Mizo Pasaltha te khawvel

Hmanlai Mizo Pasalthate khawvel

-          Malsawmliana

Hmanlai kan pi leh pute huna pasaltha te pawimawhna kha tunlai hun atanga kan teh dawn chuan ral laka min veng tu Sipai huaisen ang hi an ni awm e. Sipai tih mai pawh hian a el pha kher lo ang. A chhan chu, ral laka khua venghimtu an ni satliah mai lova, khawtlang nun kengtu leh siamtu, nu leh pa zawng zawngin an fapa te pawh an len huna ni vek tura an duh kha an ni tlat. Chuvang chuan a ni naupangte an nih lai pawhin rallu an aih nikhuaah chempuia an sah tir thin ni.

Naupangho infiamna pakhat ‘Sakei lem chan’ hian naupangte rilru ah huaisenna leh tlawmngaihna nasa takin a tuh a, infuihna tha tak a ni. ‘Sakei lema chang naupang chuan a kawngah puan a hreng a, a puan hmawr sei lam chu sakei mei angin  a ngum zawnah a ti uia hnuang a, bawkvakin a kal a. Sakei tih danin naupangho awmkhawm chu an hriat loh hlanin a va zuan a, pakhat chu a zuan thlu a, daipawn lamah a hnuk sawn a. Tichuan a thiante chuan chhanchhuah tumin chem lem leh fei lemin an bei let a, an thianpa chu an chhanchhuak ta thin a ni.’ He infiamna hi a hunlaia pasaltha te nun chiang takin a pho lang a ni.

An khuaah pasaltha an thahnem chuan Lal ropuina a ni a, khawtlang an muang thin. Lal leh upa te thla a muang a, an lalna a nghet sauh thin. Chumai a ni lova, pasaltha ten an sakah te Lal an hleh thin avangin Lal in chawhmeh tui tha tha a hmeh theih phah a, chuvangin a Pasaltha te kha be chhe thei a ni lo. Tin, khaw khata Thingserh sat ngam tlangval an thahnem chuan ‘Lal khua leh tui chhan nan ka nun ka pe phal e’ ti an tam tihna a ni a, an thlamuang em em thin.

An tawnah lal lai,

Lalvung run lian pawhin;

Nghing zai reng rel lovin,

Muangten ning zu an dawn nilen.

Luidung khawkrawk karah ral bei tura pasaltha, silai pu chunga an han sawt per thauh thauh leh ralthah thisen kai hniang chunga mahni khaw lam an han pan chhak chhak te chuan khawtlang mipuite thla a ti muang a. Chutiang mi chu Lal pawhin hmuhnawm a ti thin a, a uanna ber pawh a ni. Kawng lehlamah chuan pasaltha huaisen ngah tur chuan Lal in a zir a ngai a, Lal sual leh hrawn hrehawm khuaah pasaltha an awm thei ngai lo. An pemsan daih thin. Chuvangin Lal leh a pasaltha te kha an thawhhona a that a ngai a, an in chawimawi thiam tawn chuan a hlawkna chu mipuiin an tel thin. Sabual Lal, Lalburha kha pa fing leh rorel thiam tak a ni a, kum 1877-1883 chho vel khan Berhbialah In 1300 vel neiin a awm an ti. Hetih lai hian pasaltha pawh a ngah a, a ropui vanglai tak a ni awm e. An sawi dan chuan ‘archhiar kailawnah silai a hmang a, vawk chaw thlengah darkhuang a hmang’ an ti. A ropui khawp mai. Heti em em a a ropuina chhan hi Pasaltha huaisen engemaw zat a neih vang a ni. Heng zingah hian Pasaltha Khuangchera pawh a tel ve nghe nghe.

Kawng lehlamah chuan khaw khat pasaltha te pawh hi an inel nasa thin a, Lal laka tlaktlum duh vang leh huaisen zawk nih duh vangte in an inel in an iner nasa hle thin. Chuvangin Lalin a duhsak lo deuh emaw a ti tha lo deuh emaw ni a an inhriat chuan khaw dangah an pem san daih thin bawk. Tumkhat chu Berhbial rama Thlengdar rama Thelret chu Parvatui Lal Lianphunga khaw pasaltha Khuangchera leh Neihthanga ten a hnai an lo sawk a. Chu chu Lalburha khaw pasaltha Lamsuaka ten an man a, khuaah an chhawm haw a. Mahse Khuangchera chu pasaltha ve tho a nih avangin an phuar bet ve ta lova. Lal te pawhin an ti tha hle a, a hnu ah an chhuah leh mai a. He thu hi an Lal, Lianphunga’n a lo hriatin Khuangchera chu an ti tha vak ta lo a ni ang, Khuangchera pawh chuan an khua chu nuam a ti ta bik lova. “Chhim khaw lianah ngei hming ka’n chher teh ang” tiin amah mantute khua Berhbialah chuan a pem lut ve ta a. Tichuan Lalburha chuan pasaltha huaisen tak pakhat a neih belh leh ta a ni. Amaherawhchu, Berhbialah hian Khuangchera hi a awm rei vak lo ni awm a ni, Sailianpuia khua Reiek ah a pem leh ta a.

