin CFL- a hian tawngkam bungrua a ngah hle a, hla thu hmanga nula a sawina pawh hi chi hrang hrang a nei a, chungte chu han tarlang ila- Zokhaw tleitiri, Zawlkhaw tleitiri, Derthiam tleitiri, nunrawng hmel\ha, Valtinlawri, Thangnuihiaui, Lengi, Lanu lungmawl, Ramdai senhri, Mawihluani, Lenghermawii, Mengmawii, Bingtaii, Dilenmawii, Biangno hmeltha, nuntawi hmeltha, rangkachak, D te, tih te hi a hmang a. Hengte hi hlaphuahthiam dangin nula sawina atana an lo hman thin tawh te nen inang awm mahse mi la hman ngailoh a hmang nual thung.

CFL- a hla ziaranga sawi hmaih hauh loh tur chu mihring a phuah chhan \hin hi a ni. Hetiang hla hi kan hmu nual mai. A changin nula hmel\ha a phuah chhan a, amah leh amah a inphuahna hla te pawh kan hmu bawk. Entirnan, Tuipuiral nula hmel\ha Ldi a phuahna hla ‘LD Hmel\ha” te hi a larin sak a nuam a, a hla rua hman dan pawh a thiam hle mai.

I mawi chuang bik asin i lenrual zingah hian,

Furkhawthiang Chhawrthla eng i iang e;

Ngaihno bei chuang hmangaih par ka thiahpui si loh,

Aw ka ngai em a che, luahloh LD hmel\ha.’ Tiin.

 

Hnamdang, vai nula Roosna a phuahna hla te, Ngaihlai Masang, Enchimloh Sangte, Ka nau Vala leh a dang te a awm nual mai. Amah a inphuahna hla hi a awm bawk a, ‘Hmangaih CFL’ tiin a tawnah nula pakhat a uai thu a sawina hla a ni. A thunawn han tarlang ila.

“ Hmangaih CFL, min dawn pui ve rawh,

Nang vangin run in ka bel ngam tawh si lo;

Ka chun leh zuate an hrang si ka tawnah,

Zirna run ka vai duh luat vang che hian e,

Tuar a har thin em mai Hmangaih CFL”.

 Kan sawi tawh angina CFL-a hla phuah zingah hian a tam ber chu nula tlangval inhmangaihna lam hla a ni a, chung zingah chuan khuarel lam hla leh hnam rilru tarlanna hla tlema zawng a awm ve bawk.

Lengzem hla a phuahte zingah hian a remchan angin khuarel lam hla, leilung mawina lam hi a telh zeuh zeuh thung. “ Kan tlangram mawi” tih hlaah hian Thalfavang huna Zoram nawm zia leh mawi zia a tarlang a, lungti leng tu leh nunhlui ngaih tizual khawpa mawi leh lunglenthlak an nih zia a tarlang.

 

“ Thalfavang lenkawl turni a lo chhuak eng ruai e,

Tlangtin leh mualtin a thawi dam diai a;

Sirva lungrual leh nungcha tinrengte pawh hian,

Vanglai par ang an tlan, suihlungrual te in”

 

Kan tlangram a mawi ngei e Zo thlifim a leng del del,

Mahten ram va tuan ila,

Suihlung a leng vawng vawng,

A saw raltiang tlangah romei a kai chiai e.

 “ Lucy Pangpar huan” tih hla hi a di tawnna hmun pangpar huan a phuahna a ni ve thung a, chu huanah chuan pangpar chi hrang hrang te anmahni par dan \heuhvin indip miah lovin an par chiai hlawm a, chu huan chu “partin vulna” tiin khuarel mawina a phochhuak a ni. Pu Nehrua’n ten India ram pumpui pangpar huan anga an tehkhinna leh ‘Unity in Diversity’ an sawina ang mai khan he ‘Lucy Pangpar huan’ hi a tehkhin a ni.

“ Zaleng hringmi iangin in buai ve ngai si lo,

Par ze hran mah ni u, ka hai chuang lo;

Suihlung rual ten Siamtu duan anga lungawiin,

In vanglai ni lo her liam turah pawh”. tiin.

 A hla phuah zingah hian hla pahnih, thil nung lo a phuahna a awm a, chungte chu M&B tih leh Hotel Moonlight tih a ni. He hla a M&B a tih hi Love story thawnthu bu, sap\awnga ziak Mills & Boon (M&B) in tihchhuah \hin, Mizo tawnga lehlin tam tak ho kha a ni a. Tunhma khan hetiang thawnthu bu lehlin, cyclostyle a tihchhuah hi an chhiar nasa a, a ngaihnawm bawk a. Nula leh tlangval inhmangaihna thawnthu bu a ni a, chungte chu CFL-a hian a lunglen changin a chhiar \hin a, “ Hmangaihna kawng dika min hruaitu, ka tan i hlu ka chhiar ning lo che” tiin hmangaihna dik leh rinawm zirchhuahna atan a hman thin thu a sawi a,midangte pawh zir chhuak ve turin heti hian a fuih pah bawk “ Leng zel ang che lanu val rual zawng zingah,Kumtluang hmangaihna hriattir zel rawh,” tiin.

