Campus kan nun khua

-         Ruatpuia pa

Kum 10 a liam ta, Japfu Block B hnuai ber atangin hla pakhat a rawn piang a. Chu hla chu thianpa Maski-a’n kan u te ho thlahna tura a siam a ni a, hetiangin :

Thenna ni kawl a lo her chhuak ta,

Kan va ngai dawn che u em ve le e;

Zoram lam pana in kal, in kalin,

In thleng ang…

He hla hian tun thlengin Campus khawvelah hian sak a la hlawh a, an la sa chho zel pawhin ka ring deuh ! Helai hmunah hian hun kan hmang rei ve ta hle mai a, tunah chuan kan chhuahsan ve tak tak dawn ni te pawhin a lang ta.  Han chhuahsan dawn meuh chuan chhuikir tur a tam a, ziah chakawm tak tak te pawh a tam ve khawp mai. Ka lo tawn ve thil thenkhatte leh Campus mizia te han tarlang ta ila, tun min haw lawng chu maw ?

Super Six Bah kha le !

            SSB hian khatih laia kan mizia chu a tarlang ve thei riai ruai in a lang. Tumkhat chu Handique Volleyball tournament a awm dawn tih an hriat veleh Japfu mihrang ho an inhmukhawm a, tel ve zai an rel a. A hmingah Super Six Bah (SSB) an vuah a, lu hren vek tur an ti leh zel a, a hma lamah SSB tih ziak a ni bawk. SSB memberte hi an hming han tarlang ila a tha awm e. Khai aw – Maski(hlaphuahtu), Lawmzuala(Durtlang HSS Principal ni ta) Sawma (he thu ziaktu), Muantea(PUC Lecturer), Tetea (Dr Lalramliana nit a, PUC Lecturer), Mawitea(TRC Lecturer), Thatea(Thingsai Principal), Thangpuia(Ztu), JC-a. Anni bakah hian member engemaw zat an la awm bawk a, chung zingah chuan Vena(tuna RS) te chu Team dangah an tel tir thung a. Pu Roluahpuia (nau roluaha), tuna Boys Hostel Warden pawh hi a tel ve ta awm e. An inkhelh dawn apiangin hnam hla an sa thin a, an sak laiin che miah lovin mahni position a an awm dan ang theuhvin an awm thin a, an nui ngai lova an uang lo bawk. Mahse mipui ho an lo nui thung. Hnamdang ho tan pawh an hlawh hle nghe nghe a ni. Poster an tar a, Tlengparela pawhin a chhiar thin.

AMPGSU Newsletter

            Kum 1999 hma lam kha chuan mumalin Newsletter emaw chanchinbu emaw ang chi hi AMGSU hian a buatsaih ngai lo niin a lang a. Kum 1999 a han herchhuah meuh chuan AMPGSU pawhin hmel thar a pu a, chu chuan he AMPGSU Newsletter pawh hi a rawn herchhuahpui ta a ni. Helai hmunah hian Zofa zirlai engemaw zat kan awm ve tawh avangin han inauhkhawmnan leh thil inhrilh tawnnan a tangkai dawn a, inpumkhatna pawh a siam thei a lawm tiin hruaitu tharten ruahmanna an siam a. A pawimawhna hrerengin a enkawltu te pawh dinhmun sang leh vohbik chan an chantir a, Editor leh Joint Editor te phei chu AMPGSU Office Bearer chanvo an pe hial reng a ni. Editor atan min han ruat ve a, thla khatah vawi hnih tih chhuah tur a nih avangin Admnistartive Block –a Cyclostyle pu kha a buai thei khawp mai a. A chhuah apiangin Hostel Roll.Number tarlan thin a ni a, kha khan nula leh tlangval ho a tipumkhat em aw kan ti thin. Thla tin hian a enkawltute ho hian mit an len reng a, a chang chuan an kal kual bawk a, midang hostel a leng ngun emaw tlawh ngun ber emaw te kha an tlawh zin dan indawtin Roll Number an pe mai thin a. A bikin Vari(HBC Lecturer) leh Dr Lapuii(MZU Lecturer) te hian Japfu lamah Roll.No.1an innih chhawk deuh thin a, Sensiar lamah chuan mi chi hrang hrang hi an innih chhawk deuh ber, chung zingah chuan Muantea(PUC) te pahnih hi an lang leh nawlh thin. Saramati hostel hian nula ho a lem vak lo emaw ni chu aw ? kan tih laiin Persara nula ho hian a rukin an lo bawh zek chu niin. Chhuanlam eng engemaw avanga leng an awm nual a, Tape chhia leh Electric Heater chhia siam avangin Vena(RS) te hi Persara lamah an va lang zing hle bawk. Tumkhat chu Newsletter-a hnamdang ngaihzawng neih chungchang thuziak avangin mipa leh hmeichhe hostel boruak a alh phut mai a, mipa leh hmeichhe inkar a buai zo ta vek mai. Hmeichhe lamin mipa hostel an tlawh serh a, mipa lam erawh chuan an serh lem hlei lova. Mahse kar lohvah a reh leh mai a. A kum lehah chuan ‘AMPGSU Newsletter’ chu ‘Chhinlung’ ti a thlak a ni ta a, tun thlengin a la chhuak ta zel a nih hi.