                                   

Tin, pasalthate chu an sakah leh an dam laia an khawsak dan a zirin an thih hnu thleng pawhin pialral kai tura ngaih an ni bawk. Chuvangin hmanlai Mizo khawtlang nuna pasalthate pawimawhna kha a thuk hle a ni. Mizo piputen an dam laia an tum ber leh an chak ber chu thih hnua a Pialral kai kha a ni a, chu thih hnu nun ngaihtuahna chuan an dam lai nun nasa takin a khawih a, a kaihhruai kan ti thei awm e. Thangchhuaha Pialral kai hi an tum ber a ni a, amaherawhchu In lama thangchhuah ni tur chuan ei leh barah khawsa thei nih a ngai a, sial leh ran vulh dangah hmuingil a ngai bawk a. Chuvangin Lal leh awmthei deuh te chauhvin thang an chhuah thei a, mi naran tan thil harsa leh tih theih loh tluk a ngaih a ni. Amaherawhchu, khawsa thei ve lem lo, pasaltha ni si tan chuan kawng a inhawng zau hle thung. Pasaltha in ram lama thangchhuah thei tura ramsa kah tur bituk a kah chuan Thang a chhuah thei a, a thih hnuah Pialral a kai ve thei dawn a ni. Chumi a nih avang chuan pasaltha chu ramchhuah ve reng a ngai a, in lamah a awm tam ngai lo. A hun zawng zawng deuh thaw chu ramhnuaiah a hmang a, tin an khua kha leido nei an nih phei chuan raldo reng rengin hun an hmang thin bawk. Pasaltha Thangchhuah te chu an thihin Pialral a kai tura ngaih an ni a. Mitthi khaw kawtchhuah Zingvawnzawlah a sakah zawng zawng leh a aihnan a ran atalh zawng zawng nen an rawn ri phei bawp bawp a. Kawtchhuah nghaktu Pawla leh a nupui, Sanu-i te pawhin an lo hmu ngam thin lo a ni. Sa aihnana a Se talh te an rawn in si phei bawp nawpa, Sechal kiu ri nen ramsa nen an rawn ri hum hum a. Pawla te nupa pawhin mi ropui a rawn kal dawn tih an hria a, an lo inbuatsaih nasa thin hle a ni an ti.

Pasalthate nun kha a hahthlak a, amaherawhchu chawimawina an dawn thin kha chu a tunlai hun angah hi chuan Kumpinu Sawrkarin ‘kniighthood/Sir’ nihna a pek tluk leh India Sawrkarin ‘Param Vir Chakra’ a pek tluk zeta hlu a ni thung. An han rammu vang vang a, an ral thah chungah emaw a bulah emaw vawi thum a hming chhalin Bawhhla a’n chham vang vang a. Mahni ralthah chunga mahni hming chhala bawhhla han chham vang vang chu a ropui a, an tum ber pawh a ni reng a ni. A chhan chu ral an thah hian an thih hnuah chhiahhlawh tur an nei dawn tihna a ni a, an hming an chham hnan kher nachhan pawh a thih hnuah a ralthah (a chhiahhlawh) khan awlsam taka a lo hriat theihna tur a ni. Tunlaiah chuan miin zirna lamah Ph D a zawh ang vel a hlu ani mai thei. Hlawhtlinna tlang chhipa ding chungin hlado an chham vang vang mai a ni.

Chutah hlawhtling takin an rawn haw a, dai pawn hmun remchangah bawhhla an han chham ut ut mai a, ropui tak a ni. A tuk zingah nula hovin chhuang takin arkeziak nen an lo hmuak a, khawtlangin rallu an ai mup mup mai a. Hetianga ralthat, ai bawk chu khawtlangin an zah a, an ngaisang bawk a, an thlamuanpui bawk. Chuvangin a kalna apiangah chawimawi an hlawh a, zu hmunah phei chuan Nopui a dawm hmasa thin. Chu ringawt pawh chu hlu tak. Saikuti’n a chawimawi thiam hle :

‘Laimi man la, tanchhawn ka hlan ang che

Tualah leng la, lenrual su herin;

Nangmah hi maw lian khawpui chhan mihrang an hril chu,

Khawnlai dawn u, Tiau rala hnam len valte zawng chu.’

