HMASAWNNA IN MIZO HNAM CHIN DAN A THLAK DANGLAM TE

-          Dr Malsawmliana

 

            Mizo rama Kristianna a lo luh tirh lai vel khan ringtu hmasa te chuan Kristian zirtirna nena inmil lo ni a ngaiin kan hnam zia leh nunphung tam tak chu an thlah nghal a. Kristian zirtirna chuan Chhandamna thu mai ni lovin, mihring hriselna thu te, tawngkam hman chungchang te, nun thianghlimna thu te leh puithuna chungchangah te inzirtirna a keng tel a. Mizo khawtlang nuna thil pawimawh tak leh a lova awm theih loh tluka ngaih Zu te pawh Kristianna chuan a hnual suat a, hemi in a ken tel Khuang te pawh zu hmun sa hmuna hman thin a nih avangin hun engemaw ti chhung chu Biak Ina lakluh pawh an phal lo hial a ni. Hetiang a nih avang hian ringlo leh ringtu inkarah harsatna a awm thin a, Lal thenkhat chuan an khua atanga ringtu hnawhchhuah hial te pawh an nei a ni. Chutiang chuan Kristian te chuan an nunphung tam tak an thlak a, Kristianna nena inhmeh lo leh inmil lo ni a an ngaih chu an bansan a, nunphung thar thenkhat an nunpui chho ta a ni. 

Kristianna in kawng tinrengah hmasawnna a rawn keng tel a, zirna leh hriselna lam pawh Zosap te hian an rawn luh pui bawk avangin karlovah Mizo te chu Kristianah kan inlet ta vek mai a. Kan hnam chuan hmasawnna kawngpui a zawh tan ta a ni.

Kristianna leh khawvel thila hmasawnna hian hnam nunphung tam tak thlak a nei a, chungte chu kan duh reng vang ni lovin kan khawsak phung nena inmil tawh loh vang a ni ber. 

Tunhnaiah kan hnam nunzia leh chin dan thenkhat, a bikin chhiatni a kan insawngbawl dan chungchangah khawpui lam chuan kal san a nei ta nual a, thenkhat erawh kan khawsak nena inmil tura her rem te pawh a awm bawk a. Chungte chu  a tlangpuiin han tarlang ila :

Khawhar In riah :

            Kan hnam nunphungah chuan mi an thihin an chhungte khawhar tur riahpuiin tlangval puanthuah khai te chu hun engemaw chen khawhar inah an riak thin a. Khawhar chhungte chu a tul tul an thawh pui a, tuichawi, thingphurh, buh den leh tul dangte an thawh pui a, khawhar chhungten an thlamuanpui thin hle a ni. A tlangpuiin khawhar in riah hun chhung hi ruang thlak zan atanga zan sarih chhung an riak deuh ber a, hei aia rei riak tura ngamtlak insawm te pawh a awm thin bawk. 

            Tunhnaiah khawsak phung a lo danglam hret hret a, inriak chungchangah pawh zan thum vel tinzawn a ni ta a.  Hetianga hun engemaw chen kan kal hnuah  Aizawl khawpui chhunga veng laili tak pakhat, Zarkawt Branch YMA chuan an veng dinhmun enin kum 2006 khan an vengchhunga mitthi an awmin khawhar chhungte tlawmngaia riahpui thin chu an titawp ta a. Hei hi mi tam tak chuan a hunlai chuan an hrethiam lo a, sawi leh sel pawh a tam hle a ni. Amaherawhchu, hun a kal zel a Aizawl khawpui chhunga veng tam zawk chuan Zarkawt tihdan zuiin khawhar in riah an titawp ta hlawm a. Tunah hian Aizawl khawpui bikah chuan khawhar in riah hi ching an awm meuh tawh lo mai thei e. Hetianga khawhar in riah tihtawp chhan hi inriak tur tlangval awm tawh loh vang te, khawhar chhungten riah pui ngai lo a an inngaih tawh vang te,hmelhriat loh midang riahpui ai chuan chhungkua a riah khawm te an lo duh tawh zawk avang te, tul hrang hrang avanga riak tur tlangval awm tak loh vang te leh chhan tam tak a awm thei ang.