Ramhnuaia kawngbo

Tumkhat chu chawlh a ni bawk a tiin thianpa Thatea nen kawmthlang luiah hian kan kal a, chakai khawrh pahin lui dung kan zawh thla zel a. Thui fe kan kal tawh hnu in kan han hawi chhova, ralkhata Old Guest House lo lang va va hi kan han hmu thei a. Tum aia thui kan kal tak avangin haw lamah chuan lui zawh tawh lovin mual dung zawhin kan haw a, mahse kawngbo in an bo tih an inhre lo an tih ang deuhvin a ni lo lam kan pan zel ni hian kan inhria a. Hostel lam kan han thlir a, ralkhatah a lang tawk mai bawk si a. Kal dan tur chhut pahin mual pawng laiah chuan kan thu a, chutih lai chuan Bak pakhat hi a rawn lang hlawl mai a. Thiam ang anga kan harsatna kan hrilh chuan kal dan tur min hrilh a, a lo hla khawp mai lehnghal a. Tlai thim dawnah Old Guest House bulah kan chhuak ta hlawl mai ! A chauh thlak khawp mai. Khatih lai kha chuan luikal hi kan intihhmuh angreng khawp a, chawlh hlekah chuan lui kal hi a ni deuh ziah mai a, nawm erawh a nuam phian. A khat tawkin hnamdang unau ho pawh hi picnic turin a hmei a pa in bungbel nen an inpu thla ve sek ta mai a, a bikin ralleng ho hian an uar zual.

Badarpur thlengin

Tum khat chu kum 2004 khan Shillong atanga ka haw chho chu, ka thil tawn tawh zinga theihnghilh theih tawh loh tur ka tawng a. Fur lai a ni a, Sonapur leimin in motor zawng zawng a dang a, keini ho pawh kawngah zan hnih lai kan riak nghe nghe a. Lei tawlh reng karah chuan an kal kai sup sup a, ke a kal kai ve kan han tum ngial a, chirh diak tawlh reng kara kal chu a lo a har hle mai a. Kan lung rah apiang chu a pil zel avangin a pil hma a a dang rah leh hman zel a ngai a. Kei lah chu bag nen vur bawm ka khai a, nihiap sei nen. A hma ni chiah ah hetianga kal kai tum vai pakhat a lo thi tawh a, keini pawh chuan chu chu kan hlat lo khawp mai. A chanve vel kan kal tawh tihin chhak lam atangin a rawn ri thla hum hum a, kal zel chi a nih tak loh avangin kan kir leh a. Kir leh lam pawh kal chak a har khawp mai. Kan kalpui pakhat chu a chesual tep a, kan chhan hman hlauh a, tichuan  him takin kan let leh thei ta a. A hnuah tlai dar 3 vel a ri tawh awm e, pawl 12 zirlai mipa 5 nen Shillong lam kir leh ngawt ai chuan tiin a helna kan zawng a. Lui chhak tlangah kan lawn a, tuna Motor kawngpui ep lamah hian han hawi chuan Jeep road a hmuh theih awm e. Chu kawng chu zawhin kan kal ta ngat ngat a, ruah a sur bawk nen, hmanhmawh ngai bawk nen. Hemi kawnga kan thil tawn leh Bak ho in min um thu te chu sawi tel lo mai ila. Darkar hnih vel kan kal hnuah lui kan zu pawh a, luipui lian luang dul dul chu lawngin kan kai ta a. Kuliang khuaah kan lut chhova, khua pawh a lo thim tan tawh a. Kawngpuiah kan thu hnawk a, sana ka’n en chuan dar 7 a lo ri der tawh a. Sumo pakhat rawn kal chu lo phar dingin chuan ve kan dil a. A chhungah seat a awm tawh loh avangin a chunga chuan kan duh leh duh loh min zawt a. Motor dang awm tawh hek lo, kan chuang ta a. Keini paruk bakah midang pathum an chuang ve bawk a. Kan thiante pahnih chu a hnungah an bet a. Kalain-ah engemaw zat an chhuk dawn a, chumi hnuah seat kan chan theih tur thu min hrilh a. Bungraw chungah kan thu a, invawn ngheh a ngai khawp mai. Meghalaya kawng tha chin a la ni bawk a, an tlan muang chuang si lova, kawng kawiah a hlauhawm thei khawp mai. Ruah lah chu a tla deuh siar siar leh nghal a. Kum 2000 khan Arunachal Pradesh - a thingtlang kawngah thiante ho nen Bus chungah kan chuang tawh bawk a, mahse khang te kha chu la nuam tak a ni. Kalain thlen hlan kan nghahhlelh tlan teh reng nen kan han thleng chu beisei loh deuhvin tumah chhuk tur awm lovin kan tlan tlang ta daih mai a, beisei a bo khawp mai. Mi kawng kal lah chuan min en duh khawp mai lehnghal a, Badarpur-ah kan thlen chuan a chhungah kan thu leng ve ta. Hetih lai hi Cellphone chhuah hma kha a ni a, chhungte biak pawh theihlohin ni thum leh zan 3 kan awm a, min ngaihtuah nasa khawp mai.