                        An lu ah ‘chhawn’ an han tawn ngauh a, an kawtah ‘hranghrual’ leh ‘kawkvahai’ an han tlar tuar(h) mai te chu an induh larh mai a. An thinur nikhua a inhrosak na ber pawh ‘Ka lu chhawntual, ka ban ralsamkuai’ tih a ni. An induh hle. Thli a thawt te hian an kawtah hranghrual te chu a in vaw ri thuau thuau a, chu chuan a ropuina a ti zual a, mipuite pawhin ropui an ti hle a ni. Hetiang dinhmun thleng tur hian an bei nasa a, mutmu pawh tuah hman lovin khawtlang him nan an thawk a, thih huamin an nun a thap tak meuh meuh a ni, chuvangin an chawimawina dawn hi inchhuan pui tham a ni reng a ni.

                        An rorum a, an huhang pawh a na hle a ni. Rammutna ah emaw ramvahna emaw reng reng an hlawhchham chuan a hnuah an kal leh ngat thin. Hlawhchhama haw an tum ngai lova, tlawm an tum ngai hek lo. Tumkhat chu Lusei lal hovin Halkha an rawt a, hetah hian pasaltha Thanghlianga a tel ve a. Thanghlianga hian a fapa hruai a tum chu a nupuiin a phal lova,  mahse ‘ sakeiin a note a thlauh ngai lo’ tiin a chhang a, a hruai ta a. Mahse Lusei hovin an inrin loh lai an beih thut avangin Thanghlianga fapa hi an that a, amah chu engtin tin emaw a haw thei hram a. A nupui chuan ‘Thanghliang, khawiah nge I fa?’ a lo ti vat a, a ni chuan ralin an that’ tiin a chhang a. Chutah leh a nupui chuan ‘sakeiin a note a thlauh ngai lo I ti a ni lawm ni?’ tih pahin a puanfen in a hem thuai a, ‘ I fapa phuba I lak hma chu ka bulah I mu thei lovang’ tiin order khauh tak mai a pe ta a ni. Pasaltha ve tak mai, a nupuiin a puanfen a a han hlap chu a la na khawp mai. A rang a rangin phuba la turin a chhuak ta nghal a ni. Heta tang hian Pasaltha te inrintawk zia leh huhang nat zia a lang a, an nupuite pawhin an thlamuanpui zia a lang awm e. Tin, nupuite pawnfen a vuak chu mipa tan tlawmna a nih zia a lang bawk.

                        Pasalthate kha an tlawmngai a, an ram an vei bawk a, thiante tan nun an hlan ngam bawk. An ramri chin ni a an hriat te kha chu theih ang tawkin humhalh an tum a, Cachar phai zawl lam te phei chu an veng tha hle a ni. Sap hovin thingpui huan an rawn siam te pawh an ngai thei lova, ‘kan sai ram chhuahna’ an ti a, an run mai thin a ni. Khatih lai khan nakin zela an thlahte tana ram hauhsak an nihna rilru kha an pu lo mai thei a, an ngaihtuahna ah pawh ‘nakina kan thlahte tan’ tiin an pu lo mai thei. Mahse an ram chin ni a an ngaih chu chan an tum lova, humhalh tlat an tum zawk a ni. Tin, ram leh hnam tan an inpek rual rualin thiante tan nunna an hlan ngam bawk. Tumkhat chu kum 1890 khan Mizoten Changsil kulh an kap a, hetah hian pasaltha Taitesena te thianzaho an tang khawm a. Mi nawlpui an haw hnuah Taitesena leh a thianpa Ngurbawnga te chu a hnukhawiah an awm a, sapho chuan Ngurbawnga chu a malpuiah an kap hliam a, a kal thei ta lova. Taitesena chuan a thianpa chu kalsan lovin a pua a, chutih lai chuan sapho chuan an rawn kaphlum ta a ni. Thiante chhan nan nunna a hlan ta a ni.

                                Ka ram ka hnam ka chi te,

                        An dam nan kei ti thin te,

                        Fam rolungmual an liam.

            Ziah tur tam tak a awm thei awm e. A tawp berah chuan Pasaltha te khan an hun zawng zawng kha an khawtlang leh ram tan an thawk a, an huaisenna kha khawtlang a muan a, mipui an him thin a ni. Tarlan tawh angin indo reng an nih avangin Pasalthate pawimawhna kha a nasa em em a, pasaltha ngah lo khua te chu an dingchhuak zo lo reng a nih kha.