YMA Day a lo thlen hian

 “ Rualtin khum zaleng insiam, YMA sakhming an ko” ti a YMA sakhming chawia Mizo fate hla ropui min hnutchhiahtu, Pu V. Thangzama tellovin kumin YMA Day chu kan hmang dawn chu a ni ta mai si a, a ngaihawm vung vung  hle mai. Amah awm tawh lo mahse YMA a awm chhung chuan a hming hi a dai tawh lovang.

Hmanah pipu zaleng rual, sa leh ral thuam ang a do,

A chhingzo tur zaleng rual awmthei reng hian ka ring lo;

Hranghrui leng zamual an liam, amin tuaithar te an cho,

Rualtin khum zaleng insiam Y.M.A sakhming an ko.

Kumin hi YMA kum 91-na a lo ni ta reng a, kum 100 kan hlat ta lo hle mai. YMA kum 100 tlin lawmna tura Project lian neih tum tan chuan lo inhmakhua a hun viau mai.

YMA din tu, Zosap leh Kohhran hruaitu hmasa te, Mizo pa rawnkai tak tak ho kha an hma thlir a thui mang e. YMA ( a hming hmasa YLA) an din lai khan an rilrua lian ber chu Mizo hnam hmasawnna tur leh Kristian nun mila Mizo khawtlang nun kaihhruai kha a ni a. A din tirh laia khawtlang tana pawl tangkai leh hmachhuan ber khan kum 91 a lo tlin hnuah pawh a zepui hi a la hloh lova. Mizo hnam hmahruaitu leh kan innghahna a la ni reng hi YMA ropuina leh a dintute hmathlir thui zia tarlangtu a ni. Thangthar YMA memberte hian an hlut zia hi kan theihnghilh mai ang tih a hlauhawm.

Hruaitu hmasa ten an sawi fo thin chu ‘ Pathianin Mizo te rohlu min pek zingah YMA hi a hlu ber te zinga mi’ tih hi a ni. Tun dinhmunah hian YMA member hi 5,07,412 kan ni tawh a, mipa 2,96,005 leh hmeichhia 2,11,407.  YMA Dan Bu in YMA member lak dan chungchangah kum bithliah a nei lova, ‘Mizo tupawh, tleirawl/rawl thar chin chung lam’ ti ngawtin a dah a, hei hi kum 14 vel niin kan ngai ber a. Branch tinah member lak dan a inang diak diak lo, engpawh nise member a inziak lut lem lo pawh Mizo an nih chuan member ah kan inngai vek mai.

Tunah hian District 9-ah Sub-Headquarters 9 an awm mek a, Group 49 awmin Branch hi 831 awmin Mizoram chhungah Branch 774 an awm a, State pawnah 57 an awm thung. State pawn-ah hian Group 3 – Manipur, Shillong leh Tripura Group an awm a, Bangladesh ah Branch1 an awm bawk. Tunah hian State pawnah YMA din duh hi an awm chho zel bawk.  YMA hian hma a sawn zel a, Branch leh member pawh a pung chho zel a, hnam inpumkhatna atan pawh ke penna pawimawh tak a ni. Hnamdang hian YMA indin chhoh dan leh Mizo hnam tana a pawimawhna hi mak an ti a, an zir thin. Khawvel hmun dang atang leh India ram hmun dang atangin YMA hi an zir a, mak an ti a, Mizo khawtlang nunah hmun a luah dan hi ropui an ti thin. Heng zawng zawng hi YMA hruaitute vang a ni lova, memberte leh Mizo mipuite tanhona, hruaitu hmasa te hmathlir thui tak vang leh Pathian malsawmna a ni.

YMA nihna (identity) hlu tak chu ‘tlawmngai pawl, politics rawng kai lo’ a nihna hi a ni a, YMA member ah party mi kan awm lo thei lova, mahse YMA huangchhungah hian Politics lam mi pawhin party rilru an pu lut ngai lova, YMA takin thil an thlir thei thin hi YMA ropuina leh hlutna  a ni. Politics rilru inrawlhna avanga hruaitu lo ni chho an awm a nih pawhin an tlo ngai lo.

Zosap te leh Kohhran hruaitu, khawtlang hruaituten uluk taka an lo din a nih avang leh, tun thlenga a thiltum zingah pawh ‘ Kristian nun dan tha ngaihsan’ tih a la tel reng avang hian YMA hi Kohhran nen inngheng rialin a kal chho zel a, a inhlat tak tak ngai lo. YMA huangchhungah hruaitute kan infuih thinna ber pawh ‘YMA hruaitu chu Kohhran hlat mi a nih a rem thin lova, Kohhran bel mi a ni tur a ni’ tih a ni thin. 

YMA thuvawn ‘tanpui ngaite tanpui’ a nih tlat avangin khawtlanga tanpui ngai an awmin YMA chu a tlanchhe ngai lova, a thim a var pawh thlu lovin tanpui ngaite pui turin a che chhuak thin. Midang kutah a dah ngai lo a, midangin YMA kutah an dah thin zawk.  Lusun te hnem turin a pen chhuak thin a, chhiatni ah lusunte tan inhnemna leh innghahna a ni ve thin. Khawtlangah chhiattawk an awm chuan YMA chuan i he lovin a hun ruahman lawkte a thulh rih mai thin. Tunlaiah khawtlanga chhiatni a kan inngaihsakna tla hniam ta leh mitthi in/khawhar ina  lang ngai lo kan pung ta zel hi infuihthar a tul hle.

 YMA chuan khawtlanga sualna chi hrang hrangte chu midang kuta dah lovin a huai takin a hmachhawn thin a, Mizo hnam himna chu a ngaihpawimawh ber a ni. Mahni inlum pawh thlahlel hlei thei lovin zan khaw tairek thlengin sual do hna a thawk thin a, theihtawpin humsual dai te tan kawng dik a kawh hmuh thin. Kum 2025-2027 chhung hi YMA chuan Kumpuan atan ‘ Ruihhlo Do’ a puang a, kan ramah ruihhlo avanga harsatna kan tawh nasat zia leh kan chhiat pui nasat zia hi en liam mai mai chi a nih loh avangin YMA chuan ruihhlo a do reng piah lamah nasa leh zualin a do chho ta a. Tunah hian a bik takin a lo lut zel tur (supply reduction) ven kawngah Excise & Narcotics Dept, Police Department, Assam Rifles te nen theihtawp chhuahin hma lak mek a ni a. Mipuite hian ruihhlo do kawngah hian tih theih kan nei vek a, kan che chhuak vek thei lo a nih pawhin hmala tute thlawpna lo pek te, tawngtaipuite, thurawn pek te hi kan mawhphurhna a ni.

YMA hian kuang bik a nei lova Mizo hnam leh khawtlang nun thatna tur thil chu a ngaihvenin a hma zel thin a, chutihrualin YMA tih a mawi leh mawi lo erawh a thlir thiam thin.

A din tirh atanga YMA hi Mizo hnam tana pawimawh, hnam hmahruaitu leh Mizo khawtlang nun khalh tu a nih avangin a zuih zawnga a kal hi a rem lova, a vul zel theihnan kan hlut deuh deuh a tha awm e.

Lanu leng leh kan val rual, Zorampar chu nangni hi;

In partin vul a mawi zual, in par zu lah a thlum si,

Hnamtin dawnpui ka nuam e, khuai ang lawiin lo leng se,

Dawnin an ma bil lo'ng e, kir zai reng an rel lo'ng e.

 

YMA Day chibai vek ule.