Chinlung thuruk !

Tlai khawhnuah Chhinlung thuruk hai tet turin Pu Nunga’n hmun min lo buatsaih sak a. Pialral theology atanga sakeibaknei hahum dan thlengin kan inhlui ta a nih hi ! He Chhinlung hian thuruk a lo ngah viau chu niin nitin deuh thaw hian ruahtham loh hi theh tur kan nei thei reng a, a han hlimawm thei khawp a ! He Chhinlung puk-ah ngei hian Sakeibakneiin bu a khuar a, a pa chhar chhar thei khawp mai.

Pu KC-a leh U Mapuia te in anloh zia leh an inchhun si zia te hi sawi tham a awm a. Zuala’n nikhata bawnghnute  a in zin zia leh U Amuana’n a in rei theih thin zia te, MSU hotupa a nih avang maia U Arama’n a personal daktawr a neih thu te, U KC-a’n nupui neih hma hauha naupuak a thiam si zia leh a puak hnem theih zia te hi sawi tham a awm. Pu Nunga’n lam kawr bik (DJ Nite a hak chhuah chi) a neih thu leh a inhnuai pa in lak no thin zia te, U Vena’n damlo enkawltu enkawl a thiam zia te hi sawi chian law law a chakawm thin. Dr Sama’n candidate nih a tlin zia te leh rawlthar Ab-a’n hostel awmtu a awm thin thu te hi min fuihpawrtu awm se chuan aw ..  Mahse he chhinlung thuruk hi puangchhuak tura ruat chauh loh chuan tuman an puangchhuak thei lo ang, engtikah mah.

