MIZORAM HMA LAM HUN CHU ZIRNA SANGAH A INNGHAT

 - Prof. Malsawmliana

Kan thupui “Mizoram hma lam hun chu zirna sangah a innghat’ tih hi thupui sawi chakawm tak mai a ni a. Tunlai khawvelah mi zawng zawng hi zirna lama kan intlansiak chhoh mek lai a nih avang leh a bikin zirna sang (higher institution) te hi kan ram mamawh an la nih avangin he thupui hi a pawimawh hle a ni. Zirna hi kan nitin nunah leh mihring nunah hian a bet tlat a, naupangte atanga puitling thlenga kan nun nghawngtu a nih avangin ngaihthah theih a ni lova. Mihring nunkhua siam tu leh nghawng tu lian tak mai a ni.

“Vawiina zirlaite hi naktuka ram leh hnam hruaitu turte an ni” tiin  America President 35-na, John F. Kennedy chuan a lo sawi tawh a. He thu hi kan hriat lar leh zirlaite kan fuihna thu pawh a ni fo thin. Chuvangin zirlaite hi nakin lawka Mizoram hma lam hun siam tu tur an ni a, kan ram innghahna a ni bawk a. Chutih rualin mi puitling leh lehkhathiam ni tura an inchherna tur ‘pum’ kan mamawh a, chu ‘pum’ chu zirna in a ni.

Kan ramah tunhnai kum 10 chhung hian nasa takin a sikul pung a, Primary School atanga Higher Secondary School  phei chu a thahnem tawh hle mai. Chutih rualin zirna sang lam College leh a chung lam erawh a pung hlei thei lo thung a. Pawl 12 result a chhuak a, zirlai tam takin College ah luhna tur an hmu lova, chutiangin BA/BSc etc. pass thar ten University ah seat an inchan lo bawk a. Mi tam tak zirna chhunzawm thei lovin an chawlh phah fo thin. Chuvangin zirlaiten zirna an chhunzawm zelna tur leh thiamna sang zawk an neih theihna turin zirna sang (higher institutions) kan neih belh zel hi a tul tak meuh a ni.

Kan ram a hausa lova, khawsakah pawh Mizote hi kan sang lem lo bawk a. Mizoram University kan neih hma phei kha chuan MA zir chhunzawm turin state pawna kal a ngai thin a, hemi a nih avang hian chhungkaw tam tak chuan chhungkaw harsatna avangin an fate zirna sang zawk an chhunzawm tir hlei thei thin lova. Hemi avang hian lehkhathiam tak tak, harsatna avanga zir chhunzawm ta lo leh an nih ang ni ta lo an awm phah nual a ni. Lehkhathiam thei tak tak leh mifing tak tak, zir zawm zel se chuan nakin lawkah kan ram pawhin a chhawr em em tur, khawsak harsat avang leh state pawn chhuah a ngaih avanga zir chhunzawm ta lo hi tam tak an awm ngei ang. College thlenga kal, a aia sanga kal chhunzawm thei ta lova, a remchan anga hnathawh tur zawng lo thei ta lo hi an awm fur awm e.

Chuvangin kan thalai, zirlai thiam thei tak tak te hian an thiamna te pholang tur leh tihlawhtling turin zirna sang (higher institution) an kal a ngai a, chu chu mi harsa ber pawhin an ban phak theih turin Mizoram chhungah hian kan neih a ngai a ni.

Tunah hian Mizoramah Law College chhiar telin College 23 lai kan nei tawh a, hei bakah hian Hindi Training College te, NIT te, Mizoram Polytechnic leh Women’s Polytechnic te kan nei bawk a. Tun dinhmunah hian Mizorama College ah te hian General Course –BA/BSc/BCom/BCA etc. te chauh a zir theih a. Ramdangah te chuan College ah Post Graduate zirna te an nei a, kan ramah erawh chuan kan nei thei rih lo. Under Graduate (UG) Course zirna ngawr ngawr hi a ni rih mai a. Tunhnaiah College tih changtlunna turin Centrally Sponsored Scheme(CSS) tha tak mai, Rashtriya Uchchatar Shiksha Abhiyan (RUSA) a lo awm thar a, RUSA hnuaiah hian hmalak chhoh tan mek a ni a, nakin lawkah chuan RUSA avang hian College tin te hian building tha tak leh zirna changkang tak, general subject mai piah lamah Vocational course te pawh zir theihna tur kan nei thuai dawn a ni. A nghahhlelhawm tawh hle mai. Tin, RUSA hnuaiah tho hian Model College ah College 2- Govt. Hrangbana College leh Govt. Zirtiri Residential Science College te pawh thlan fel tawh an ni bawk.

