YMA tana mi hlu C. Vulluaia

 

Rambuai avanga YMA in hun thim a tawh hnua YMA din thar a nih theihna atana ngaihtuahna sengtu leh Central YMA in Pisa mumal a neih theihna tura sulsutu C. Vulluaia chuan kum 2026 Khuangchawi thla ni khat ni khan min her liam san ta. YMA khawvel a ngui ruai a ni ber e.

Pu C. Vulluaia hian kawng hrang hrangin Mizo mipuite hmelhriat a hlawh a, Politics ah phei chuan tum thum lai MLA lo ni tawhin Minister hial a lo ni tawh bawk a. Mizote zinga Solfa thiam hmasa, Zosap hnuaia zir leh College of Music London in Certificate a pek niin Mizo Zaipawl chanchinah sulhnu langsar a hnut chhiah a; chanchinbumi a ni bawk a. Dan hre mi a ni bawk. Mizote hmasawnna tur hian a phak tawkah ngaihtuahna a seng nasa a, hnam tan pa chhuanawm tak te zinga mi a ni.

Kum 1965-1968 chhung khan Mizoram buai avangin Central YMA pawh a kal hlei thei lova, member pum huap inkhawmpui ( General Conference) pawh an nei hlei thei lova, hruaitu pawh inthlan theih a ni lo bawk nen. Hemi kum 4 chhung hian hruaitu ngai ten an hruai tluan ta a. Kum 1969 ah hruaitu thlan that a ni a, Pu C. Vulluaia chu Finance Secretary atan thlan a ni a, anni hunah pawh rambuai avangin duh angin thil a kal tluang thei bik lo nge ni, kum 1969 - 1971 chhung hian hruaitu ngai ten an hruai tluan leh bawk.

YMA hi mimal emaw in an duh anga an kaihhruai pawl ni lovin huhovin a kaihhruai pawl a ni a. Thu ngaihtuah tur reng reng hi Committee in a ngaihtuah a, an rel ang angin YMA chu a kal mai thin a.

Tun tuma Pu C. Vulluaia’n YMA tana a lo beih ve tawhna te tarlan kan tumah pawh hian hruaituten an rel ang zela hma a lakna leh YMA tana mimalin ngaihtuahna a lo sen tawhnate tarlan kan tum dawn a ni.

Central YMA in Pisa nghet a neihna tura sulsutu  :

A hma lam atang tawhin YMA General Conference ah YMA Pisa nghet neih an lo rel tawh thin a, a hlawhtling hlei thei lova. Kum 1972 Conference ah chuan Pisa nghet leh thawktu nghet neih an rel leh a. Hetihlai hian Pu C. Vulluaia hi Assistant Secretary a lo ni tawh a, Nehru Yuvak Kendra ( NYK) ah Youth Coordinator hna a chelh mek bawk a. NYK hian Aizawl Theatre Hall ( tuna Vanapa Hall) chungah Office an nei a, an hotupa CYMA Assistant Secretary a lo ni bawk nen remchang deuhin NYK Office a pindan pakhat chu Central YMA Pisa atan a ruahman ta a. Tichuan Central YMA in Pisa nghet a neih ve theih phah ta a ni. Chumai ni lovin, Pu Vula hian hun engemaw chen chu CYMA Pisa a thawktu hlawh chanve a tum sak nghe nghe a ni. CYMA Pisa a thawktu nghet atan Pu H. Zoliana lak a ni a, May, 1973 ah a thawk tan. Theatre Hall-a NYK Office behchhana kum 4 vel lai an awm hnuin vanduaithlak takin May 17,1977 ah thliin an office chu a nuai chhia a. MacDonald Hill-a Pu Lalchungnunga Inah NYK Office chu an sawn a, CYMA Pisa pawh a keng tel ta zel a. Hemi hnuah Vanapa Hall hnuaiah insawn lehin April 4, 1992 ah tuna Central YMA Office, Tuikhuahtlangah hian sawn a ni ta a ni.

YMA History ziaktu Pu C. Vanlallawma chuan heti hian a ziak a, “ Hetia Office a nei hi YMA chuan a hahpui lem lo. Sorkar lamah Pu C. Vulluaia’n tan a la a, Central Sorkar Social Welfare Department atangin Pisa enkawlna tur a hai chhuak a, 1974 atanga 1984 thleng khan Central Sorkarin a rawn enkawl a. Kum 1985 atanga tun thleng (1996) hian Mizoram Sorkarin YMA Pisa hi a enkawl ve ta thung a ni. Thawktute hlawh chungchangah Sorkar puihna avangin YMA ko a zang deuh ngei a, Pisa sak lai erawh hi chu YMA in a hah pui hle.” tiin a ziak. ( YMA History 1935-1996, p.57)

YMA in Pisa nghet a neih hnuah thawktu te kha ‘ YMA Worker’ tih an ni a. Sawrkar hna hming LDA/LDC han tih ve mai awm tak kha a ni a, mahse Zoram puma YMA member singthum chuang zet tana thawktu tur a nih avangin “ YMA Worker” tih kha a mawi kan ti a, kan hmang zui ta a ni a ti.