            Hmasawnna kawng hrang hrang avangin Mizo nuna chin dan mawi tak pakhat, khawhar in riah chu Aizawl khawpui leh khawpui thenkhatah chuan a lo bo tan ta a ni. Hetih lai hian Mizoram hmun dangah chuan kal pui zel a la ni thung.

Zualko tlan chungchang :

            Kan pipute hunlaiah chuan chhiattawk an awmin chhungkhat laina hrilh kual turin khualkhuaah zualko an tlan thin a. Tlangval tlawmngaite chu kal hmasa nih inchuhin an liam zung zung thin a ni. He chindan mawi tak hi inbiakpawhna tha awm hma thleng khan kal pui a ni a. Tunhnaiah inbiakpawh zung zungna tur Telephone te a lo awm ta a, Television hmang te in puanzar theih a lo nih takah hian a hranpa a Zualko tlan kher a lo ngai ta lo a. Chhiattawh chungchanga Zualko tlan chu a lo tawp titih ta a ni.  Hei pawh hi duh reng vanga tihtawp ni lovin hmasawnna in a aiawh tur a rawn ken vang a ni. Tuna thangthar tam tak hi chuan Zualko awmzia pawh an hre meuh tawh awm lo e.

Thlan laih chungchang :

            Kan pipute atanga chindan leh tun thleng pawha kan la chin dan chu mitthi an awma thlan laih hi a ni a. Tunhma chuan a hranpa in thlanmual an nei lova, a remchang laiah an inphum mai thin a. Dai hnaiah te, kawtchhuahah te, Lal chu Lal inkawtah te, hlamzuih chu inhnuaiah te  an inphum mai thin a ni.

            Thlan laih chungchangah hian a bikin Aizawl khawpui chhunga veng hrang hrangte hian harsatna an tawk nasa hle a. Thlanmualah inphumna tur hmun awl a awm tawh lohhlawm avangin thlanmual thar an nei sup sup a, thenkhat chu Aizawl khaw pawnah te a ni hlawm a.  Hetiang a nih avang hian zingkara thlan laih mai theih lohna a tam ta hle a, veng engemaw zat chuan hnatlangin thlan an lai lawk a, a khuhna tha takin an siam a, thenkhat chu hlawhfa ruaia thlan lai te pawh an awm tawh awm e. Aizawl khawpui chhungah thlanmual tur ram awl zau a awm tawh loh avangin hla tak takah thlanmual neih a lo ngai tawh a, hei hian thlan laih chungchangah pawh harsatna a thlen nasa a, nakin lawkah chuan tlawmgaia thlan laih hi a bo thuai in a rinawm. Kan pipute duhloh ‘ thlan laih lawk’ leh ‘thlanmual sam fai’  te pawh a tul na in a nang chho a, loh theih loh a ni ta zel a ni.     

Thlanmual chungchangah hian Mizoram khawchhak lama khaw pakhat,Chawngtlai khua hian kum 1924 khan a hranpa ngatin Thlanmual an lo nei tawh a,  anni hi Mizorama thingtlang khaw zinga thlanmual nei hmasa ber niin an inchhal nghe nghe a ni. Hetih lai hian Aizawl veng hlun tak, dawrpui veng chuan kum 1910 atang khan tuna an thlanmual hi an lo hmang tawh a, anni hi thlanmual nei hmasa an ni awm e. Kum 1929 khan Pu Makthanga, Aizawl lal chuan khawtinin a hranpa thlanmual neih a tul zia ‘Mizo leh Vai chanchinbu’ ah a ziak a, hei hian Sawrkar lam pawh a kai harh a nih hmel a. A kum 1930 ah chuan Lushai Hills Superintendent, CGG Helme chuan thlanmual neih chungchangah thupek a chhuah ta a, hetiangin - 'Tun chinah lal khaw tinten mitthi an phumna hmun Thlanmual, a hranin nei sela a țha em em a ni. Khawlai thler leh kawngka bul lawka mitthi phum hi a țha lo a ni. Tun chinah khaw daiah mitthi phumna hmun Thlanmual hmun a hranin siam tawh tur a ni. Thupek anga siam lo an awm chuan a pawi ang. Tuikhur a luanglut thei lo lamah ni rawh se' tiin.  (Mizo leh Vai Chanchinbu, May 1930) Hemi hnu hian Aizawl Mission veng chuan thlanmual an nei nghal a, anni hi Thlanmual nei hmasa an ni bawk awm e.