Aw Krismas , ka damchhungin ka nghilh lawng che
-Dr Malsawmliana

Var\ian a ni a, khua a la thim deuh a, leilung erawh a lang \an vel tawh a. Ka harh hlawl mai a, tukverh ka han d^k deuh a, kan piah lawka Darlung tl^ng leh Darlung pa, Pu S^tz^uva fu huan vel pawh a lang deuh rii riai tawh a. Ka han harh chiang deuh a, choka lamah chuan ka pa thawm ka hria a, a lo tho daih tawh chu niin. Kan Tape Recorder hlui tawh tak a\ang chuan Siampuii Sailo Krismas hla a lo zai tir ruai ruai mai a,
‘Ram thianghlima lal lo piang chu,
Chunglam arsi chuan a rawn zui a,
Mifing amah zawngtute chuanin, arsi chu an en a......’
...lung a va han ti leng tak em ! Khaw en \an tirh a ni a, \henawmte pawhin an nin ka ring lo, a harh tawh an awm chuan an mut hmun a\angin  an ngaithla ve ngeiin ka ring a, rilru in Bethlehem lam a hawi a, zing khaw vawt nen a va inhmeh tak em ! Tunhnuah hian ka ngaihtuah chhuak fo \hin a, hmana mi ang khan var\ianah han zai tir ve a, mut hmun a\anga han suangtuah kir leh hi ka chak \hin. A sap\awng takin han ‘feel’ veng veng hi ka ch^k \hin.
Nu leh pa te thawmhnaw leia Aizawl kal an rawn haw a, thim hlimah tuikhur k^wnah kan lo hmuak a. Meipui chhemin tuikhur kawnah kan lo awm deuh \hup mai kha a ni a. Sipai motor lem te, sudden muanga hmaikawr te an rawn hawn a, pistol lem leh a k>p te, water pistol te an rawn hawn a. Kan puak ri \huai \huai zel mai kha a ni a, Krismas zet chu a va nuam \hin tak em !
Urlawk zanah Chow kan tumin kan han thawhkhawm ve a, pack 1 Rs. 2/- a ni a, a \henin tel an thawh a, pawn thim thamah kan inzui ve dat dat hlawm \hin a. Puanhlap b^t chungin thim thamah kan inchhuih khut khut zel a, vawt erawh kan hre meuh lo.
Ruai \heh laiin vawksa thau, kan ei ngam loh te kha sarangah kan fun khawm a, zan lama chow kanna a telh atan kan ti a, kan ak haw rui \hin. Ka pi hian zan reiah artui hi \henawmte ta a lei a, a puanhnuaiah hian a thukru \a\ \a\ lai hi ka mitthlaah a la cham reng mai. Enga tan tak chu ni ang maw kan ti a, a tuk zinga kan khum mawnga dawhthlak kan dawh kan han en chuan thlengah balloon te, artui te, chhangban te, chithlum mum te a lo awm ve rui \hin.
Krismas ruai \heh ni a ni a, chawhma lamah naupang ho kan inhawr khawm a. Ruai \heh na tur hnah la turin kan liam dawr dawr a. Hnahthial hnah hlai pui pui te chu kan t>l khawm a, hrui fei chi (thian hrui)kan chhat a, lian pui puiin kan tel a. A zawnna tur thing tuai kan sat a, hnah tel lian pui pui chu zawn theihin kan siam a, a hma lamah hrui zenin a pawhna tur kan siam bawk a. Naupang 20/30 rual velin kan zawn a, nuam ve tak a ni. Chutah khua kan han thleng a, fatu hovin duhsak takin thingpui leh kurtai nen min lo hmuak a. Chu mai a la ni lo, mipui nawl pui ei hma in fatu ei rualin hnah la ho min han ei hmasak tir bawk a. Khatiang baka duhsakna sang kha a awm chuang lo.
Engtik kum nge ka chiang ta lo, Krismas lawmna ruai kha kan nawn chho zel a, kumthar a hnai ta kuar mai a. Chutah Kohhran hovin Pathian hmingin tiin ramchhuah an rawt mauh mai a, phur takin an ramchhuak ta a. Keini naupangho chuan kan lo nghakhlel khawp mai a, chutah le thawm kan hre ta. Sazuk lian pui an kap a, a kaptu pawh Pu Chhuanga an rawn ti chu a hmuak turin kan tlan nghal a. Lian hi kan han ti khawp a, kha sazuk tluka lian kha ka la hmu lo ang. A hma lamah hruiin kan pawt ve a, kan haw haw hluah hluah mai a, nuam hi kan va ti tak. Sazuk sa ngeia Krismas ruai han nawn te kha a ropui dangdai viau mai.
Krismas urlawk leh a hma ni velah \halai ten Krismas thing an phur a, kan kawt  zawn, mual-ah an keuh v |um khat ka la hriatreng chu, kan Biak In enkawltu Pu Zuia hovin khaw daiah kan kal a. Krismasa Biak In cheina tur pangpar kan la khawm a. Tlangsam par te, derhken te kan la a, Biak In cheinan kan hmang ta kha a ni a, a uai fur mai a, a nalh ve viau khan kan hria a. Khatih lai khan Biak in chei te kha naupang kutah an dah nge ni, ka hre fiah ta lo.
Samlukhai a\angin B^wng an kai a, a chang leh L^wi an kai a. An rawn haw dawn ni a, kawtchhuahah thingpui nen kan lo hmuak ve ngei bawk a. A talh dawn ni ah tuikhur bulah kan kai phei a, silaiin an kaphlum ta \hin a. Hmuhnawm a tling a, a hlimawm bawk a, a phurawm \hin bawk a, kan tlan tawn chhen mai kha ni maiin ka hria. Tlaiah ruai kan han \heh a, mual-ah thlangra an khawn khawm a, kan kil p Thlasik lai a ni a, kut leh ke a ch^t a, hetiang hunah chiah hian kut ch^t chu a inthlahrunawm \hin. Thlangraah kan han kil a, kan kut ch^t kha a lang chiang ta \hin si a, inthlahrung deuhin chaw kan b^r ta \hin a. A nalh loh bakah a nuam zan \hin lo bawk.
Keini naupang ta na na na chu, zanah Krismas thlengtu te inah kan han zaikhawm a, kan han lam der ve vak zel a. Tumkhat Pu Dotawna te in niin ka hria, Krismas zaikhawm kha ka la hrereng mai. Krismas kawr tharte kha a d^wn ni ah an han \hui zo chauh mai te kha a va nghahhlelhawm \hin tak em. |umkhat chu Aizawla kan pem chhoh tawh hnuah, kan khuaah Krismas hmang turin kan kal a, ka pheikhawk thar tur kha  ka pa ten Shillonga mi min chah sak a. A lo la thleng mai si lova, Pheikhawk thar tel lovin kan khua kan pan ta a, rilru a va khingbai tak em ! mahse Krismas hma in a lo thleng ve ta hlawl a, Beatleshoe a ni lehnghal a, \hiante chuan an ^wt ve khawp mai.
Naupan laia Krismas kan hman dan thlir let te hi a lunglen thlak a, Krismas ti hlu tu leh ti nuam tu, ti lunglenthlaktu a ni a, kan la ngai zual zel dawn niin a lang.

