“ Hlau suh u. Awm hle hle mai ula, Lalpa chhandamna, vawiina a thawhsak tur che u hi en ngawt mai rawh u. Vawiina Aigupta mi in hmuhte hi kumkhuain in hmu leh dawn tawh lo ve. Lalpan a dosak ang che u a, nangni chu in awm hle hle mai ang.” Exodus 14:13-14

He thu ka rilruah a cham reng a, ka taksa a harsatna a awm tih kan hriat hnuah chhung inkhawm kan neih hmasak bera ka chhiar a ni a. Chhung inkhawm bu a khami ni a chhiar tura an lo dah kha a ni nghe nghe a. 

Mihringah chuan thil thleng ngaihnatawmloh tak mai kan hriat rualin Pathian hnena tluk luh mai loh chu tih tur a awm lova. Mihring leh khawvel thilin min thlamuan ve thin mahse, engmah a nih loh zia kan hriat hnuah a. 

Israel fate Aigupta atanga an chhuah hnuah an hmaah Tuipui Sen a lo inkham ruah mai a. Mihringin han dai kai rual a ni lova, hleuh kai theih pawh a ni lo. Tuipui sen kamah mangang takin an ding thup ringawt a. Chutah an hnungah Pharoa sipaiten an rawn um bawk a, Israel fate tan tlan chhuahna tur a awm lova, beisei tur dang a vang hle a ni. Anmahni hruai chhuaktu Mosia an mawhchhiat a, mangang leh khura an awm chungin an phun nuai nuai mai bawk a. Pharoa sipaite an rawn hnai zel a, Tuipui Sen lah a luang cham put mai si a. 

Chutah chuan Mosia’n Pathian a au va, Pathianin hei leh chen a hruai tawh a, a thlahthlam dawn lo tih a hria a. “ Pathianin chhandamna hna a thawh tur hi thlir tawp mai turin” a ti a, a mite chu a thlamuan ta a. 

Pathianin Mosia hnenah thu a pe a, a tiang chu tuipui chunga lek turin a ti a, tui chu a laiah inthenin Pathian thiltih mak hmangin Israel fate chuan chhandamna an chang ta a, Aiguptaho chu kumkhua atan a len bo ta a ni. 

Pathian ringtute tan chuan eng harsatna leh manganna pawh lo thleng se, Amaha rinna kan nghah phawt chuan a chhandamna leh awmpuina kan chang thin. 

(29.08.2026)