Entirna pakhat han sawi ta ila, tunah hian pawl 12-ah Sikul tam takin Vocational Course an zir a, hengte hian pawl 12 an zawh hnuah zir chhunzawm zelna tur an nei tawh lova, College zawm ve ngei an duh avangin College ah Arts emaw commerce emaw te loh theih lova an zir a ngaih phah a, vocational lamah thui tak zirna tur kan nei lo. Vocational course lama eizawnna tling tur an zir chhuah hma in zir zelna tur institution kan neih loh avangin an tawp san a ngaih phah a, a uihawm em em a ni. RUSA Scheme hnuaiah bawk hian Community College te pawh din chhoh zel a ni dawn a, hengah te hian Vocational Course pawh tha tak tak a awm thei dawn bawk a, a nghahlelhawm em em a ni. Mizo zirlaite hmalam hun a eng chho zel dawn niin a lang.

Tin, Mizoramin kan mamawh em em, Engineering College pawh RUSA hnuaiah hian Lunglei lamah din turin ruahmanna siam mek a ni bawk.

Mi thiam, ramin a chhawr theih tur chher chhuak turin College a tawk mai lova, University a ngai. Kum 2001 atangin Mizoram University kan nei tan a, kan ramah ngei MA, PhD te a zir theih ta a. Tunhma a state pawn pan ngai thin kha pan kher ngai lovin mahni awmhmun atangin a zir ve theih ta. University kan neih hnu hian kan state pawhin zirna leh kawng hrang hrangah hma kan sawn phah hle a, ramdang mi leh sap ho zingah chauh scientist te hi awm turah kan ngai thin a, mahse tunah chuan Mizo pa, Science lama mithiam (Scientist) leh Social Scientist thiam tak tak, khawvel ram dangah pawh kal se zahpuiawm loh tur hi kan nei ta nual mai. Hengte hi University kan neih tak vang a ni. Khawvelah pawh an la hmuhchhuah loh, Mizorama kan neih tam tam tak te hi kan mithiam ten an hmuchhuak deuh reng ta mai a. University hi MA leh PhD zirna hmun a ni mai lova, zirbingna hmun (research institute) a ni a, kawng hrang hranga ram mamawh leh hmasawnna tura kan mamawh te hi zir reng a ni a. Sawrkar pawhin a hmang tangkai chho telh telh niin a lang a, an thiamna leh an hmanrua te hi kan mamawhna a sang chho zel dawn a ni. Sawrkarin ram inkaihhruaina leh hmasawnna kawngah mithiam te rawn nachang a hriat a, a hman tangkai thiam chuan kan ramin hma a sawn ngei ang.

A bik takin Science & Technology lama ramin hma kan sawn theihna turin University lama Science Department ten nen thawhhona tha  kan neih thiam chuan Sawrkar leh ram tan nasa taka hlawkpuina leh hmasawnna tur a ni ang.

Sawrkar hmalakna hrang hrang te a hlawhtlin theihna tura rawtna leh thurawn pek thu ah te, a hlawhtlin leh hlawhtlin loh zirchian chungchangah te pawh University lama mithiam ten nasa takin hma an la zel a, chung an zirchianna te chu Sawrkarah thehlutin Sawrkar lamin nasa takin a hlawkpui thin a ni.

Chuvangin kan University hian nasa takin ram hmasawnna kawngah kawngro a su a, sawrkar lam thuneitute pawhin rawn nachang leh hman tangkai leh zual dan a thiam a tul hle mai. India ram Prime Minister kalchhuak ta, Dr Manmohan Singh chu kha Politician a ni lova, India ram ei leh bar dinhmun siamtha turin a thiamna hman tangkai duhin a thawhna Delhi School of Economics zirtirtu a nihna atangin an sawm chhuak a. Sawrkarin hna hrang hrang an chelh kual tir a, Planning Commision ah te, Reserve Bank of India(RBI) Governor ah te, PM Adviser on Economic Affairs ah te ruat a nih hnuah Finance Minister atan sawm a ni a, chutah Prime Minister a ni chho ta zel a. Economics lama mithiam a nih avangin India ramin ei leh bar lamah nasa takin hma a sawn phah a ni. He entirna pakhat mai atang pawh hian University mithiam te hi sawrkarin a hman tangkai thiam chuan ramin a hlawkpui em em a ni.

Tunah pawh Mizoram sawrkar policy lian ber, Flagship programme, New Land Use Policy (NLUP) pawh hi a tira ruahmanna an siam bakah Mizoram University lam mithiam te leh College of Veterinary Sciences & Animal Husbandry (Selesih) te rawnin kalpui zel dan turah ruahmanna tha zawk siam a ni a. Kalphung tha zawka kalpui dan tur leh a hlawhtlin leh zual theihna turin University te hian nasa takin tha an thawh chho mek zel a ni.   