KAPHLEIA THUFING SAWMHNIH PAKHAT
- Dr Malsawmliana

Kan fak lutuk eng em aw! tih ngaihdan chu ka nei na in thu \ha tak tak erawh a phuh chhuak nual lawi si a. A thuziak hrang hrang a\anga thufing leh \ha deuh deuh ni a ka ngaih te tarlan ka chak deuh a. Mihring kan intehna ber hi ka thilsawi leh kan nun, kan thiltih a inmil em ? tih hi a ni a. Chumi tehna a\ang chuan Kaphleia erawh teh hleih theih a ni lo thung. A chhan chu a thu sawi tam tak hi tihhlawhtlin a duh viau nachungin vanduaina avangin natna khirh tak a tuar a, chu chuan a duhthusam leh ngaihtuahna te chu a tihhlawhtlin tir thei lo.
Awm hmun a\angin, natna khum a mu chungin thluak fim tak erawh a hmang a. Bengsikin a ngaihtuah a, a chang leh thingtlang lam hmasawnna a ngaituah a, a changin faina leh hriselna lam, a changin sumdawnna lam thlir reng bawk a. A ngaihtuahna ril ber leh thuk ber luah rengtu ni a lang chuan Zoram hi a ni. Zoram hi kan piputen nasa taka an lo hum leh ral lakah pawh an lo venhim hram hram a nih avangin \hangtharte hian a humhalh hna leh a enkawl zelna hi kan kovah kan nghah a ngai, tih hi a ni reng \hin.
Khawvelah hian thusawi ropui tak tak hriat tur leh sawi chhawn tur tam tak a awm a. Kan thusawina leh kan infuihna apiangah chutiang thusawi leh \awngkam ropui tak tak te chu kan sawi chhuak \hin. Midangte cho phur nan leh fuihnan a \angkai em em a ni.  America President ropui, Abraham Lincoln-a’n November 19, 1863-a Gettysburg hmuna a thusawi ropui tak "Democracy is government of the people, by the people, for the people, shall not perish from the earth’ (Democarcy chu mipuite ta, mipuite siam leh mipuite tana ding’ ti a a sawi te hi tun thlengin kan la sawi lar a. America President 35-na, John F. Kennedy-a’n President a nih hnuah a thusawi hmasa ber (Inaugural Address), January 20, 1961-a a thusawi hmingthang tak ‘ My fellow Americans, ask not what your country can do for you, ask what you can do for your country’ ( i ramin eng nge thul \ha a tih sak theih che inzawt lovin, i ram tan eng nge i tih ve theih inzawt zawk rawh) a tih te hi a va ropui tak em! He thu ropui tak leh Kaphleia thuchah ‘Keimah leh keimah ka rilru a, ‘khawvel hi eng nge ka hnutchhiah ang? Ka ram hi eng nge ka hnutchhiah ang?’ a tih leh ‘Tupawh keimah anga mahni leh mi dang tana thiltha tih tum lova, ral thlir mai mai mi chu a ram tan fapa tlaktlai lo, hrin man awm lo a ni ang.” a tih te hi a va inzul tak em ! Ngaihtuahna thuhmun a\anga rawn chhuak a ni.
A thuziak hrang hrangah te a hian ngaihtuahna ril leh thinlung lungliam, ‘thuril’ leh ngaihtuah zui tham \hahnem tak hi a awm ve a, chungte chu han tarlan a chakawm deuhva. Heng thu te hi a thuziak - Thlirtu, Ui leh Kurtai tih te a\anga lak chhuah a ni.

