“Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hialin a chhun thei a; thinlunga ngaihtuah leh tumte hi a hre nghal thei a ni.” Hebrai 4: 12

Ringtute tan Pathian thu hi kan hmanrua leh inhumhimna a ni a, kan chaw tui ber leh pur chawkna a ni. Chaklo te tan chakna a ni a, harsatna leh manganna neite pawhin Pathian thu atangin hahdamna an chang thei. Ringtu in Pathian thu atanga a mamawh a lak loh chuan a chak thei lova ringtu tha a ni ngai lovang. 

Pathian thu hi ringtute nun kaihhruaina bu a ni a, kan nitin nun hman dan tur min zirtir tu, thenawm khawveng leh midangte nena nunhona chungchang engkim min hrilhtu a ni. 

Chutihrualin Pathian thu hi ringlote tan chuan beih tham, nat pui theih a ni. Bible sawi chhiat te, tihbawrhbangte hian chhiatna a thlen duh fo. Khandaih hriam tawn eng ang ai pawh hriam a ni a, thling phel hrang thei khawp hiala thiltithei a ni bawk. 

Hetiang khawpa thu ropui, innghahna tlak kan nei hi Ringtute kan vannei I ak zet a ni. I ngaihlu zel ang u. 

( 07.09.2026)

 “ Chuvangin, chung thil laka mi a inthiarfihlim chuan bungbel thianghlim, Lalpa hman tlak, hna tha tinrenga inpeih sa, ngaihhlut tur mi a ni ang.” II Timothea 2:21

Kan taksa hi Pathian In a ni a, Pathian thlarau chenna a ni; chuvangin kan tihkhawloh chuan Pathianin a tikhawlo ve ang ( I Korinth 3:16) tih kan hmu a. Pathian hian amah be tur leh a rawngbawl tur chuan thinlung thianghlim, bungbel thianghlim a mamawh. Amah a thianghlim avangin thil thianghlim lo te , ngaihtuahna tha lo te, rilru ngil leh dik te a duh. 

Keimahni chu eng dinhmunah pawh ding ila, khawsak a hniam emaw a sang emaw pawh a ni mai thei; Pathian thu kan hriat chin pawh a inchen lovang, Pathian tana kan inpekna chen pawh inchen lo a ni mai thei e.Mahse Ani chuan rilru thianghlim a duh ber.

Chuvangin kan nih ang angin bungbel thianghlim, Lalpa tana mi hman tlak nih tum ila. Sual zak kep tun leh thiltha lo te bansan chuang lo kan nih chhhung chuan kan rawngbawlnain awmzia a nei ngai lovang. 

Lalpan a rawngbawl tur chu a duh tui a, rilru leh tihtakzeta Amah betu a zawng a ni. 

(31.08.2026)

 “Lalpa, nangmah ngei hi a ni mahni chauh pawha him taka mi awmtir thin hi ni.”

Sam 4:8

Hla thuah chuan “  Isua nen chuan In nuam a chang zel ang,”  tih kan hmu a, khawi hmun pawh hi Isua tellohna a nih chuan hmun nuam a awm lo. Khawvel ropuina leh nawmsakna te, hausakna te hi chu kan damchhung pawh a daih lo, mitkhap kar lekah a boral thei.

August 26,2026 ah Nepal leh China inrinaa Trishul lui chu thawklehkhatah a chhak lam atangin chirhdum leh hnawlin a rawn chim thut mai a. Lui dunga khaw awm engemawzat a chhilh a, mi 1000 dawn an thi a, mi 2000 chuang chin hriat lohvin an awm bawk a. A rapthlak tak zet a ni. Mihringte hian kan hma lam hun kan hre lo khawp mai. Khawvel thil hi engmah kumhlun tur a awm lova, kumhlun tur chu kan Pathian chauh hi a ni. 

Chuvangin innghahna tlak Pathian hi bel ila, kan mangan leh harsat lai ber pawh min thlamuantu, him taka min awm tir theitu chu Amah chauh hi a ni. 

“ Nangni thawk rim leh phurrit phur zawng zawngte u, ka hnenah lokal

ula, keiman ka chawlhtir ang che u“  Matthaia 11:28

(30.08.2026)

 “ Hlau suh u. Awm hle hle mai ula, Lalpa chhandamna, vawiina a thawhsak tur che u hi en ngawt mai rawh u. Vawiina Aigupta mi in hmuhte hi kumkhuain in hmu leh dawn tawh lo ve. Lalpan a dosak ang che u a, nangni chu in awm hle hle mai ang.” Exodus 14:13-14

He thu ka rilruah a cham reng a, ka taksa a harsatna a awm tih kan hriat hnuah chhung inkhawm kan neih hmasak bera ka chhiar a ni a. Chhung inkhawm bu a khami ni a chhiar tura an lo dah kha a ni nghe nghe a. 

Mihringah chuan thil thleng ngaihnatawmloh tak mai kan hriat rualin Pathian hnena tluk luh mai loh chu tih tur a awm lova. Mihring leh khawvel thilin min thlamuan ve thin mahse, engmah a nih loh zia kan hriat hnuah a. 

Israel fate Aigupta atanga an chhuah hnuah an hmaah Tuipui Sen a lo inkham ruah mai a. Mihringin han dai kai rual a ni lova, hleuh kai theih pawh a ni lo. Tuipui sen kamah mangang takin an ding thup ringawt a. Chutah an hnungah Pharoa sipaiten an rawn um bawk a, Israel fate tan tlan chhuahna tur a awm lova, beisei tur dang a vang hle a ni. Anmahni hruai chhuaktu Mosia an mawhchhiat a, mangang leh khura an awm chungin an phun nuai nuai mai bawk a. Pharoa sipaite an rawn hnai zel a, Tuipui Sen lah a luang cham put mai si a. 

Chutah chuan Mosia’n Pathian a au va, Pathianin hei leh chen a hruai tawh a, a thlahthlam dawn lo tih a hria a. “ Pathianin chhandamna hna a thawh tur hi thlir tawp mai turin” a ti a, a mite chu a thlamuan ta a. 

Pathianin Mosia hnenah thu a pe a, a tiang chu tuipui chunga lek turin a ti a, tui chu a laiah inthenin Pathian thiltih mak hmangin Israel fate chuan chhandamna an chang ta a, Aiguptaho chu kumkhua atan a len bo ta a ni. 

Pathian ringtute tan chuan eng harsatna leh manganna pawh lo thleng se, Amaha rinna kan nghah phawt chuan a chhandamna leh awmpuina kan chang thin. 

(29.08.2026)

 “ Engahmah mangang suh u; engkimah tawngtai leh dilin, lawmthu hril tel zelin; in duhnate chu Pathian hnenah hriattirin awm zawk rawh se.” Phillipi 4:6

Pathian hnenah hian dil ngawt lovin lawmthu hril tel zel tur kan nih zia i hre thar leh ang u. Chutihrualin “ kan duhnate leh mamawhnate” chu thlen fo tur kan ni bawk a; “ dil rawh u, tichuan in hmu ang; kik rawh u, tichuan an hawn sak ang che u” a ti ve bawk a. Pathian hian kan sawiloh pawhin kan mamawh chu a hria, mahse A phut ber zawka chu “ Amah be tur leh A hnena tawngtai turin” a ni. 

Amah kan dil a ngai a, kan biak pawh a phut a, Amah kan ngaihsak a phut ve bawk. 

Chuvangin nitina Amah be tur leh lawmthu hril hi ringtute mawhphurhna a ni a, chu chu kan nunna hnar pawh a ni.

“ Tichuan, Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a ven sak ang che u.” 4:7

(29.08.2026)