Kum 1979 khan Maryland state-a Bethesda khuaah Penne Laingen chuan an kawta thingkungah Ribbon eng lian pui hi a tar a. Chutihlai chuan a pasal L. Bruce Laingen, Acting Ambassador chu Iran khawpui Tehran-a US Embassy a Iran helho (militants) ten an hren mek mi 53 zingah a tel a. Engtik nge an chhuah ang tih pawh hriat a nih loh avangin Penne-i chuan a pasal lo haw hun a nghahhlelh zia leh a lo haw hunah lawm taka a lo dawn sawn tur zia lan tir nan he Ribbon hi a lo tar a ni.
Hla lar tak, “Tie a Yellow Ribbon Round the Old Oak Tree” tih hla a ngaihthlak atanga a pasal lo haw tur lawm nan he Ribbon hi tar a ni. Kum 1981-a a pasal leh mi 52 te an lo chhuah thleng khan he Ribbon hi a tar.
A hnu zelah Gulf War 1991 laiin a tar leh bawk a, a fate pahnih indonaah an tel veleh avangin. A hnuah ribbon hi US Library of Congress- a American Folklife Center ah an hlan a, tun thlengin mipui hmuh theihin pho chhuah a ni.
Vietnam War lai, October 1971, khan Chanchinbu a thuziak thin, columnist pakhat, Pete Hamill chuan New York Post chanchinbu ah "Going Home" tih thupui hmangin thawnthu a ziak a. Chutah chuan Jail tang chhuak pakhatin Brunswick, Georgia state a a haw kawngah kawng sira Oak thinga rawmawl eng intar a zawn thu a tarlang a. Chu thawnthu tawi chu a hnuah Reader Digest chanchinbuah chhuah nawn leh a ni a, chu thawnthu behchhana hmang chuan L. Russell Brown leh Irwin Levine te chuan “ Tie a yellow ribbon round the old oak tree” hla hi an phuah ta a ni. A hlaah hi chuan rawmawl eng(yellow hankerchief) hmang lovin yellow ribbon an hmang thung.
He hla hi kum 1973 velah khan hla lar tak a ni tawh. He hlaah hian mi pakhat kum thum zet mai Jail tang in a chhuah hunah a nupuiin a lo la hmangaih reng a, lawm taka a lo la pawm duh a nih chuan an in kawta Oak thingkungah ribbon eng lo tar turin a chah a. A lo tar lo a nih chuan Inah pawh lut lovin an In chu a kal pel mai dawn niin a hrilh a. Tichuan chu pa chu Bus in an in lam panin a haw a, a awm loh rei tawh avangin a nupuiin a lo la pawm duh ang em ? Ribbon Eng a lo intar ang em? tiin hlauthawng takin a haw a, hawi pawh hawi chhuak ngam lovin Bus khalhtupa hnenah chuan kawng sira thingkungah ribbon eng a awm leh awm loh en pah turin a hrilh a. Chutah an In zawn an thlen chuan ribbon pakhat mai ni lo, thingkung tin maiah chuan ribbon Eng 100 lai a lo intar ta chhuai mai a. A nupuiin a lo la pawm a ni tih a hriat chuan mak a ti a, a lawm bawk si a. A hrilhhai letling zawk mah a ni awm e.
Kum zabi 19- na lai vel khan American nu thenkhatin an pasal te US Cavalry a tang ral rama kal te laka an rinawm zia leh an chhuan zia lan tir nan an samah ribbon eng an kilh tel thin a. Hetianga an chin thin avang hian kum
1917 velah “ Round Her Neck She Wears a Yeller Ribbon" tih hla a lo chhuak a, a hnuah “ She Wore a Yellow Ribbon tih film a chhuak bawk a.
Kum 1970 chho velah chuan mipui vantlangin an pasal te rammu emaw Jail tang te laka an rinawmna lantirnan ribbon eng hi an hmang ta zel bawk a.
USA ah hian Ribbon eng hi ram tana nunna chan huama inpe te leh nunna hlan tute zahnan an hmang thin a, an sipaite an thlawp zia lantirnan an hmang thin bawk.
Kum 1991 a Gulf War lai pawh khan American ho chuan an sipaite an thlawp zia lantirnan Ribbon eng hi kawng sir thingkungah an tar nasa hle a, “ support our troops” tih thupui hmangin an tar chuai chuai mai nih kha.
- Prof. Malsawmliana
No comments:
Post a Comment