1. “Kel te, minit khat leka amah thattu tur kuta chi a liak a, a zuang zek zek angin kan tawp dawn thlenga hlim taka kan awm theih chuan malsawmna ropui tak kan dawng a lo ni.”
2. “Kan chunga thil thleng tur kan hriat lawk theih lohna hi Pathian thilpek ropui a ni.”
3. “|henkhat chuan kum hlui aia mi \ha zawk lo ni turin thil tum ropui tak nen kum thar chu \an tum tlatin an inbuatsaih a. Mi \henkhat chuan kum hluia an vanduaina te, hlawhchhamna te rulh lehna an ngaihtuah a, \henkhatte chuan tun hma lama an hmingchhiatna thup lehna tur an ngaihtuah lawk a. Tun hma lama dik lohna siam \hat theihna ber chu tun hnua thiltih \hat (leh) hi anih avangin”.
4. “Mihring hian englai maha duh tawk kan ngah lohzia leh kan tunlai awm dana duh tawk kan ngah loh avanga lunglenna te kan tuarzia leh kan intihretheih zia ka ngaihtuahin, mihring hi eng nge kan nih? Engkim duha engmah hmu tlak si lote kan ni, thil ho mai mai umin kan intibuai a, kan chan chheteah hian kan lawm mai tur a ni.”
5.  “Thil \ha tih tur hre reng si a, ti si lo chu, hre lova ti lo aiin a leh hniha hrem tur a ni.”
6. “ Mi reng reng hnu lam ngaia lunglenga kun reng a, hma lam en tum lo chu a ram tan a \angkai lo vang. Miten thil \ha an ngaihtuah a, an thawh laia lo ui tui lian thlir reng mai chu thil dik lo a ni.”
7. “Thil ropui tak tak tih kan tumin kan ngaihtuah vel a, mahse Pathianin a duh duhin a \hiat leh thei a ni. Chuvangin, kan suangtuah leh kan duhthusam te hi a tak a lo thlen hma loh chuan kan ringin inhnem nan kan hmang mai tur a ni lo. Vawiin a\angin naktuka awm dan tur kan hre lo. Engtianga nasa pawhin ngaihtuah ila, kan dung hi tawng khat pawhin kan puntir thei bawk hek lo.”
8. “He retheihna leh manganna te hi hriatnain a tihreh theih a ni.”
9. “ Mi tinin hriatna leh thiamna tlem kan neih phawt chuan mahni \anghmaa kaih \heuh tur a ni.”
10. “An nun dan letling zawng zawng hi hriattir turin tu nge mi fing huaisen lo chhuak ang ?” (Thingtlang mite a sawina)
11. “Thingtlang mite hi mi ngawichawi tak ang an ni. An kiangah miin thu sawi sawi mah sela, a dik nge dik lo tia thu chik an tum lo va, an zawt bawk hek lo. Khawvel siam\ha tu nih theih pawh an inring hek lo.”
12. “An hriat lohna avangin an zingah dawt sawi leh thutiam bawhchhiat a tam. Mahni inzah a pawimawhzia an hre lo.” (Thingtlang mite a sawina)
13.  “Mahse thil \ha pakhat mah ti lova ka liam tur chu pawi ka ti a ni.”
14. “Khawvel hi englai pawhin siam that a ngai reng a, that lutuk tih reng a nei lovang. Mi fingte thu leh mi \ha leh taima thiltih hian a vawng \ha hram hram a ni a.”
15. “Kan dam rei leh rei loh te hi kum te, thla te hian a hril lo ve, kan thu leh kan thiltihin a hril ber zawk a ni. Mi kum tam tak nung mah se, thenawm khawveng tan, a ram tan leh khawvel tan thil tha a tih si loh va, thufing a sawi si loh chuan tu nge a dam hria ang? A thih ve leh mi ten an theihnghilh nghal ang. Mi fing leh mahni ram tana thil \ha titute erawh chu khawvelah hian nung rei lo mah se an thih hnu pawhin an nung reng ang; chu chu a ni dam rei chu.”
16. “Keimah leh keimah ka rilru a, ‘khawvel hi eng nge ka hnutchhiah ang? Ka ram hi eng nge ka hnutchhiah ang? “
17. “ Hnahthel ro ang in ka tla bo mai dawn em ni?” tia ka inzawh hian chhan har ka ti a, ka lungngai thin a ni. Mi tin pumpelh theih loh thihna chu ka hlau lo va; thlan thim pawh ka hlau hek lo. Mahse, khawvelah thiltih tur pawimawh tak tak a tam tehlul nen, pakhat mah ti lova ka liam tur hian min tilungngai ber a ni.”
18. “Tupawh keimah anga mahni leh mi dang tana thiltha tih tum lova, ral thlir mai mai mi chu a ram tan fapa tlaktlai lo, hrin man awm lo a ni ang.” 
19. “Ui hi mihring tan \hian \ha tak leh hmantlak tak an ni.”
20. “Mihring zingah zawng, vanneih leh hausak laia \hian \ha kan tihte chu vanduaina leh retheihna a lo thlen hunah tlansantu leh hnung lama kawk zuitute an ni leh \hin; lungngaihna tizualtu leh sawichhetu an ni leh \hin.”
21. “ Hriselna lamah sawiselna a awm thei e, mahse kawng tam berah kan ei luat vang a ni thei a ni. Damdawi meuh pawh ei luat chuan thihna a ni thei.”