Tunhma khan Aizawl Chaltlang Lily Vengah hian Hotel Moonlight a awm \hin a, tunah chuan State Guest House tih a ni ta a. Chutah chuan zai leh rimawi hmangin nula tlangval an inkawm hlim \hin a, a lar hle nghe nghe a ni. CFL-a pawh hian he Hotel a leng lut \hin te chu zaiin a lo awi \hin a ni ngei ang, nuam a tih \hin zia leh an hlim \hin zia te, duhtak te nena an inkawm hlim \hin zia a phuahna hla a ni.

“ Nunhlui min ngaih tirtu, zaleng zawngte lawina,

Run In mawi leh nuam, nghilhni i awm long e;

Hotel Moonlight, duhtin a kim i chhungah hian,

I sakhming iang Chhawrthlapui eng pawh khian,

I mawina kim a hril chhuak zo lo ve”.

 CFLA-a hian a hla thupuiah hian lamtawi leh sap\awng a hmang uar viau a, hei hi a hla ziarang zingah chuan sawi hmaih loh tur chi a ni awm e. Entirnan, ‘C te’, ‘CTei-2’, CMS vul zel rawh, Dan rualloh LD, LD Hmel\ha, Ka Star No.1, M&B, RMC, Roosna hmel\ha etc. tih te a hmang a. Mizote hi inkohna ah hian hming lamtawia inkoh hi kan uar a, nula tlangval inngaihzawnna thilah leh lehkhathawn velah pawh tunhma chuan hming puma inko lovin hming lamtawi hi kan uar hle \hin a ni. Chu zia chu a hla ah pawh hian a rawn lang chhuak a ni.

 A hla phuah pahnih ‘’Zawlkhaw Tleitir’ tih leh ‘Zokhaw Tleitir’ tih hla hi ha sawi lawk ila. ‘Zawlkhaw Tleitir’ hla hi Aizawl khawpui nula, nula tlema fel vak lo hmel\ha si a phuahna hla a ni a, khawpui nula hmel fai, han en thuak a mam pur mai, mahse hmangaihna pai lo a sawina hla a ni. Hetiangin ;

 

‘A sakruang leh nui mawi thlir chuan chhai sual mai a awl lua e,

Mahse, hmangaihna leh rinawmna pianpui thei hian a mawi si lo;

Nunrawng sakhmel tha leh lem ang der thiam nuimawi,

Nuthai chang lo ten zaleng tin chhai zel ang che’ tiin.

 Zawlkhaw tleitir hla letling chiah hian thingtlang nula ‘Zokhaw tleitir’ a phuahna hla a kan hmu leh a. Chu nula chu a hmel\ha in a zuna uai a na em em thung a, hetiangin ;

 

‘Hun leh ni herin khuarei chang mah se,

Bang thei hian ka mawi si lo;

Zokhaw tleitir di zun ngaih lunglen hi,

A zunleng ngaiin val ka uai zo ta;

Tang dang belhsan thei hian ka mawi si lo che,

Zokhaw tleitr, Di hmel\ha’.

 

A hma lama kan sawi tawh ‘Vul dun zel ang’ tih leh ‘Roosna hmel\ha’ a phuah dun ang deuh khan khawpui nula leh leh thingtlang nula a phuahna, hla inletling chiah a phuah leh hi a hlu ve riau a ni.

Tunhma hlaphuah thiam, ‘Father of Mizo Love song’ ti a an koh hial ‘ Fam Lalzova’ nen khan inanna tak an neih chu hla phuah an awlsam em em mai hi a ni. Khawiah pawh kal se nula hmel\ha leh ngaihno bei an hmuh chuan hla an phuah nghal zat thei mai a, an zunah an uai nghal em em mai zel bawk a. An hla phuah te hi hla thu \ha tak tak leh sak nuam tak an ni zel mai \hin hi an ropuina a ni.

 CFL Hmingthanga hla te chungchangah hian sawi tur tam tak a awm e. Amaherawhchu duh tawk dawn mai ila. A khaikhawmna atana ka sawi duh chu ‘CFL Hmingthanga anga hla phuah awlsam, hla thu \ha tak hmang si, hla sak nuam leh midang pawhin an sak pui theih, amah ngeiin a sak \hin hla’ phuah thei hi kan tlem hle a. A boral hnu kum engemaw zat thleng pawh hian kan la neih leh mang lo a ni. Hengte avang hian Mizo Literature \han chhohna zelah pawh hian CFL Hmingthanga hian hmun pawimawh tak a luah a, a hla te hi kan la zir chho zel dawn ni te pawhin a lang.

 A ni ang Mizo fate zingah kan lo nei hi kan vannei em em a ni.