Mitthi chhungte puala thil khawn :

            Pipute hunah leh tun thleng pawhin mitthi chhungte hi thing phurh sak te, tui chawi sak te leh a tul tul hna thawh sak te hi chindan mawi tak a ni a. A hnu leh deuhah mitthi chhungte tana buhfai leh thingfak te an khawn leh thin bawk a. Heng hi khawhar chhungten hun engemaw chen hna an thawh theih loh avanga inchawmdawlna a a ni. Aizawl khawpui chhungah chuan thingfak khawn a lo harsat tak avangin buhfai No 2/1 te khawn a ni ta a. Hei hi Aizawl khawpui chhung veng tam takin an la kal pui bawk, hetih lai hian Buhfai leh pawisa cheng10 te emaw khawn an awm bawk. Veng thenkhatah chuan a hranpa a buhfai khawn lovin Bag 2/3 te emaw an lei a, khawn aiah khawhar chhungte an hlan mai tawh bawk.

Laina hnaiin Kuang zawn :

            Thlanmual pana Kuang zawn hi makpa te leh laina hnaite tih tura dah thin a ni. Hei pawh hi a tih hleih theih ta meuh lo a, Aizawl khawpui chhunga veng engemaw zat chuan hla tak takah Thlanmual an neih avangin kuang pawh motorin an phur ta zel a. Makpa leh laina hnaiin zawn hleih theih pawh a ni ta lo. Chutihrualin heng hi makpa mawhphurhna a ni tih hre lo hi a tam zawk kan ni awm e.

Darkhuang vuak :

            Hei hi chu kan chin lohna a rei ta deuh. Tunhma chuan mitthi an awmin khaw chhung inhriattirna hranpa a awm lova, khawchhungah tlangval tlawmngaiin Darkhuang vua in an kal kual thin a. Chutianga dar ri an hriat chuan mitthi in lamah an kal  khawm nghal thin a ni. He thil hi tunhma kan pi leh pu ten an lo chin thin dan a nih leh nih loh a hriat lohna in mitthi awm thu hriattir nan hman thin a ni. Tunhnuah hian vengchhung inhriatpawhna turin PA System te a lo awm tawh bawk a, darkhuang vua a kal kual chu a lo reh ta a ni.

Kuang siam lawk :

            Hei hi chu chin dan ban san lam ni lovin chin thar a ni thung. Hmanlai chuan kuang siam lawk chu sawi loh, thlanmual sam fai ringawt pawh an duh ngai lo a ni a. Tunhnuah hia chuan mitthi sawngbawl chungchangah hian tunhma a chin ngai loh thil thar kan ching nasa ta hle a. Hei hi tulna hrang hrang avanga lo inhmakhua lawkna a ni deuh ber. Tunhnuah hi chuan Aizawl vengtin deuh thaw hian Kuang siam sa engemaw zat an nei lawk deuh vek tawh a, mitthi an awm pawhin awlsam tak leh rang takin kuangah an indah zung zung thei ta a ni.

            Hmanlaia kan pi leh pu huna tlangval tlawmngaiten an tlawmngaihna an lantirna tam tak heng zualko kal, khawhar in riah leh a dang tam tak te chu hmasawnna avangin a ngai lo tial tial a, hemi kawnga tlangvakte mawhphurhna a kiam kan tithei ang.Chutihrualin tunhma aiin tunlaiah mitthi an tam fe tawh a, mihring kan thahnem tawh avangin nitin mai hian chhiattawk an awm ta zut mai a. YMA leh khawtlang hruaitu tan chuan a awlsam zawnga ruahmanna siam chu tihmakmawh a ni thung.

            Chuvangin khawvel hmasawnna avanga hnam nunphung a inthlak hret hret hi chu hriatthiam kan zir a tul awm e.