ZONUN PARAH NGEI VUL DUN RIAL RIAL ANG

- Dr Malsawmliana


Chhimphei Group Conference hman pui turin kan kal a, Pu Sohnela leh Maubuang pa lar, Pu Malsawma ten min karcheh ran chungin ‘Thlang sap pui tui ang lo lian mahse, Zonun parah ngei i vul dun ria rial ang aw,”  tiin an aw tih nalh  theih ang berin min han zai khum a. An thiam chu ka ti hran lova, mahse an tui dun hle thung a. An hla sakah an tui a, Pu Malsawma phei chuan he hla lo pianchhuah dan leh a tul ang zawng zawng chu nileng zankhua sawi tur a hria a, a ngaihnawm khawp mai.
He hla hi Vangchhia ah Archaeological Survey of India in ‘Kawtchhuah Ropui’ National Importance-a a puan lawmna hunah Hnahlan tlangval  Thangromawia’n min han sak khum leh chiah mai a. He hla in a hma a ka rilru a ngaihtuahna thui tak min siam chu a rawn kaitho leh chiah a. Hetih lai hian nitin eizawnna lamah zirlaiho hma a ‘Imperialist historiography leh  Nationalist historiography’ ka zirtir lai vel a lo ni chiah bawk nen ka ngaihtuahna a luah thui hle mai.
He hla hi zaithiam fam ta, CFL Hmingthanga phuah a nih thu chu ka hria a, amaherawhchu chiangkuang takin  ka bel chiang lem lova, ka thiante pahnih zarah hian ka belchiang ta chauhva.
“Sappui doral tui ang lo lian mah se, Zonun parah ngei vul dun rial rial ang aw” tih lai thu hi a ropui angreng viau mai. He thu phuah chhuak tur hian Mizo pa rilru put a ngai a, hnamdang aia mahni hnam chawisanna thinlung chhungril ber a\anga lo chhuak a ni.

“Aw a mawi chuang ngei, aw kan Zoram nuam hi,
Ka hril seng lo che aw zai leh lamin,
Pi pu mihrâng dairial chang tawh hnu ten,
Biahthu an rawn hlan e thang leh thar te,
Vawng zel r’u aw zonunmawi tlawmngaihna min ti.”

Hmanah ziak mi fam ta, Prof Siamkima khan “Rih Dil leh Mizoram” tih a lo ziak tawh a, kha thu ah khan Jordan lui leh Rih Dil chungchang ziakin kan ramah Jordan lui (Kristianna/khawthlang nun) a rawn luang lut a, Rih Dil (Mizo nun/sakhaw hlui) nena an in buan dan te, Kristian sakhua in Mizo sakhaw hlui a hneh tak dan te ngaihnawm takin a lo ziak tawh a.
Kum 1890 a British in min awp a\ang khan Kristian sakhua te rawn lutin sap nun kan tem chho \an a. Khawvel eng kan hmu a, India ram mai ni lo, khawvel hmun hrang hrang kan dap chhuak ve ta. Zirna leh hnathawhna avangin Mizoram kan pel a, kan ngaihtuahna leh khawsak zia te pawh khawthlang nun in min chiah piah ta hle   mai.
India chuan British lak a\anga inlakchhuah tumin nasa takin a bei a, 1947 ah zalenna a hmu ta a. British in min awpna leh min rahbehna chu India  mi ten nasa takin an do let a. Sap ho thilsiam te an hmang duh lova, a aiah mahni thil siam leh kutkawih ngei chawi sangin ‘swadeshi movement’ te an kal pui a. Pu Gandhi a pawhin ‘Khadi’ a uar chho hle bawk a. Heng zawng zawng hi sapho dodalna tura an hmanrua vek a ni. Sapho do letna tur khan mahni thil ngaihsan leh chawisan an thupui ber a ni a, chumi tur chuan an infuih a, tharum hmanga an beih bakah   rilru leh ngaihtuahna sengin nasa takin an infuih reng bawk a ni.
Chutiangin Sialsuk pa,  Lal\anpuia chuan ‘Kan ram hi kan ram a ni’ tiin Mizoram hi a lo chawi ve mek bawk a. Mizoram hi India ram bung khat ni lovin mahni ngeiin kan ding tur a ni, an ti a. ‘Indian’ nihna chu ‘Mizona’ in kan bei  let a. Hnam pasal\ha tam takin nunna an chan a, kan ram leh hnam dinchhuahna tura ngaiin an tha leh zung, an nunna hial an lo chan tawh a ni.
Tachhip tlangval, Kaphleia chuan ‘Zoram, ka ram, lu chhum ban chhum huama kan pipute sah zau’ tiin kan piputen ral laka Zoram an lo chhan dan a tarlang a. A pianna ram chu ram rethei leh chhengchhia, hmuhsitawm mai mah nise a tan chuan a hlu ber fo thin.