 Kum 2010 khan India Sawrkar, Ministry of Human Resources Development, chuan India ramah National Institute of Technology(NIT) 10 a din thar a, chung zingah chuan Mizoram pawh a tel ve ta hlauh mai a.  Kum 2010 ah vek khan NIT hi Mizoramah hawn nghal a ni a, class pawh tan nghal a ni. NIT ah hian B.Tech, M.Tech, M.Sc. & PhD te a zir theih a, heta lut tur erawh hi chuan All India Entrance Exam- Joint Entrance Exam (JEE Main)a inziah tlin erawh a ngai thung. India rama zirna tha zinga an sawi lar ber thin chu IIT te, NIT te ho hi an ni a. IIT, NIT ho te hi zirna mai bakah Sawrkarin Science and Technology lama hmasawnna tur hian a hmang tangkai em em mai a, India hmasawnna thlen tute an ni ringawt mai a ni. Mizoramah kan han nei ve ta a, a changtlung chho zel ang a, state dang atangin hnam dangin an la rawn bawh chho zel bawk ang a, nakin lawkah chuan state dang pawhin an awh em em a ni thuai ang.  Mizoramin Technology lamah hma kan sawn theihna turin NIT te hi an a tangkai dawn chauh a ni. Chuvangin  Sawrkar pawhin NIT hi a tih changtlun zel  a ngai a, hmunhma zau tha tak, duh thala an invalhna tur ngaihtuah a tha hle a ni.

Mizoramin kan awh em em, state dangin an neih deuh vek tawh chu Medical College hi a ni a. Kan ramah Doctor zir theihna hi awm ve tawh se tiin duhthu kan sam fo thin. Tunah chuan kan duhthusam te kha a takah a chang dawn ta niin a lang. Mizoram sawrkar chuan Falkawnah  Mizoram Institute of Medical Education & Research(MIMER) din turin ruahmanna a siam ta a, kumin August thlaah Class pawh tan theih beisei a ni a, ruahman dan chuan a tirah hian zirlai 100 vel lak tur a ni a, a lawmawm hle mai.

Medical College te hi MBBS zirna hmun mai a ni lova, damdawiin a nih nghal bawk avangin zirlai tan mai ni lo, mipui tan hlei hlei a tangkai a. Kan thalaiten State danga man to tak taka MBBS leh a dangte an zir thin kha kan ramah ngei zir theih a ni dawn ta. He College hi medical research institution a nih dawn avangin natna chungchanga zirbingna te kalpui thin a ni ang a, Mizo ten natna kan kai duh bik te, kan thihpui tam bik natna te pawh a hranpa a zirna te an la nei zel ang a, Mizo te tan hna tha tak tak an la thawk chho dawn a ni.

India ram leh khawvel hmun danga mi te nen thawhdunna te siamin kan Doctor thiam tak tak te hi an thawk suau suau ang a, natna hmuh chhuah theih loh avanga thihna tam tak te, hmanraw neih that loh avanga thihna te hi a reh turah ngai ila. Damdawiin pangngai mai ni lo, damdawi lam zirna hmun a nih dawn avangin kan ram chuan kan hlawkpui hle dawn a ni.

Ram changkangah chuan hriselna (health) hi an ngaipawimawh em em a, sawrkarin sum pawh Budget ah thahnem tak a dah thin. Ram changkang an hrisel a, mihring pawh an damrei bik a ni. Chuvangin kan sawrkar pawhin mipui hriselna hi a ngaih pawimawh a ngai a, chumi atan chuan damdawiin mai ni lo, Medical Institution din hi tihmakmawh a ni a, ram hmasawnna bul pawh a ni.

 

Tlangkawmna :

A tawp berah chuan, kan sawi tak ang khan kawng hrang hranga kan ram hmasawnna tur hi zirna ah a innghat thui hle a, a bik takin zirna sang (higher institution) te hi an mawhphurhna a sang leh zual. Ram changkang leh changkang lo tehna chu zirna leh hriselna hi a ni. Zirna an ngaipawimawh loh chuan ram in hma a sawn thei lova, hmasawn aiin hnung tawlh lam an pan thin.

Zirna sang te hi Sawrkarin a hman tangkai thiam a pawimawh hle a, en liam ringawt lovin engtin nge ‘higher institution’ te leh a mithiam te hi ram hmasawnna atan kan chhawr tangkai ang tih hi an ngaihtuah fo tur a ni. Khawvel hmun dangah chuan ei leh bara intodelhna leh hmasawnna a awmtheihnan University te nen thawhdunna te pawh an siam fo thin. Chutiang tur chuan kan University leh higher institution dangte pawh hi an inhawng hle a. University chauh ni lo, College zirtirtute zingah pawh mithiam tak tak an awm a, anni te hi sawrkar mi leh sa an nih tho avangin Sawrkarin awlsam takin an thiamna te hi a hmang tangkai thei ang.

Chuvangin kan ram hmasawnna leh kan hma lam hun te hi thui tak chu zirna in sang(higher institution) ah te hian a innghat a. Chutih rualin sawrkar leh ram hruaitu te pawhin kan rama zirna in te hi kan hman tangkai thiam leh thiamloh ah a innghat ve bawk ang chu.