YMA Chanchinbu bul tan tu :

Tunhmain YMA hian a hranpain chanchinbu a nei lem lova. Kristian Tlangau Bu ah te, MZP Chanchinbuah te leh mimal chanchinbuah te a bet ve mai thin a. Hetianga midang chanchinbua beh reng hi a lo remchang reng thei bik lova, kum

1971 a YMA General Conference chuan YMA Chanchinbu chhuah an rel a, chumi bawhzui chuan Central Executive Committee chuan ruahmanna siam turin One Man Commission dinin Pu C. Vulluaia an ruat a. Ruahmanna a siam chu :

i) Chanchinbu chu October 1973 atangin chhuah nise,

ii) Khawl - Press a chhut ngei nise

iii) A hmingah YMA Chanchinbu tih nise

iv) Pu C. Vulluaia leh Pu H. Zoliana’n bul tum se

v) Thla tin chhuah nise

He a ruahmanna hi August 25, 1973 a CEC thukhawm chuan a pawm a, chumi ang chuan October, 1973 atangin YMA Chanchinbu chu chhuah a ni ta a, amah C. Vulluaia chu Editor hmasa ber niin kum 1976 December thleng Editor ah a tang a ni. Hetih lai hian Central YMA ah hian General Secretary a ni bawk. Tun thlengin YMA Chanchinbu hi thlatinin a la chhuak ta zel a ni. A ruahmanna siam anga kal a nih avangin a hming “ YMA Chanchinbu” pawh hi ama phuah tih tur a ni ngei ang.

 

YMA Life member 2-na :

Kum 1973 June ah YMA Life Member nih theihna dan siam thar a ni a, Life membership fee pawh Rs.25/- bituk a ni. A thihni a a chanchin an ziahnaah Pu Vula hi “ YMA Life Member rawt chhuaktu” tiin ziak a ni a. An rel kuma YMA General Conference a an khuallian, Pu PB Nikhuma Minister chu Life member hmasa ber an nih tir a June 11, 1973 ah ziah luh a ni a, Pu C. Vulluaia hi a pahnihna niin ni 20.06.1973 ah a inziak lut.

Man a tawk….

Rambuai lai a nih avangin mipuite lakah Sipai te an inluling nasa thin a, pawisawilo kutthlak chingte pawh an awm bawk a. Ni 18.10.1974 zanah Pu C. Vulluaia, Central YMA General Secretary chu a chenna inah man a ni a. Ani bakah hian midang te pawh an man bawk a. A tukah an chhuah leh mai a. Mahse hetianga mipui ti thlabar zawnga chetna duhlohna leh an mi man te chhuah tura ngenna atan CYMA, MZP leh AMSF ten Joint meeting neiin ni 23.11.1974 ah Aizawl khawpui chhungah kawng an zawh a. Central YMA President Pu Lalnuntluanga’n Prime Minister hnenah lehkha a thawn nghe nghe a ni.  [C. Lalropuia, YMA Chanchin, 1985, pp.54-55]

Sub - Hqrs YMA Lunglei dinna kawngah….

Central YMA Committee in a rel angin Lunglei ah Sub - Hqrs YMA din dan tur ngaihtuahin Pu C. Vulluaia chu General Secretary a nih angin November 22, 1973 ah an tir phei a. Hemi tum hian ‘Adhoc’ in Sub Hqrs YMA chu an din ta a, hruaitute pawh an inruat nghal bawk a. A kum leh YMA Day, June 15, 1974 ah Sub- Hqrs YMA, Lunglei chu hawn a ni ta a, a hawnnaah pawh hian Central YMA atangin amah bawk a va tel leh nghe nghe a ni.

YMA Emblem chungchang :

A thih ni a a chanchin ziahnaah, “ YMA Emblem hi a kutchhuak a ni a, Central YMA hmun humhalhtu leh ramri kham fel tu” tiin ziak a ni a. Kum 1972 ah YMA Emblem atan rawtna khawn a ni a, lawmman atan Rs.300/- an phal bawk a. Mi engemawzat in an duang a, Engineer te pawh duang ve turin an sawm hial a. Pu Vula chuan, “ a tawpah chuan Duty a ka zin, Serchhip khuaah tuna kan nu ni ta te Inah ka cham muang a. Chutah chuan Emblem tuna kan hman tak hi ka thai chhuak ta a ni” tiin a sawi. [C. Vulluaia, YMA leh Kei, YMA Chanchinbu Ruby Jubilee Souvenir, 2013]

A bik takin Central YMA ah chuan General Secretary hi Office hmun thu leh lehkha lut leh chhuak te, inrelbawlna kawng engkima a khaipa a ni a. Pu Vula pawh hi ngaihtuahna seng mi a ni a, YMA inrelbawlnaah pawh hian langsar lem lo ah pawh hnuhma a nei nualin a rinawm.

Pu C. Vulluaia hian Central YMA Office Bearer mawhphurhna kum 9 zet [Finance Secretary 1969-1971, Assistant Secretary 1972-1973,  General Secretary : 1973 - 1977] a chelh chhung hian YMA kaltlanga ram leh hnam rawngbawlna kawngah a theihtawp tak meuh a chhuah a. Khatihlaia hruaitu a nih puite nen an thawhhona a tha bawk a, inlungrual takin rambuai avanga YMA chau tawh chu din thar leh hna an thawk a ni.  Mimal anga YMA tana a thawh hi sawi tur tam tak a awm a, a hruaitu nih pui tuna la dam te pawhin sawi tur an nei tam ngawt ang.

YMA tana mi hlu, kawng tam taka YMA tana sulsutu Pu C. Vulluaia kan hrereng ang a, a hmingah YMA a dai tawh lovang.

Heng thu tawi hmang hian YMA tana sulsutu Pu C. Vulluaia hi ka’n han thlah ang e.