‘Riakmaw  angin  kawl pawh vel ila,
Sappui tual nuamah pawh leng ila;
Ka muanna thing thiang I ni,
Ka rinpui leh ka chhuan I ni.”

Pu Thangkhuma’n ‘ka haw dawn kan tih chuan Zoram kan sawina a ni fo \hin’ a lo tih ang deuhvin khawi hmunah pawh awm ila, kan ram Zoram hi kan ngai a, kan au vawng vawng \hin. Hei lo hi ram kan nei lova, hawna tur ramdang kan nei chuang lo. He ram hi a ni kan piputen keini \hangtharte chenna tura lu chhum ban chhum huama an lo sah zau, duat taka an lo enkawl chu ni. Chu ram chu, tuna YMA ten humhalh kan tum tak zel hi a ni. Hmana Mizo hnam, sap pui leh thlangkawrvai laka tlawm ngai lo hnam kha tunah hian a tlawm mai bik dawn lo.
  
“Ram chhan vanga nun pek huam kan ni ngai e,
Kan hmaih \helh ngai love riangvai chanhai;
Unau-za kan ni e nang leh kei hi,
Lenna tlang leh mualte lo dang mahse;
Chhuahna Chhinlung Zofaah kan dang chuang si lo.”

Hnamdangin min chim a, ramdangmi ten min hual ve bawk a. Hetiang karah hian hnam te zawk leh tlem zawk te chu inkaihhruaina \ha an neih loh chuan  chim ralin an awm thuai \hin.  Khawthlang nun in min chim mek a, kan ngaisang a, an nih ang nih kan tum a, nupui pasalah hial neih kan hreh ta lo. Sap nupui pasala neih chu Mizo zingah intihtheihnan kan hmang ta a, hnamdang nupui pasal nei kan sawi chuan kan rilru in vaiho a kawk bik a, sap leh mingo kan kawh tir phal lo. Hnamdang nupui pasala neih te hi hnam rilru pu tan chuan ngaihtuah ngam pawh a ni lo. Hnamdang nupui pasala neih hi intihmuh chi a ni lova, intihhmuh loh chi a ni zawk. Hei hi punna aiin hnam ralna kawngka a ni.

“ Mahse maw hnamdang nun zia kan chawi sang zel,
Kan Zonunmawi kan hnawl mai dawn em ni;
Rinawmna leh dikna par an chuai,
Thlang kawrvai lian ten min chim buai mahse ;
Nghilhni ka nei lo’ng che ZONUNMAWI kumtluangin.

Sap nun kan la a, an neih ang neih kan tum a, an khawsak anga khawsak kan tum. Incheinaah kan entawn a, kan neih in a tlin tak tak si lo. Neih in a tlin baka khawsak kan tum a, hei hian kan Zonun nasa takin a tichhe ta. Mahni intodelh hnam kan ni a, tunah erawh chuan kan tla chhe ta deuh em aw ! ka ti. Khawvel changkanna nasa tak avangin Zonunmawi kan kal san tial tial a, hengte hi loh theihloh avanga kan kalsan awm bawk mahse kan taimak tawk loh vanga kan kalsan a awm nual bawk.
Chuvangin Mizo hnam, hnam huaisen leh intodelh hnam kan nih hi chhawm nung zel ila. Kan pipute sah zau kan ram neih chhun hi humhalh ila,  hnamdangin min chim tur hi inveng reng ila; kan zonunmawi hi sap nun leh khawthlang nun hian a chimral i phal lovang u.

‘Zonunmawi par ang lo vul zel ang che,
Than lai bang lo te a rinawmna vawng zelin;
Sappui doral tui ang lo lian mah se,
Zonunparah ngei vul dun rial rial ang aw.’